Read Makassar Version – KITTA' MATANGKASA 2 TESALONIKA 3 Bible Online

2 TESALONIKA 3 - Makassar Version – KITTA' MATANGKASA bible

2 TESALONIKA 3

¹Kala'busanna, sari'battangku, appala' doangko untu' ikambe. Appala' doangko sollanna akkulle a'la'bang linta' siagang nitarima baji' biritta battua ri Batara, sangkamma le'baka kajariang mae ri kau ngaseng pirangalloang.

²Appala' doang tongko sollanna Napakabella Allata'ala ikambe battu ri sikamma tau panraka siagang tau ja'dalaka. Nasaba' tena nayangaseng taua latappa' mae ri anjo biritta battua ri Batara.

³Mingka tamamminrayai Batara. LaNapakajarrekko siagang laNajagaiko battu ri kaja'dallanga.

⁴Siagang ma'nassa tappa' tojeng-tojengi ikambe mae ri Batara ri passala'nu, angkanaya kamma-kamma anne nugaukangi siagang latuli nugaukangi apa napassuroanga ikambe mae ri kau ngaseng.

⁵Poro Narurungangko Batara sa'genna pila' la'bi nupahang pangngamaseanNa Allata'ala siagang kasa'barrang Napassareanga Almasi mae ri kau.

⁶Sikamma sari'battangku, lanri koasaNa Batara Isa Almasi, kikellai ngasengko sollanna nupakabella kalennu battu ri tau a'mala'-malasaka, siagang tau taeroka anturuki pangngajarang napabattua ikambe mae ri ke'nanga.

⁷Massing nuasseng ngasemmi angkanaya antekamma batenu musti angngalle conto battu ri kambe. Ikambe tena nakia'mala'-malasa' ri wattunna nia' ikambe ri tangnga-tangnganu ngaseng.

⁸Tangnganreai ikambe kanrena taua nampa nata'bayarra ikambe. Mingka allo bangngi akkareso tojeng ikambe sollanna tenanniakka manna sitau kibattali battu ri kau;

⁹teai lanri tenana nakkulle ikambe appala' tulung mae ri kau ngaseng, passangalinna sollanna akkulle ikambe a'jari conto mae ri kau ngaseng.

¹⁰Ri wattunna nia' ija ikambe ri tangnga-tangnganu ngaseng, napabattumi ikambe anne paratoranga angkanaya, “Tau tenaya naero' anjama, teako sarei kanre.”

¹¹Akkana kammami anne ikambe lanri nalangngere'na ikambe angkanaya nia' siapa are jaina tau ri alla'nu a'mala'-malasa' lalang ri katallassanna. Sangnging urusannaji tau maraenga napantama'-tamakki, siagang tena manna sirupa jama-jamang nagaukang.

¹²Lanri koasaNa Batara Isa Almasi naparentakangi siagang napappakaingakkangi ikambe mae ri ke'nanga, sollanna anjama baji'-baji' ke'nanga, siagang namassing naboya katallassanna.

¹³Mingka manna nakamma sari'battangku ngaseng, teako lanrei a'gau' baji'.

¹⁴Nakulle kapang nia' tau taeroka anturuki anne apa napabattua ikambe lalang ri anne suraka. Tutuko ri anjo tau kammaya; teako eroki assierang-erang siagang anjo tau kammaya sollanna a'jari siri'-siri',

¹⁵mingka teako pa'jari musui anjo taua; passangalinna pakaingaki sangkamma sari'battannu.

¹⁶Batara kabattuanna kasalewanganta. Poro Iami tuli assareko kasalewangang lalang sikontu katallassannu. Poro tuli Narurungang ngasengko Batara.

¹⁷Sallang battu ri nakke Paulus. Anne bageang anrinnia kalengku antulisiki. Iaminne pammatei mae ri sikontu sura'-surakku.

¹⁸Poro Nabarakkaki ngasengko Batarata Isa Almasi. Sallangku, Paulus