Read Makassar Version – KITTA' MATANGKASA IBRANI 4 Bible Online

IBRANI 4 - Makassar Version – KITTA' MATANGKASA bible

IBRANI 4

¹Anjo janjinNa Allata'ala napajappa iji, na laNasareki' tampa' untu' pammari-mariang Napa'janjianga. Jari paralluki' tutu sollanna tena manna sitau battu ri kau ngaseng talanggappayai anjo pammari-mariang nipa'janjianga.

²Nasaba' sangkamma mae ri ke'nanga, anjo Kabara' Bajika le'ba'mi nibirittakang mae ri katte. Mingka tena matu-matunna nipabattu anjo birittaya mae ri ke'nanga. Nasaba' tena natappa' ke'nanga ri wattunna nalangngere' anjo birittaya.

³ Mingka ikatte tau tappaka, lanigappai anjo tampa' pammari-mariang Napa'janjianga Allata'ala. Anne sicoco'mi siagang apa le'baka Napau Allata'ala, angkanaya, “LarroA' siagang assumpA', angkana talantamayai ke'nanga ri tampa' pammari-mariangKu sipammari-mariang siagang iNakke!” Akkana kammami anjo Allata'ala manna pole riolo iji naNapa'le'ba'mo jama-jamanNa, iamintu ri wattunna Napa'jari anne linoa.

⁴ Nasaba' ri passala'na allo makatujua, nia' tattulisi' lalang ri Kittaka angkanaya, “Ri makatujuna alloa ammari-marimi Allata'ala battu ri sikontu jama-jamanNa.”

⁵ Ri anne passalaka nia' pole tattulisi' angkanaya, “Talantamayai ke'nanga ri tampa' pammari-mariangKu sipammari-mariang iNakke.”

⁶Jari anjo ke'nanga uru-uru allangngerekai anjo Kabara' Bajika, talanagappayai tampa' pammari-marianga, lanri tenana natappa' ke'nanga. Jari punna kamma, ma'nassami angkanaya nia' tau maraeng akkulle anggappai anjo tampa' pammari-marianga.

⁷ Nasaba' le'ba'mi Napattantu Allata'ala se'reang allo maraeng pole, ia nikanaya, “Anne Alloa.” Attaung-taung ribokoanganna Nabicarai Allata'ala anjo passalaka tete ri Daud, iami antu lalang aya' le'bakamo nipau sumpadeng, angkanaya, “Punna nulangngere' sa'ranNa Allata'ala anne alloa, teako tamappilangngeri.”

⁸ Punna ebara' angkana le'ba'mi naerang Yosua anjo taua antama' ri tampa' pammari-mariang Napa'janjianga Allata'ala, tenamo Nala'bicara pole Allata'ala ri passala' se'reang allo maraeng.

⁹Jari, untu' Umma'Na Allata'ala nia' ija janji untu' lammari-mari sangkamma ammari-mariNa Allata'ala ri anjo allo makatujua.

¹⁰ Nasaba' anjo tau antamaya ri tampa' pammari-mariang Napa'janjianga Allata'ala ri ia, lammari-mari tommi battu ri sikontu jama-jamanna, sangkamma Allata'ala.

¹¹Lanri kammana, mae mako nakiattojeng-tojeng usaha untu' antama' ri anjo tampa' pammari-mariang Napa'janjianga Allata'ala. Teako niakki manna sitau tanggappaya sangkamma ke'nanga riolo, lanri tenana natappa' mae ri Allata'ala.

¹²Anjo kananNa Allata'ala, iami kana-kana assarea katallassang siagang kagassingang; la'bi tarangi na pa'dang tarang pimbalia. Anjo kana-kanaya anno'doki sa'genna antama' ri atia siagang nyawaya; narapiki pa'leso-lesoanga siagang buku-bukua, sa'genna naasseng ngaseng pikkiranna siagang nawa-nawanna rupataua.

¹³Tenanniakka manna sirupa apa-apa attallasa' lakacokkoang ri paccini'Na Allata'ala. Sikontu-kontuna lakacinikang ngasengi siagang latassungke ngasengi ri dallekanNa. Siagang musti latanggong-jawa' ngaseng maki' mae ri Ia.

¹⁴Iaminjo saba'na kimusti anna'gala' jarre' mae ri pangakuang katappakkanta. Nasaba' nia' Imang Malompota, le'bakamo antama' sa'genna ri dallekanNa Allata'ala — iamintu Isa, Ana'Na Allata'ala.

¹⁵Anjo Imang Malompota teai imang tenaya nakkulle amminawang angkasiaki kapa'risanta. Passangalinna, le'ba' tommi Nataba paccoba lalang a'rupa-rupa passala', sangkamma todong massing-massing ikatte; iaji bawang tena Nagaukangi dosaya!

¹⁶Lanri kammana, mae mako nakipa'baraniang kalenta andallekang ri Allata'ala, baji' pa'maika ammarenta. LaNakamaseangki' siagang laNabarakkakiki' Allata'ala sollanta akkulle anggappa pannulung ri sitabanna le'ba' wattunna.