Read Makassar Version – KITTA' MATANGKASA 1 TIMOTIUS 4 Bible Online

1 TIMOTIUS 4 - Makassar Version – KITTA' MATANGKASA bible

1 TIMOTIUS 4

¹Naterassimi Napau RohNa Allata'ala angkanaya ri jammang labattua sallang, nia' sipa'gang tau lambokoi siagang lansassali Almasi. Lamminawang turuki sallang ke'nanga mae ri roh-roh salaya, siagang lanapinawangi ajarang-ajarang setanga,

²napabattua tau munapeka siagang tau paballe-ballea. A'jari sassammi ati mailalanna anjo tau kammaya.

³Napangngajarrangi sollanna ta'buntinga taua; siagang jai apa-apa tanapa'bianga nikanre. Na sikontutojenna anjo kanre-kanreanga Allata'ala ampa'niaki. Yangasenna anjo Nakellai Allata'ala sollanna nikanre siagang sukkuru' ri sikamma tau tappakamo mae ri Almasi siagang tau naassengamo pangajarang katojengang battua ri Allata'ala.

⁴Sikontu apa-apa Napa'niaka Allata'ala sikontutojenna baji' ngasengi; tena manna sirupa akkulle niharangngang punna nitarimai siagang sukkuru' battu ri Allata'ala.

⁵Nasaba' nipa'jari hallala'mi anjo apa nikanrea lanri pappala' doangang siagang barakka'Na Allata'ala.

⁶Punna nupangngajarrang baji'mo yangasenna anjo mae ri parannu tau tappa', a'jari palayanNa mako Isa Almasi, siagang nugaukang baji'mi jama-jamannu. Siagang parallui pila' nupattimbo pa'mai'nu siagang kana nipatappaka battu ri Allata'ala, siagang pangngajarang katojengang nupinawangamo siapa sallona ri kamma-kammaya anne.

⁷Pakabellai kalennu battu ri carita-carita kosong tenaya matu-matunna. Parallui nupa'biasa kalennu a'jari tau anynyombaya ri Allata'ala lalang ri katallassannu.

⁸Anjo latihang tubua sike'de'ji matu-matunna; mingka latihang rohania a'matu-matui lalang sikontu-kontuna katallassanta, nasaba' akkimbolongi janji untu' katallassanta ri kamma-kammaya anne siagang katallassang labattua.

⁹Anjo kammatojengi na siratangi nitarima siagang nipatappa' tojeng-tojeng.

¹⁰Iaminjo saba'na kippattujuang siagang anjama terasa', lanri manrannuang tojeng-tojengki' mae ri Allata'ala mattallasaka; Iami Batara Mappasalama'na sikontu rupataua, la'biangampa pole mae ri sikamma tau tappaka.

¹¹Pangngajarrang ngasengi anjo siagang passuroangi mae ri taua sollanna naturuki.

¹²Teako pa'biangi kalennu nicini' tuna lanri rungkanu ija. Mingka paralluko a'jari conto mae ri sikontu tau tappaka ilalang ri pau-paunu, panggaukannu, katappakkannu, pangngamaseannu, kammayatompa katangkassanna katallassannu.

¹³Kammayatompa, ilalang tenanapa kubattu, paralluko attojeng-tojeng ambacakangi Kittaka mae ri taua, siagang nupakamaju, kammayatompa nuajara' ke'nanga.

¹⁴Teako takkaluppai ampakei passareNa RohNa Allata'ala ri wattunna napatompang limanna pamimping-pamimping jama'aka irate ri ulunnu, kammayatompa ri wattunna napabattu na'bi-na'bia pappasanNa Allata'ala ri passala'na kalennu.

¹⁵Attojeng-tojengko anggaukangi yangasenna anjo, sollanna akkulle nacini' ngaseng taua kamajuannu.

¹⁶Katutui kalennu siagang katutui tongi pangngajarannu. Paralluko tamamminraya anggaukangi yangasenna anjo nasaba' kammaminjo nanupasalama' kalennu kammayatompa sikamma tau allangngerekai apa nupangngajarranga.