Read Makassar Version – KITTA' MATANGKASA 2 TIMOTIUS 2 Bible Online

2 TIMOTIUS 2 - Makassar Version – KITTA' MATANGKASA bible

2 TIMOTIUS 2

¹Anakku Timotius! Paralluko a'jari majarre' lanri pangngamaseang malammoro' nipassareanga mae ri katte, lanri asse'reta siagang Isa Almasi.

²Anjo pangngajarang le'bakamo nulangngere' battu ri nakke ri dallekanna tau jaia, parallui nupappirannuang mae ri sikamma tau akkullea nipatappa' siagang cara'deka angngajaraki tau maraenga.

³Musti amminawang tongko angkasiaki kasessanga salaku surudadu majarre'Na Isa Almasi.

⁴Surudadu sitabanga anggaukangi tugasa'na, takkulleai urusang kalenna naparutusu', lanri eroki napakasannang pa'mai'na komandanna.

⁵Se'rea pakarena olaraga, takkulleai a'jari juara lalang attandinna punna tena naturuki paratorang-paratoranna anjo olaragaya.

⁶Pamarri attojeng-tojenga anjama terasa', iami kaminang siratang anggappai wassele' lamung-lamunna.

⁷Nawa-nawa bajiki anne kupaua, nasaba' laNasareko pakkulle Batara untu' ampahang ngasengi anne passalaka.

⁸U'rangi anne: Anjo Kabara' Baji' kubirittakanga iamintu kabara' ri passala'na Isa Almasi, sossoranna Daud; Iami Almasi, le'baka attallasa' ammotere' battu ri kamateanga.

⁹Lanri kubirittakannamo Kabara' Bajika, nakukasia'mo kasessanga; ba'lalo nirantema' sangkamma tau sannaka ja'dala'na. Mingka anjo kana-kananNa Allata'ala takkulleai nirante.

¹⁰Iami anjo saba'na nakusa'bara' antanggong ngasengi anjo kasessanga, lanri kaparalluanna sikamma tau le'bakamo Napile Allata'ala. Sollanna nagappa ngaseng todong ke'nanga kasalamakkang Napassareanga Allata'ala tete ri Isa Almasi, nirurunganga ri kala'birang mannannunganga.

¹¹Kammatojengi anne bicara angkanaya, “Punna mate maki' siagang Ia, lattallasa' tommaki' siagang Ia,

¹² Punna tuli sa'barakki' lammarenta tommaki' siagang Ia. Punna tanitarimayai, talaNatarimaya tommaki'.

¹³Punna tamajarrekaki' Ia tuli majarreki, nasaba' takkulleai assisala siagang KalenNa.”

¹⁴Yangasenna anne parallui nupappakaingakkang mae ri taua. Pakaingaki ri dallekanNa Allata'ala ke'nanga sollanna tena na'gea'-gea' ke'nanga passabakkang kana-kana. Anjo kammaya tena matu-matunna, passangalinna napa'lingu-linguji tau allangngerekai.

¹⁵Paralluko attojeng-tojeng appattujuang sollanna Naakuiko Allata'ala angkanaya ma'nassa tau siratang memang tongko anjama untu' Allata'ala. Usahako sollanna tena nu'jari siri'-siri' passabakkang jama-jamannu; passangalinna pangngajarrangi baji'-baji' sikamma pangngajarang tojeng battua ri Allata'ala.

¹⁶Pakabellai kalennu battu ri bicara-bicara tenaya matu-matunna siagang ampakatunayai Allata'ala. Anjo bicara-bicara kammaya pila' napa'jari ja'dala'ji taua.

¹⁷Pangngajaranna anjo tau kammaya sanrapangi garring lompo akkullea a'lette'-lette'. Antama' tommi kammaya Himeneus siagang Filetus.

¹⁸A'lesso'mi ke'nanga battu ri pangngajarang tojenga, siagang napa'lingu-lingumi katappakkanna sipa'gang taua. Napangngajarrammi ke'nanga angkanaya kamma-kamma anne kajariammi anjo katallassanta ammotere' battu ri kamateanga.

¹⁹ Mingka anjo pammentengang makassa' le'baka Napare' Allata'ala takkulleai nipata'ge'goso'. Irateanganna nia' tattulisi' angkanaya, “Naassengi Batara sikamma taunNa,” siagang “Inai-nai nakana kalenna taunNa Batara, musti ammarimi anggaukangi gau' salaya”.

²⁰Lalang se'rea balla' lompo nia' a'rupa-rupa pakkakasa' balla'. Nia' pakkakasa' pera' yareka bulaeng, mingka nia' todong battu ri kayu yareka butta. Nia' lanipake untu' kaparalluang lompo, na nia' todong lanipake untu' kaparalluang biasa.

²¹Inai-nai antangkasi kalenna battu ri sikontu gau' tenaya nabaji' iami lanipake untu' gau'-gau' kaparalluang lompoa. Iami a'jari taunna siagang a'matu-matua mae ri karaenna. Iami nipasadia untu' lanipake ri jama-jamang bajika.

²²Pakabellai kalennu battu ri kasannang-sannanganna tau rungkaya. Usahako untu' attallasa' situru' ero'Na Allata'ala, untu' majarre' tappa'nu mae ri Ia, mangngamaseang ri parannu tau siagang nia' kasannangang ri atinnu. Kammami anjo batenu attallasa' siagang sikamma tau akkioka appala' tulung mae ri Batara situlusu' atinna.

²³Teako pantamakki kalennu ri pa'gea'-geakkanna tau dongo' tenaya apa-apa naasseng. Nuassemmi angkanaya yangasenna anjo sangnging pa'beseranji bawang napattimbo.

²⁴Inai-nai anjama-jama untu' Batara tasiratangai a'besere'; musti sombereki mae ri yangasenna taua, siagang akkullei naajara' taua siagang baji' na sa'bara'.

²⁵Musti tunai angngajaraki tau nangaia pabali-bali; barang nisareji kasampatang ri Allata'ala anjo ke'nanga untu' a'jari toba' battu ri dosa-dosana siagang naasseng pangngajarang tojenga.

²⁶Lalang kammana anjo, akkullemi angngu'rangi ammotere' ke'nanga, siagang ta'lappasa'mi battu ri sikko'na Billisika, ia angngalleai pangngainna ke'nanga siagang ampassayai ke'nanga anturukiangi ero'na.