Read Makassar Version – KITTA' MATANGKASA IBRANI 10 Bible Online

IBRANI 10 - Makassar Version – KITTA' MATANGKASA bible

IBRANI 10

¹Anjo hukkung agama Yahudia, poro pangngebarang bawang mae ri katte ri apa-apa baji' labattua; teaipi sitojennaya ri anjo passalaka. Taung-taungi tuli sakamma-kammana anjo koro'bang nipassareanga. Jari, antekamma batena lakkulle anjo hukkung kammaya siagang koro'bang kammaya ampasukkuki tangkasa'na tau battua anynyomba mae ri Allata'ala?

²Ebara' angkana le'ba' tojeng-tojemmi nitangkasi battu ri dosaya anjo tau anynyombaya ri Allata'ala, tantu tenamo nasa'ring nadoraka kalenna ke'nanga. Siagang tantu tenamo naparallu taua assare koro'bang.

³Mingka ma'nassami angkanaya anjo koro'bang nipassareanga taung-taung ampakaingaki ke'nanga ri dosa-dosana.

⁴Nasaba' tena memang nakkulle anjo cera' sapia siagang cera' bembe lakia ampa'lanynyaki dosaya.

⁵ Iaminjo saba'na na ri wattunna antama' Almasi ri linoa, Nakana mae ri Allata'ala, “TaerokaKi' ri koro'banga siagang passarea; mingka appasadia maKi' tubu untu' iNakke.

⁶TaKingaiai koro'bang nitunua yareka koro'bang untu' ampammopporangai dosaya.

⁷Nampa Kukana, ‘INakkemi anne, O, Allata'ala BattuMa' untu' anggaukangi erotTa, situru' apa tattulisika lalang ri Kittaka ri sesena BatangkalengKu.’ ”

⁸Uru-uruna Nakana Almasi, “TaerokaKi' ri koro'banga siagang passarea; taKingaiai koro'bang olo'-olo' nitunua siagang koro'bang untu' ampammopporangai dosaya.” Akkana kammami anjo Almasi, manna pole nanipassareang anjo sikontu koro'banga situru' hukkung-hukkung agama Yahudia.

⁹Le'baki anjo Nakanamo Almasi, “INakkemi anne, o Allata'ala! BattuMa' untu' anggaukangi erotTa.” Jari Napela'mi Allata'ala anjo koro'bang salloa, nampa Nasambei siagang koro'bang KalenNa Almasi.

¹⁰Le'ba'mi Nagaukang Isa Almasi apa Nakaerokia Allata'ala, na Napassareang KalenNa a'jari koro'bang. Poro sikaliji bawang Nagaukang untu' satunggu-tungguna, na nitangkasimo dosa-dosata ngaseng.

¹¹ Sikamma imang Yahudia massing nagaukangi jama-jamang allo-allona; siagang a'mole-molei assare koro'bang natuli sangkammanaja anjo koro'bang napassareanga. Mingka sikamma anjo koro'banga tena sikali nakkulle natangkasi dosaya.

¹² Na Almasi, poro se'reji bawang koro'bang Napassareang untu' ampammopporangi dosa-dosata; anjo koro'banga a'matu-matumi sa'genna satunggu-tungguna. Le'baki Napassareang Almasi anjo koro'banga ammempomi ri sa'ri kananNa Allata'ala, ammarenta siagang Allata'ala.

¹³Na kamma-kamma anne attayammi Almasi, sa'genna Nasuro Allata'ala musu-musunNa anynyomba ri dallekanNa.

¹⁴Jari, tete ri se'rea koro'bang, Napasukku'mi Almasi matangkasa'na sikamma taua battu ri dosaya.

¹⁵Ri anjo passalaka a'jari sa'bi tommi RohNa Allata'ala mae ri katte. Nakana RohNa Allata'ala,

¹⁶ “ ‘Iaminne parjanjiang laKupareka siagang ke'nanga ri allo-allo labattua, laKuboliki hukkung-hukkungKu lalang ri atinna ke'nanga siagang laKutulisiki lalang ri pikkiranna ke'nanga.’ ”

¹⁷ Nakana pole Allata'ala, “LaKukaluppaimi dosa-dosana siagang sikamma kaja'dallanna ke'nanga.”

¹⁸Jari, le'ba'mi nipammopporang anjo dosa-dosaya siagang sikamma kaja'dallanga; jari tenamo naparallu pole nipassareang koro'banga untu' nipammopporanna dosaya.

