Read Makassar Version – KITTA' MATANGKASA IBRANI 5 Bible Online

IBRANI 5 - Makassar Version – KITTA' MATANGKASA bible

IBRANI 5

¹Massing-massing imang lompoa nipilei battu ri tangnga-tangngana ummaka, na niangka' a'jari wakkele'na ke'nanga untu' allayani mae ri Allata'ala. Jama-jamanna iamintu angngerangangi Allata'ala sikamma passare lanipabattua siagang sikamma koro'banga sollanna nipammopporang dosa-dosaya.

²Kalenna anjo imang lompoa jai tongi kakurangnganna; mingka lanri kammanami anjo nakkullemo a'jari tuna pa'mai' mae ri tau tenaya apa-apa naasseng siagang tau sala oloanga ri jappana.

³ Na lanri kalenna jai tongi kakurangnganna, jari musti assaremi koro'bang; teai lanri dosa-dosana bawang ummaka, mingka lanri dosa-dosa kalenna pole.

⁴ Tenanniakka manna sitau angngangkaki kalenna a'jari imang lompo. Iapa nakkulle a'jari imang lompo taua, punna KalenNa Allata'ala angkioki — sangkamma ri nikio'na Imang Harun.

⁵ Kamma tomminjo Almasi. Teai Ia angngangkaki KalenNa a'jari Imang Malompo. Mingka KalenNa Allata'ala angngangkaki. Nakana Allata'ala mae ri Ia, “IKau AnakKu; anne alloa iNakke a'jari Bapa'Nu.”

⁶ Ri tampa' maraengannaya Nakana pole Allata'ala, “IKaumi Imang sa'genna satunggu-tungguna, sangkamma Imang Melkisedek.”

⁷ Ri wattunna attallasa' Isa ri anne linoa, akkio' lompoi siagang angngarruki appala' doang mae ri Allata'ala, akkullea ampasalamaki battu ri kamateanga. Na lanri tunduki siagang Napakalompoi Allata'ala, nipilangngerimi pappala'Na.

⁸Isa Iami Ana'Na Allata'ala; mingka manna nakamma, appilajara'mi a'jari tu mappilangngeri lalang ri kapa'risanNa.

⁹Jari ri le'ba'namo nipa'jari Tumappasalama', a'jarimi patteteang kasalamakkang mannannungang mae ri sikamma tau mannurukia ri Ia;

¹⁰kammayatompa nipa'nyatami ri Allata'ala angkana Iami a'jari Imang Malompo, antamaya sangkamma Imang Melkisedek!

¹¹Ri sesena anjo empoanna Isa a'jari Imang Malompo, jai parallu napabattu ikambe mae ri kau ngaseng; mingka sukkaraki lanipakasingara', nasaba' sallo dudui nampa akkulle nupahang.

¹² Sikontutojenna narapi'mi wattunnu la'jari guru; mingka ma'nassa parallu ijako appilajara' mae ri tau maraenga ri passala'na poko'-poko' pangngajaranNa Allata'ala. Takkullea pako nisare kanre terasa'; parallu ijako angnginung dadi'.

¹³Inai-nai angnginung ija dadi', sanrapang ana' lolo iji; tenapa pangalamanna ri passala'na nikanaya apa tojeng yareka apa sala.

¹⁴Anjo kanre terasaka untu' tau toaya; nasaba' lanri nia'namo pangalamanna akkullemi naasseng angkana kereanga baji' siagang kereanga kodi.