Read Makassar Version – KITTA' MATANGKASA 1 TIMOTIUS 5 Bible Online

1 TIMOTIUS 5 - Makassar Version – KITTA' MATANGKASA bible

1 TIMOTIUS 5

¹Teako liwakki larronu mae ri tau la'bi toanganga na ikau. Usahakangi nanapilangngeri kana-kanannu sanrapang angkana iami manggenu. Ia tau rungkaya pasangkammai sari'battannu;

²siagang bai'-baine toaya pasangkammai amma'nu. Ia tuloloa pasangkammai andi' tojeng-tojennu.

³Pakala'biriki janda-janda akkale-kalea tojemmo lalang katallassanna.

⁴Mingka punna janda nia' ana'-ana'na yareka cucu-cucunna, iaminjo ana'-ana'na yareka cucu-cucunna parallu todong nipakainga' sollanna nau'rangi ke'nanga bijanna, siagang nabalasa' pa'mai' baji'na tau toana yareka nene'na ke'nanga. Nasaba' iaminjo kammaya ampakarannui atinNa Allata'ala.

⁵Ia janda-janda akkale-kalea tojemmo, natena tojemmo tau akkulle amparakai, parallui manrannuang mae ri Allata'ala bawang. Allo bangngi tuli appala' doang untu' appala' tulung mae ri Allata'ala.

⁶Mingka ia janda nangaia assannang-sannang lalang ri katallassanna, sikontutojenna matemi manna pole nattallasa' ija nicini'.

⁷Pabattui anne sikamma pappakaingaka mae ri ke'nanga, sollanna natangkasi katallassanna ke'nanga, natena callanna.

⁸Mingka punna nia' tau tena naparakai bija pammanakanna, la'biangampa nabone balla'na tonja, anjo tau kammaya nasassalimi katappakkanna; anjo tau kammaya la'bi kodiangammi natau tenaya natappa'.

⁹Iaji janda-janda kammaya anne akkulle nipantama' arenna lalang ri kitta' areng-areng jandaya, iamintu: umuru'na tena nakurang ri annampuloa taung, sikaliji le'ba' a'bunting,

¹⁰niassemmi angkanaya nangai a'gau' bajika, kammaya: le'ba'mi napakalompo baji' ana'-ana'na, nangai annarimaya toana a'bangngi ri balla'na, nalayani tau tappaka, siagang natulungi tau susaya; bodona kana, le'ba'mi nagaukang tojeng-tojeng a'rupa-rupaya jama-jamang baji'.

¹¹Teako pantamai arenna ri bukua janda-janda loloa ija. Nasaba' punna battui cinnana ke'nanga, akkullea ampakabellai ke'nanga battu ri Almasi, ero' poleammi ke'nanga a'bunting.

¹²Jari salami ke'nanga lanri allessoki ri janjinna mae ri Almasi.

¹³Nampa pole napela'-pela' salami wattunna ke'nanga assulu' antama' ri balla'na taua. Siagang la'bi kodianganga pole, iamintu appilajara'mi ke'nanga ambotto'-bottoki arenna taua; siagang napantama'-tamakki urusanna tau maraenga, kammayatompa nabicarami apa-apa tenaya nasiratang nibicara.

¹⁴Iaminjo nakukellai sollanna a'bunting poleang janda-janda loloa, nanggappa ana', sollanna naparutusu' ruma tanggana; sa'genna tenamo nanggappa kasampatang musu-musunta untu' ambotto'-bottoki arenta.

¹⁵Nasaba' nia' janda-janda sala oloang nampa napinawang ero'na Setanga.

¹⁶Mingka punna nia' baine Karisteng nia' bijanna jandamo, musti nabantui anjo jandaya. Takkulleai nabalang parekang sa'genna jama'aka antanggongi. Jari akkullemi jama'aka ambantui janda-janda tena sikalia bija pammanakanna.

¹⁷Sikamma pamimping anggaukang bajikai jama-jamanna siratangi a'lappi rua batena nipakala'biri', la'biangampa ia rajenga akkato'ba siagang angngajara'.

¹⁸ Nasaba' nia' tattulisi' lalang ri Kittaka angkanaya, “Punna nipakei sapia appa'jeko takkulleai nijempang bawana”; kamma tomminjo, “Tau anjama-jamaya musti nagappai sawala'na”.

¹⁹ Teako pilangngeri tuduhanga mae ri pamimping jama'aka, punna tena nangganna' kaminang rawana rua tau a'jari sa'bi.

²⁰Inai-nai a'gau' dosa, musti nipakaingaki ri dallekanna sikontu jama'aka, sollanna a'jari malla' maraengannaya.

²¹Ri dallekanNa Allata'ala, Isa Almasi, siagang malaeka'-malaeka' nipileNa, kupala' tojeng-tojengi ri kau sollanna nuturuki anne pappakaingaka; teako ranggaselai manna ri nai, siagang teako assialle-alleangangi.

²²Teako linta' dudui ampatompangi limannu untu' angngangkaki se'rea tau a'jari palayanNa Batara. Punna a'gau' dosa taua teako katuru'-turukangi anggaukangi anjo dosaya. Jagai kalennu sollanna nutuli matangkasa'.

²³Teako tuli je'ne' bawang nuinung; mingka angnginung tongko sike'de' anggoro' sollanna a'jari baji' lalang parru'nu, natena nutuli garring-garring.

²⁴Sipa'gang taua a'nassa memammi dosana ri tenanapa niadeli. Mingka sipa'gang taua nampami a'nassa dosana ri wattunna le'ba' niadeli.

²⁵Kamma tomminjo panggaukang-panggaukang bajika a'nassa memammi nicini'. Siagang manna sukkaraka nicini', tena todong nakkulle tuli lataccokko.