¹⁹Jari sari'battangku ngaseng, kamma-kamma anne barani maki' antama' ri Kamara' Kaminang Matangkasaka, lanri kamateanNa Isa.

²⁰Le'ba' maki' Nasungkeang Isa se're oloang beru, iamintu oloang assarea katallassang. Anjo oloanga iamintu battu ri gordenga, iamintu BatangkalenNa Isa.

²¹Na kamma-kamma anne nia'mo imang lompota, anjagayai Balla'Na Allata'ala.

²² Lanri kammana, mae mako nakia'reppese' ri Allata'ala siagang tulusu' pa'mai' kammayatompa tappa' majarre'; siagang pa'mai' le'baka nitangkasi battu ri kasalanga, kammayatompa tubu le'baka nitangkasi je'ne' maci'nong.

²³Paralluko anna'gala' jarre' mae ri panrannuang le'baka nimangakui, nasaba' tappakki' angkanaya laNarupai janjinNa Allata'ala.

²⁴Siagang paralluki' massing sijampangi; sollanta akkulle sipakainga' tojeng-tojeng anggaukangi apa-apa bajika, kammayatompa mangngamaseanga ri paranta tau.

²⁵Teako takkaluppai tuli a'rappungang, sangkamma tau maraenga. Ikatte paralluki' la'bi tamalanre massing sipakajarre'; nasaba' niassengi angkanaya tasalloami Nabattu poleang Batara.

²⁶Nasaba' punna le'ba'mo nipabattu biritta tojenga battua ri Allata'ala mae ri katte, mingka tuli nipakkunjungianna nigaukang dosaya, tenamo koro'bang lakkulle antangkasi dosata.

²⁷ Se're mami sadia untu' ikatte, iamintu andallekanga mae ri pangadelanNa Allata'ala siagang pepe' pangngalarroiNa, lantunuai sa'genna la'busu' tau mangngewaya ri Allata'ala!

²⁸ Tau tenaya namannuruki ri hukkung napassareanga Musa musti nihukkung matei, punna rua tallumo tau a'jari sa'bi ma'nassana salai.

²⁹ Teaimi sipato' la'bi battala'na musti hukkunganna tau angngonjo'-ngonjokangai Ana'Na Allata'ala. Napakatunai cera' passijanjianNa Allata'ala, iamintu kamateanNa Almasi antangkasiai dosana. Nahinai Roh assarea passare malammoro'.

³⁰ Ikatte niassengi inai anjo angkanaya, “La'balasakA'! LassareA' hukkungang!” kammayatompa angkanaya, “LaNaadeli Batara Umma'Na.”

³¹Teai sipato' appakamalla'na punna tu'guru' taua antama' ri limanNa Allata'ala Mattallasaka!

³²U'rangi antekamma lampa-lampana katallassannu ngaseng ri wattu allaloa. Anjo wattua, ri wattunnu Nasiori cayaNa Allata'ala, teai sipato' jaina pa'risi'nu; mingka tuli majarrekko attahang siagang akkareso.

³³Nia' wattunna nunihina siagang nigau' takamma-kamma ri dallekanna tau jaia. Nia' todong wattunna numminawang todong ampisa'ringi sessana tau nigau' kammaya.

³⁴Siagang amminawang tongko ampisa'ringi si'nana tau nitarungkua. Siagang ri wattunna nialle passa apa-apannu, nupassareangi siagang sannang pa'mai'. Nasaba' nuassengi angkanaya nia' ijapa ri kau apa la'bi bajikanganga, akkullea attahang sa'genna satunggu-tungguna.

³⁵Lanri kammana, teako tappu' panrannuangngi. Nasaba' punna jarre' tappa'nu, nia' pahala lompo untu' ikau!

³⁶Paralluko sa'bara', sollanna akkulle nugaukang ero'Na Allata'ala. Na lanri kammana lanutarimai apa Napa'janjianga Allata'ala.

³⁷ Nasaba' nia' tattulisi' lalang ri Kittaka angkanaya, “Sinampe' mami nalania'mo battu Ia lalintaka battu; talaNapamonokami wattu kabattuanNa.

³⁸Na ia ummakKu annabaya latappa'mi siagang lattallasa'mi; mingka punna nia' ri ke'nanga lammono'boko, tasannangai pa'maikKu mae ri ia.”

³⁹Ikatte anne teaiki' umma' ammono'bokoa siagang sala oloanga. Mingka ikatte umma' matappakki' mae ri Allata'ala siagang nipasalamaka ri Allata'ala.