Read Makassar Version – KITTA' MATANGKASA FILEMON 1 Bible Online

FILEMON 1 - Makassar Version – KITTA' MATANGKASA bible

FILEMON 1

¹Natarimai Filemon, sari'battanna siagang belana ikambe! Battu ri nakke Paulus nitarungkua kamma-kamma anne passabakkang Isa Almasi; siagang pole sari'battanta Timotius. Ikambemi ampareki anne suraka untu' ikau

² siagang anggota jama'ah niaka a'rappungang ri balla'nu; kammayatompa untu' sari'battang baineta Apfia na sipa'julu jama-jamanta iamintu Arkhipus.

³Ma'minasaki' mae ri Allata'ala Manggeta siagang mae ri Batara Isa Almasi, nuporo Nasare barakka' siagang katallassang salewangang.

⁴Punna appala' doanga', tuli kupaui arennu nakuappala' sukkuru' mae ri Allata'ala.

⁵Nasaba' kulangngere'mi kabara'nu angkanaya nukamaseangi sikontu umma'Na Allata'ala, siagang tappa' tojeng-tojeng mako mae ri Batara Isa.

⁶Appala' doanga' naporo anne passari'battanganta salaku tau tappa' langngerangi pangngassengang la'bi jai mae ri barakka' niaka ri katte, lanri asse'reta siagang Almasi.

⁷Pangngarimangnginnu mae ri sikontu umma'Na Allata'ala, sari'battang, napakarannui pa'maikku siagang napakalompoi sumangakku! Tassaleori ngasemmi sikontu Umma'Na Allata'ala lanri ikau.

⁸Lanri kammana, salaku sari'battang julu tappa'nu, akkulleko kusuro anggaukangi apa parallua nugaukang.

⁹Mingka lanri kukarimangnginnu, kupala'ji bawang mae ri kau. Inakke anne toama', siagang nitahanga' lalang ri tarungkua ri kamma-kammaya anne passabakkang Isa Almasi.[1]

¹⁰ Inakke, Paulus, nia' pappalakku mae ri kau; iamintu passala'na Onesimus, anakku lanri Almasi. Nasaba' a'jari bapa' rohaninama' lalang ri anne tarungkua.

¹¹Riolo tena matu-matunna mae ri kau; mingka kamma-kamma anne sanna'mo lompona matu-matunna. Tena nauntu' ikauji bawang, passangalinna untu' inakke pole.

¹²Kamma-kamma anne kusuromi ammotere' mae ri kau anjo tu kukamaseanga, iamintu Onesimus.

¹³Sikontutojenna eroki kutahang anrinni a'jari sambennu; sollangku akkulle nabantu ilalang niakku lalang anrinni ri tarungkua passabakkang Kabara' Baji' battua ri Allata'ala.

¹⁴Mingka tena kuero' anggaukangi anjo kammaya punna tenapa nanusitujui rolong. La'bi kungaiangangi punna kalennu todong rella anggaukangi anjo kammaya; tena nakuero' ampassako.

¹⁵Nikellai memang tongko kutadeng assisa'la' rolong sinampekang siagang Onesimus; sollanna akkulle nugappa pole ammotere' untu' satunggu-tungguna.

¹⁶Kamma-kamma anne teaimi poro pajama-jamannu bawang; mingka la'biangampa pole. A'jarimi paranta tu Karisteng sannaka nikamaseanna. Nasaba' sanna' lompona todong matu-matunna mae ri nakke; la'biangampa pole mae ri kau, tantu la'bi lompoangangi matu-matunna. Baji' na'jari pajama-jama, kammayatompa na'jari sari'battang lanri Batara!

¹⁷Lanri kammana, tarimami ammotere', nanupare' sari'battang paranta tu Karisteng. Tarimami anne Onesimus sangkamma angkana inakkemi nutarima.

¹⁸Punna nia' kasalanna yareka nia' inranna mae ri kau, boli'mi kamma na inakke antanggongi ngasengi anjo sikammaya.

¹⁹Jari baji'mi nakutulisi' kalengku anrinni angkanaya: Inakkepa Paulus ambayara' ngasengi sallang. (Tantu tena naparallu kupappiu'rangiang angkanaya kalennu pole kainrangang tongko mae ri nakke, iamintu lanri katallassang berunu salaku tu Karisteng.)

²⁰Lanri kammana sari'battang, tulunga' lanri Batara; pakarannui pa'maikku sangkamma sari'battannu lanri Batara.

²¹Tappa' sikalia' ri wattunna kutulisi' anne suraka, angkanaya lanuturukianga' anne pappalakku. Na memang kuassengi angkanaya lala'biangangi pole lanuturukingku.

²²Pantaranganna anjo, pappasadianga' tampa' ri balla'nu; nasaba' kuminasai ri Allata'ala naNasareangko pappala'nu ngaseng, iamintu nanaeranga' ammotere' mae ri tangnga-tangnganu.

²³ Appikatui sallang Epafras, mae ri kau ngaseng. Nia' tongi anrinni lalang ri tarungkua siagang inakke passabakkang Isa Almasi.

²⁴ Tarima tommi sallanna agangku ngaseng iamintu: Markus, Aristarkhus, Demas siagang Lukas.

²⁵Poro Nabarakkaki ngasengko Batara Isa Almasi. Sallangku, Paulus