Read Makassar Version – KITTA' MATANGKASA IBRANI 1 Bible Online

IBRANI 1 - Makassar Version – KITTA' MATANGKASA bible

IBRANI 1

¹Ri jammang riolo, a'mole-molemi a'bicara Allata'ala mae ri boe-boeta. A'bicarami tete ri na'bi-na'bia, siagang a'rupa-rupami cara Napake a'bicara.

²Mingka anne ri kala'busang jammanga, a'bicarami mae ri katte tete ri Ana'Na. Tete ri Iami anne Ana'Na naNapa'nia' sikontu linoa siagang bonena. Siagang Napattantumi Allata'ala angkanaya Ia tommi anne Ana'Na siratang angkammai sikontu apa-apa niaka.

³Iami ampaccayai lalang ri KalenNa singara' kalompoanNa Allata'ala; Iami rupa ma'nyataNa battu ri KalenNa Allata'ala. Iatommi angkatutui kajarrekanna anne linoa, siagang sanna' makoasana kana Napaua. Ri le'ba'namo Nasare oloang rupataua untu' nilappassang battu ri dosa-dosana, mangemi ammempo ri empoang kala'biranNa ri suruga, ammarenta siagang Allata'ala, anna'galaka koasa kaminang tinggi.

⁴Anjo Anaka nisarei empoang tinggianganga na malaekaka; kammayatompa nisarei ri Allata'ala areng bellaya la'biri'na na areng nipassareanga mae ri malaekaka.

⁵ Tena le'bakai Allata'ala akkana kamma anne mae ri se'reang malaeka', “Ikaumi AnakKu; anne alloa iNakke a'jari ManggeNu.” Tena le'baka tongi Allata'ala akkana kamma anne ri sesena se'reang malaeka', “INakke la'jari ManggeNa, na Ia la'jari AnakKu.”

⁶ Mingka ri wattunna Nasuro Ana' bungasa'Na antama' ri anne linoa, akkana kammai anne Allata'ala, “Sikontu malaeka'Na Allata'ala musti anynyombai mae ri anjo Anaka.”

⁷ Ri sesena sikontu malaekaka, akkana kammai anne Allata'ala, “Napa'jari kammai anging malaeka'-malaeka'Na Allata'ala, siagang Napa'jari kammai pepe' palayang-palayanNa.”

⁸ Mingka mae ri anjo Anaka, Nakana Allata'ala, “Empoang kala'biranNu, o Allata'ala, lasa'genna satunggu-tungguna! PamarentahanNu, iamintu pamarentahang adele'.

⁹MangngaiKo ri kaadelanga, birisikKo ri kajekkonganga; iaminjo saba'na, naNapileKo Allata'ala, iamintu Allata'alaNu, na Nasareko kalompoang, langngeranga karannuang, la'bianganga na agang-aganNu.”

¹⁰ Nakana pole Allata'ala, “Ikau Batara, uru-uru ampa'niaki buttaya siagang KalenNu ampareki langika.

¹¹Yangasenna anjo lalanynyaki, la'jari sanrapangi pakeang toa mingka Ikau talamminrayaKo.

¹²LaNulappaki anne linoa sanrapang baju siagang laNusambei maraengannaya. Mingka Ikau tena le'bakaKo lamamminra siagang tena kala'busanna tallasa'Nu.”

¹³ Tena le'bakai Allata'ala akkana kamma anne mae ri se'reang malaeka', “Maeko ammempo ri sa'ri kanangKu,[1] sa'genna Kusuro ngaseng akkulantu' sikontu musunnu ri dallekannu.”

¹⁴Jari punna kamma, apai sikontutojenna anjo malaeka'-malaekaka? Anjo ke'nanga, iamintu roh-roh allayaniai Allata'ala, siagang nisuroa ri Allata'ala antulungi sikontu tau lannarimaya kasalamakkang.