Read Makassar Version – KITTA' MATANGKASA TITUS 3 Bible Online

TITUS 3 - Makassar Version – KITTA' MATANGKASA bible

TITUS 3

¹Piu'rangiangi anggota-anggota jama'anu sollanna mappilangngeri mae ri pamimping-pamimpinga siagang mae ri tau anna'galaka koasa ri pa'rasanganga; kammayatompa mannuruki siagang sadia anggaukangi sikamma kabajikanga.

²Pauangi ke'nanga sollanna tena napitinai paranna tau, passangalinna parallui assiama' siagang sombere' mae ri taua. Siagang parallui tuli tuna kana-kananna ke'nanga mae ri yangasenna taua.

³Nasaba' ikatte riolo dongo' tonjaki', lingu tonjaki' siagang tena tonja nimappilangngeri. Nipare' ataki' ri a'rupa-rupaya hawa napasuta siagang kacinnanta; a'rupa-rupai ero' ja'dalatta, assereatiki', siagang sikabiri'-birisiki'.

⁴Mingka Napappicinikang maki' pangngamaseanNa siagang kabajikang pa'mai'Na Allata'ala Mappasalamatta.

⁵Napasalama' maki', lanri KalenNa angkamaseangki', jari teai lanri nia'na kabajikang le'ba' nigaukang. Napasalamakki' tete ri RohNa Allata'ala assareaki' kajariang beru siagang katallassang beru lanri Natangkasinta.

⁶Napassareangi RohNa Allata'ala mae ri katte tete ri Isa Almasi, Batara Mappasalamatta;

⁷sollanna lanri lammoro' pangngamaseanNa Isa nakiakkullemo assibajiki ammotere' siagang Allata'ala kammayatompa nakigappamo katallassang sitojennaya siagang katallassang mannannungang niminasaia.

⁸Sanna' kontutojenna anne bicaraya. Kukellaiko ampakasingara' tojeng-tojengi yangasenna anne, sollanna akkulle usaha tojeng-tojeng sikamma tau tappaka mae ri Allata'ala, untu' anggaukangi jama-jamang bajika siagang a'matu-matua untu' yangasenna taua.

⁹Pakabellai kalennu battu ri pa'gea'-geakkang tenaya matu-matunna siagang carita-carita pattottoranga. Liliangi pa'beseranga siagang passiba'jianga ri passala'na hukkung-hukkung agamaya. Yangasenna anjo tena matu-matunna siagang tena wassele'na.

¹⁰Punna nia' tau appasisala-sala lalang ri jama'aka, parallui nupakainga' sikali yareka pinruang; le'baki anjo punna taeroka mappilangngeri tea' mako agangi pole sipa'rappungang.

¹¹Nuassemmi angkanaya ja'dalaki anjo tau kammaya siagang dosa-dosanami ampa'butti ma'nassana sala.

¹² Punna battumo Artemas yareka Tikhikus kusuro mae ri kau, akkaro-karo mako battu mae ri nakke ri Nikopolis, nasaba' erokka' ammantang anjoreng sa'genna le'ba' wattu dinginga.

¹³ Attojeng-tojengko usaha untu' ambantui Zenas, anjo tu cara'deka ri pangngassengang hukkung-hukkunga, siagang Apolos; sollanna tena kakuranganna punna a'lampa ke'nanga.

¹⁴Yangaseng taunta musti appilajaraki anggaukangi apa-apa bajika, sollanna akkulle massing nagappa apa-apa sannaka naparalluina ke'nanga; gassingka tena matu-matunna katallassanna ke'nanga.

¹⁵Sikamma sari'battanta niaka kuagang anrinni, akkiringi sallang mae ri kau. Pabattui sallanna ikambe mae ri agang-aganta ngaseng, julu tappatta ri Almasi. Poro Nabarakkaki ngasengko Batara. Sallangku, Paulus