Read Makassar Version – KITTA' MATANGKASA 2 TIMOTIUS 4 Bible Online

2 TIMOTIUS 4 - Makassar Version – KITTA' MATANGKASA bible

2 TIMOTIUS 4

¹Labattu poleangi Isa Almasi antama' ri anne linoa untu' angngadeli sikontu tau attallasaka siagang tau matea; siagang labattui untu' ammarenta, a'jari Batara. Iami anjo saba'na nakupala' tojeng-tojeng mae ri kau, ri dallekanNa Allata'ala siagang Isa Almasi:

²Parallui nubirittakang anjo biritta battua ri Allata'ala; paralluko tuli sadia lalang ri wattu bajika yareka ri wattu tenaya nabaji'. Parallui nupa'jari tappa' taua, nupauang kasalanna, siagang nupakamaju ke'nanga. Sa'bara' tojeng-tojengko angngajaraki taua.

³Nasaba' nia' sallang nanarapi' wattunna nataerokamo taua antarimai pangngajarang tojenga. Mingka ero' kalenna mami lanaturuki ke'nanga; siagang lappa'rappummi ke'nanga jai guru sollanna niajara' ke'nanga apa-apa bajika nalangngere' ri tolinna ke'nanga.

⁴Lanatongko'mi tolinna ke'nanga mae ri apa-apa tojenga, mingka lanasungkemi tolinna ke'nanga mae ri carita-carita kosonga.

⁵Mingka manna naantekamma, ikau musti nupakalewai kalennu. Sa'barakko lalang ri kapa'risannu, siagang gaukangi jama-jamannu ambirittakangi anjo Kabara' Bajika, kammayatompa gaukang baji' tommi jama-jamannu a'jari palayanNa Allata'ala.

⁶Passala'na kalengku, narapi'mi wattungku lamate a'jari koro'bang mae ri Allata'ala. Sinampe' mami nalakubokoi anne linoa.

⁷Le'ba'ma' sanrapang amminawang appa'lumba sibaji'-baji'na, siagang anrapi'ma' battu mae ri bassika. Tuli anna'gala' majarreka' lalang tappakku mae ri Isa sanggenna kale'bakkanna.

⁸Na kamma-kamma anne sadiami hadia pammetangku. Ri Allo Kiamaka sallang, laNapassareammi Batara, Haking adeleka, anjo hadiaya mae ri nakke, lanri assibajikingku siagang Allata'ala lalang ri katallassangku. Siagang teai inakkeji bawang lannarima hadia kammaya anjo, mingka sikontu pole tau sannaka nakku'na antayangi kabattuanNa Batara.

⁹Usahako linta' battu mae ri nakke,

¹⁰ nasaba' nabokoima' Demas lanri nakarimangnginna anne linoa. A'lampami mange ri Tesalonika. A'lampami Kreskes mange ri Galatia, siagang Titus a'lampami mange ri Dalmatia.

¹¹ Lukas mami kuagang ammantang. Alle tongi Markus nanuerang mae anrinni, nasaba' akkullea' nabantu lalang ri jama-jamangku.

¹² Kusuromi Tikhikus a'lampa mange ri Efesus.

¹³ Punna battuko mae, erangang tonga' jubaku kubolika ri Troas ri balla'na Karpus. Erang tongi buku-bukuku, la'biangampa anjo buku-buku karattasa' kukkuluka nipare'.

¹⁴ Aleksander, anjo tukang tambagaya sanna' ja'dala'na panggaukanna mae ri nakke. Mingka lanibalasaki ri Batara situru' anjo panggaukanna.

¹⁵Musti nukatutui kalennu mae ri ia, nasaba' sanna' tenana nangai anjo biritta nipabattua.

¹⁶Ri wattunna uru-uru kubela kalengku ri pangadelanga, tena sikali manna sitau anrurunganga'; a'lampa ngasemmi taua ambokoia'. Poro tena lalo nanipasalai ri Allata'ala ke'nanga ri anne passalaka!

¹⁷Mingka Narurunganga' Batara. Nasarea' kagassingang sa'gengku akkulle ambirittakangi sikontu anjo Kabara' Bajika, sollanna akkulle nalangngere' ngaseng bansa-bansa maraenga. Siagang ta'lappasa'ma' battu ri bahayana kamateanga.

¹⁸Memang, tuli laNalappassanga' Batara battu ri sikontu usaha ja'dalaka mae ri kalengku. LaNaeranga' siagang salama' antama' ri KakaraenganNa ri suruga. Poro nipakala'biriki sa'genna satunggu-tungguna! Aming.

¹⁹ Sallangku mae ri Priskila siagang Akwila kammayatompa Onesiforus siagang sikamma tubone balla'na.

²⁰ Erastus ammantangi ri Korintus, siagang Trofimus kuboliki ri Miletus nasaba' garringi.

²¹Usahako nubattu linta' genteng tenanapa nabattu wattu dinginga. Ebulus, Pudes, Linus, siagang Klaudia, akkiring ngaseng tongi sallang mae ri kau; kammayatompa sikamma julu tappatta maraengannaya, akkiring ngaseng tongi sallang.

²²Poro nirurungangko ri Batara. Poro nibarakkaki ngasengko ri Batara! Sallangku, Paulus