Read Makassar Version – KITTA' MATANGKASA IBRANI 11 Bible Online

IBRANI 11 - Makassar Version – KITTA' MATANGKASA bible

IBRANI 11

¹Tappa' battuanna matappa' tojeng-tojeng mae ri apa-apa nirannuanga; battuanna mattantumi panrannuanta ri apa-apa tanicinika.

²Nasaba' lanri tappa'na, naningaimo ri Allata'ala tau ri jammang rioloa.

³ Lanri tappatta, nanipahammo angkanaya anne linoa nipa'jari battu ri KananNa Allata'ala; jari, apa-apa akkullea nicini', kajariang battu ri apa-apa takkullea nicini'.

⁴ Lanri tappa'na, nanapassareang Habel koro'banga mae ri Allata'ala, iamintu koro'bang bajikanganga na koro'bang napassareanga Kain. Lanri ia anjo tappa'na, nanitarimamo Habel ri Allata'ala a'jari tau baji'; nasaba' ma'nassami angkana nitarimai ri Allata'ala koro'banna. Matemi Habel, mingka lanri anjo tappa'na, tuli a'bicarana ija sa'genna kamma-kamma anne.

⁵ Lanri tappa'na, natamateamo Henokh; passangalinna niangkaki siagang nierangi mae ri Allata'ala. Tena manna sitau akkulle ambuntuluki, lanri niangka'mi ri Allata'ala. Nia' tattulisi' lalang ri Kittaka angkanaya ri tenanapa niangkaki Henokh, le'ba'mi napakasannang atinNa Allata'ala.

⁶Takkulleai taua ampakasannangi atinNa Allata'ala, punna tena natappa' ri Allata'ala. Nasaba' inai-nai battu mae ri Allata'ala, musti tappaki angkanaya ma'nassa nia' Allata'ala, kammayatompa angkana laNasarei pa'balasa' Allata'ala sikamma tau amboyayai.

⁷ Lanri tappa'na nanatarimamo Nuh pappakainga' Napassareanga Allata'ala mae ri ia; iamintu passala'na apa-apa lakajarianga tenaya nakkulle nacini' Nuh. Naturukimi Nuh kananNa Allata'ala. Jari appare'mi se're biseang lompo. Nama'nassa iaminjo biseang lompoa ampasalamaki kalenna siagang pole sikamma ana'na siagang tubai'-bainena. Jari nihukkummi linoa, mingka Nuh nipattojemmi ri Allata'ala nikana tau baji' lanri tappa'na.

⁸ Lanri tappa'na, naturukimi Abraham ero'Na Allata'ala ri wattunna nikio' siagang nisuro ri Allata'ala a'lampa mange ri pa'rasangang Napa'janjianga Allata'ala mae ri ia. A'lampami Abraham manna natanaassenga pa'rasangang lanatujua.

⁹ Lalang tappa'na ammantammi Abraham ri anjo pa'rasangang Napa'janjianga Allata'ala, a'jari kamma tu battu-battu. Ammantangi Abraham anjoreng, lalang ri kema napareka. Kamma tomminjo Ishak siagang Yakub, le'baka todong antarimai anjo janji kammaya battu ri Allata'ala.

¹⁰Nasaba' natayangi Abraham kota eroka Nabangung Allata'ala irate ri pammentengang majarreka.

¹¹ Lanri tappa'na Abraham, nakkullemo angappa ana' battu ri Sara, manna pole natoa dudumo Abraham, siagang natamanang pole Sara. Tappaki Abraham angkanaya ma'nassa laNarupai janjinNa Allata'ala.

¹² Manna pole nakanamo tulamate duduamo kalenna Abraham anjo wattua, mingka battu ri iami ammumba jaia sossorang, tenaya nakkulle nibilang jaina — sanrapanga bintoeng ri langi' yareka kassi' ri biring tamparang jaina.

¹³ Sikamma anjo ke'nanga tappa' ngasengi sa'genna mate. Tenapa natarimai ke'nanga anjo apa-apa Napa'janjianga Allata'ala, mingka poro nacini' bellaji ri pa'mai'na ke'nanga siagang panrannuang. Nalalang kammana anjo napappicinikammi ke'nanga angkanaya poro tau battu-battuji ke'nanga ri anne linoa.

¹⁴Sikamma tau akkana kammaya napakasingara' baji'mi angkanaya a'boyai ke'nanga pa'rasangang lanapa'jaria butta pa'rasanganna ke'nanga.

¹⁵Teai anjo pa'rasangang le'baka nabokoi nanawa-nawa ke'nanga. Nasaba' punna kamma, jaimi kasampatanna ke'nanga untu' lammotere' ri anjo pa'rasanganga.

¹⁶Mingka ma'nassami angkanaya nakkuki ke'nanga ri se'reang pa'rasangang la'bi bajika, iamintu pa'rasangang niaka ri suruga. Lanri kammana minjo natena nasiri'-siri' Allata'ala nikio' Allata'ala ri ke'nanga. Nasaba' le'ba'mi Napasadiang Allata'ala ke'nanga se're kota untu' ke'nanga.

¹⁷ Lanri tappa'na todong, nanapassareammo Abraham ana'na, iamintu Ishak, a'jari koro'bang, ri wattunna niso'ri tappa'na ri Allata'ala. Le'ba'mi nijanji Abraham ri Allata'ala mingka narellakang tonji Abraham anjo ana' sitau-taua.

¹⁸ Le'baki angkana Allata'ala mae ri Abraham, Nakana, “Battu ri iaminne Ishak lanugappa sossorang le'baka Kupa'janjiang mae ri kau.”

