Read Makassar Version – KITTA' MATANGKASA IBRANI 6 Bible Online

IBRANI 6 - Makassar Version – KITTA' MATANGKASA bible

IBRANI 6

¹Lanri kammana, mae mako nakimaju ri pappilajarang-pappilajarang ribokoangannaya pole, iamintu ri passala'na kajarrekanna katallassang Karistenga. Teako tuli poko' pangngajarang rioloa bawang nuparhatikang. Tea' maki' ammoteri pole mange ri pappilajarang uru-urua, iamintu angkanaya musti ammari taua anggaukangi apa-apa tenaya matu-matunna, siagang musti tappakki' mae ri Allata'ala;

²yareka pappilajarang uru-urua ri passala'na pa'je'nekanga yareka appatompanga lima irateanganna taua untu' ambarakkaki; yareka ri passala'na attallasa' poleanga ammotere' battu ri kamateanga siagang hukkungang satunggu-tunggua.

³Punna nia' pangngellaiNa Allata'ala, mae mako nakimaju mange ri pappilajarang-pappilajarang la'bi lompoanganga!

⁴Nasaba' tenamo olona lanirurungang ammotere' tau ammono'bokoa. Riolo nia'mi ke'nanga lalang ri kasingaranNa Allata'ala, siagang nakasia'mi passareNa. Kammayatompa amminawang tommi ke'nanga nikoasai ri RohNa Allata'ala.

⁵Naassemmi battu ri pangalamanna ke'nanga angkanaya bajiki anjo kananNa Allata'ala, siagang natarimami ke'nanga passare malammoro' makoasa untu' jammang labattua.

⁶Mingka le'baki anjo, ammono'bokomi ke'nanga! Antekamma batena laniulu toba' poleang ke'nanga battu ri dosa-dosana? Nasaba' nasalli' poleammi ke'nanga Ana'Na Allata'ala nanihina-hina ri dallekanna tau jaia.

⁷Anjo butta masarroa annarima je'ne' bosi, nampa angngerang wassele' lamung-lamung kabajikang mae ri tau akkaresoa, Nabarakkaki Allata'ala.

⁸ Mingka punna rea siagang ruku'-ruku' akkatinting wassele'na anjo buttaya, tenamo matu-matunna anjo buttaya siagang lanitunrai sallang ri Allata'ala nampa ri kala'busanna lanitunui sa'genna la'busu'.

⁹Mingka sikamma sari'battang kukarimangngia! Manna anjo kikkana kamma tappakki' angkanaya le'ba'mi nutarima sikamma barakka' la'bi bajikanganga, iamintu bageang kasalamakkannu.

¹⁰Anjo Allata'ala teai Allata'ala tangngassenga adele'. TaNakaluppaiyai apa-apa le'baka nugaukang mae ri Ia siagang pangngamaseang le'baka nupappicinikang mae ri Ia ri wattunna nutulung sikamma julu tappatta, baji' na riolo, yareka na ri kamma-kammaya anne.

¹¹Kikellai sollanna tuli massing lompo sumanga'nu sa'genna kala'busang, sa'genna akkulle nutarima anjo apa-apa numinasaia.

¹²Tena kikellaiko a'jari malasa'. Mingka kikellaiko sollannu attallasa' sangkamma tau antarimayai apa Napa'janjianga Allata'ala, lanri tappa'na mae ri Ia, siagang lanri sa'bara'na attayang.

¹³Ri wattunna a'janji Allata'ala mae ri Abraham, assumpai angkanaya laNarupai anjo apa Napa'janjianga. Nasaba' tenamo tinggiangang na Allata'ala, jari assumpami lalang areng KalenNa.

¹⁴ Nakana Allata'ala, “A'janjiA' angkana laKubarakkakiko siagang laKupa'jari sannaki jaina sossorannu.”

¹⁵Attayammi Abraham siagang sa'bara', sa'genna natarimamo anjo apa Napa'janjianga Allata'ala mae ri ia.

¹⁶Punna nia' tau assumpa, areng tumaraeng la'bi tinggianganga napau, sa'genna akkullemo napa'le'ba' pa'geakkanna ri passabakkang anjo sumpaya.

¹⁷Eroki Napakajarre' janjinNa Allata'ala mae ri sikamma tau Najanjia angkanaya talaNapinrayai janjinNa. Iaminjo saba'na naNapirurungi sumpa anjo janjinNa.

¹⁸Anjo ruaya passala' takkulleai lamminra; tena olona la'balle-balle Allata'ala ri janjinNa siagang sumpaNa! Lanri kammana, ikatte tau a'la'langamo irawanganNa Allata'ala, nikellaiki' anna'gala' jarre' mae ri panrannuang niaka ri dallekanta.

¹⁹ Anjo panrannuanta a'jari panna'galang majarre' siagang amang mae ri katallassanta, nasaba', lanri sanna' lantanna nipatto' naung. Pappokokanna niaki lalang Kamara' Kaminang Matangkasaka lalang ri Balla'Na Batara ri suruga.

²⁰ Le'ba'mi Nasungke Isa oloang mangea anjoreng ri tampaka untu' ikatte; siagang le'ba'mi antama' anjoreng a'jari Imang Malompota satunggu-tungguna lalang ri golonganna Imang Melkisedek.