Read Makassar Version – KITTA' MATANGKASA IBRANI 3 Bible Online

IBRANI 3 - Makassar Version – KITTA' MATANGKASA bible

IBRANI 3

¹Sikamma sari'battangku, parangku tu Karisteng, nikioka tommo ri Allata'ala! Alle sai pikkiri' baji'-baji' anne ri sesena Isa! Nisuromi ri Allata'ala untu' a'jari Imang Malompo lalang ri agamata.

² Tamalanreai mae ri Allata'ala, le'baka ampilei untu' anggaukangi anjo jama-jamanga; sangkamma todong Musa riolo, tamalanreai anggaukangi jama-jamanna ri Balla'Na Allata'ala.

³Mingka siratangi Isa anggappa kala'birang malompoanganga na Musa. Nasaba' musti la'bi lompoangangi kala'birang nagappaya anjo tau ambangunga balla', kala anjo ballaka.

⁴Memang, tasse're-se'rea balla' tantu nia' ambangungi; mingka anjo ambangungai sikontu-kontua, iamintu KalenNa Allata'ala.

⁵Tamalanreai Musa a'jari palayang lalang ri Balla'Na Allata'ala siagang ampabattui apa-apa laNapa'nyataya Allata'ala sallang ri allo labattua.

⁶Mingka tamalanreai Isa salaku Ana' antanggongiai amparakai Balla'Na Allata'ala. Na ikattemi anne sanrapang Balla'Na Allata'ala, punna tuli lompona sumangatta siagang tuli tappatta angkanaya tena tanigappana anjo apa niminasaia.

⁷ Lanri kammanami anjo, sangkamma Napaua RohNa Allata'ala, “Punna nulangngere' sa'ranNa Allata'ala anne alloa,

⁸teako tamappilangngeri, sangkamma boe-boenu riolo, ri wattunna nabali siagang naso'ri ke'nanga Allata'ala ri parang lompoa.

⁹Nakana Allata'ala, ‘AnjoremMa' naso'ri siagang nauji boe-boenu, manna pole nacini'mi ke'nanga apa le'baka Kugaukang patampulo taung sallona.’

¹⁰Iaminjo saba'na naKularro siagang Kukana mae ri ke'nanga, ‘Tuli mamminra-minrana ke'nanga, siagang tuli teana anturuki parentaKu.’

¹¹LarroMa' siagang assumpaMa' Kukana, ‘Talantamakkai ke'nanga ri anjo pa'rasanganga untu' sipammari-mariang siagang iNakke!’ ”

¹²Sikamma sari'battangku, tutu laloko, gassingka niakko kalase'rennu sanna' ja'dala'na pa'mai'na siagang tena natappa', sa'genna a'boko siagang napakabella kalenna battu ri Allata'ala assarea katallassang!

¹³Jari sollanna tena manna sitau ri tangnga-tangnganu nitipu ri dosaya sa'genna tamappilangngeria ri Allata'ala, paralluko allo-allonu sipakainga' ilalang attallasatta ija ri anjo jammang napakkanaia Kittaka “Anne Jammanga”.

¹⁴Ikatte anne bela sipanjama-jamanna ngasengki' Almasi, assala' tuli nita'gala' jarreki katappakkang niaka ri katte battu ri uru-uruna sa'genna kala'busang.

¹⁵ Iaminne tattulisika lalang ri Kittaka, angkanaya, “Punna nulangngere' sa'ranNa Allata'ala anne alloa, teako tamappilangngeri sangkamma boe-boenu riolo, ri wattunna nabali Allata'ala.”

¹⁶ Jari, inaika anjo tau allangngerekai sa'ranNa Allata'ala nampa nabali Allata'ala? Sai yangasemmi anjo tau le'baka napimping Musa assulu' battu ri butta Mesir?

¹⁷Siagang inaika Nakalarroi Allata'ala patampulo taung sallona? Sai iami anjo ke'nanga dorakaya siagang matea ri parang lompoa?

¹⁸Ri wattunna assumpa Allata'ala Nakana, “Talantamayai ke'nanga ri tampa' pammari-mariangKu, sipammari-mariang siagang iNakke,” maka inai nataba anjo kananNa Allata'ala? Sai iami anjo tau ambaliai Allata'ala nataba?

¹⁹Kamma-kamma anne nipahammi angkanaya takkulleai ke'nanga antama', lanri tenana natappa' ke'nanga mae ri Allata'ala.