¹⁹Tappaki Abraham angkanaya koasai Allata'ala ampattallasa' poleangi Ishak battu ri kamateanga — jari akkulle nikana natarimami Abraham ammotere' Ishak battu ri kamateanga.

²⁰ Lanri tappa'na, nanapa'janjiammo Ishak sikamma barakkaka mae ri Yakub siagang Esau untu' allo ri boko.

²¹ Lanri tappa'na, na ri tenanapa namate Yakub, nabarakkakimi ana'-ana'na Yusuf, ri wattunna napatanjeng kalenna ri ulu takkanna nanynyomba ri Allata'ala.

²² Lanri tappa'na, na ri wattunna la'birimmo mate Yusuf, nanapau riolomo angkanaya lassulu'mi ammotere' umma' Israel battu ri butta Mesir; kammayatompa ammoli'mi pasang angkanaya lanipaanteikamma sallang maya'na punna matei.

²³ Lanri tappa'na, nanicokkomo Musa ri tau toana tallum bulang sallona ri wattunna beru nilassukang. Niciniki ri tau toana angkanaya sanna' ga'gana anjo anaka, siagang tena namalla' ke'nanga ambalang parekangi parentana karaenga.

²⁴ Lanri tappa'na, na ri wattunna lompomo Musa, taerokai nikana ana'na ana' tubainena karaeng Mesir.

²⁵Nangaiangangi angkasiaki sessaya siagang umma'Na Allata'ala naia angkasiaki kasannanganga poro untu' sinampekang lalang ri katallassang kadorakanga.

²⁶Naassengi Musa angkanaya la'bi lompoangangi anggaranna nipakatunaya lanri Karaeng Mappasalama' Napa'janjianga Allata'ala, naia anggappaya sikamma kakalumanynyangang battu ri butta Mesir; nasaba' pahala untu' allo ri bokoa narannuang Musa.

²⁷ Lanri tappa'na, natamallakamo Musa ri pangngalarroinna karaenga nanabokoi butta Mesir. A'lampami Musa mange ri tampa' lanatujua sangkamma le'ba' angkanaya le'ba'mi nacini' anjo Allata'ala tenaya nakacinikang.

²⁸ Lanri tappa'na nappare'mo Passua'-suarrang untu' Allo Kalappassang; siagang nasuro ba'basa'mi cera' olo'-olo' sikamma tompo' pakke'bu'na tu Israelka, sollanna tanibunoa ana' bungasa'na ke'nanga ri Malaeka' Paalle Nyawaya.

²⁹ Lanri tappa'na, nakkullemo tu Israelka a'limbang ri Tamparang Ejaya, sangkamma le'ba' angkana irateji ri butta kalotoroka a'jappa ke'nanga. Naia tu Mesirka nia'lu'mi ri anjo tamparanga, ri wattunna nacoba todong ke'nanga a'limbang.

³⁰ Lanri tappa'na tu Israelka, naruntummo sikamma tembo'-tembo'na kota Yerikho ri wattunna le'ba' nainroi ke'nanga tuju allo sallona anjo tembo'-tembo'na kotaya.

³¹ Lanri tappa'na todong, natanibunoa todong anjo baine pasundala' niarenga Rahab, siagang sikamma tau angngewayai Allata'ala; nasaba' natarima bajiki mata-matana tu Israelka.

³² Jari, akkullei jai pole lakubicara, mingka tagannakkai wattungku. Nasaba' tenapa nakurapiki kupau Gideon, Barak, Simson, Yefta, Daud, Samuel, siagang na'bi-na'bia.

³³ Lanri tappa'na ngaseng ke'nanga, nanabetamo sikamma karaeng ammarentaya. Nagaukangi ke'nanga apa-apa tojenga, sa'genna natarimamo apa Napa'janjianga Allata'ala. Natongkoki ke'nanga bawana singa-singaya,

³⁴ nabunoi pepe' lompoa, tassalai ke'nanga battu ri pattobo' pa'danga. Tena kagassinganna ke'nanga, mingka a'jari kassaki; porei ke'nanga lalang ri pa'bundukanga sa'genna nabeta ngaseng pasukang bansa maraenga.

³⁵ Lanri tappa'na sikamma tubainea nanagappamo ammotere' sikamma taunna le'bakamo mate. Nia' tommo ampassareangi kalenna nisessa sa'genna mate; taerokami nilappassang, lanri ero'na nipattallasa' poleang nanagappa katallassang la'bi bajikanganga.

³⁶ Nia' nicau-cau, nicambo', nisikko' rante nampa nipantama' ri tarungkua.

³⁷ Nia' nisambilai batu sa'genna mate, nia' nisamballe siagang garagaji, kammayatompa nibuno siagang pa'dang. Mange-mangei a'lampa ke'nanga ammakeang kukkulu' gimbala' yareka kukkulu' bembe; kasi-asi tallasa'na ke'nanga, nigau' takamma-kammai siagang nisessai.

³⁸Anne linoa teai tampa' siratang mae ri ke'nanga. Mangei ri parang lompoa ke'nanga siagang bulu'-buluka, nammantang lalang ri kali'bong batua yareka kali'bong buttaya.

³⁹Teai sipato' lompona pammetang nagappaya ngaseng anjo taua lanri tappa'na ke'nanga! Mingka tenapa natarimai anjo apa Napa'janjianga Allata'ala;

⁴⁰nasaba' nia' ero' Nagaukang Allata'ala mae ri katte, ia la'bi bajikanganga. Ia eroka Nagaukang iamintu punna tena nasipa'rurungang ke'nanga siagang ikatte, takkulleai ke'nanga a'jari sukku' baji'na.