Read Makassar Version – KITTA' MATANGKASA IBRANI 7 Bible Online

IBRANI 7 - Makassar Version – KITTA' MATANGKASA bible

IBRANI 7

¹ Anne Melkisedek karaeng battu ri Salem, siagang imang Kaminang Tinggina Allata'ala. Ri wattunna ammotere' Abraham battu ri pa'bundukanga nanabeta karak-karaeng balinnaya, battumi Imang Melkisedek anruppai siagang ambarakkaki.

²Jari napassareammi Abraham mae ri Melkisedek bage sampulona battu ri sikontu barang-barang naallea battu ri balinna. (Battuanna anne areng Melkisedek uru-uruna iamintu, “Karaeng Kaadelang”; siagang pole lanri ia karaeng battui ri Salem, jari battuanna pole anne arenna iamintu “Karaeng Kasalewangang”.)

³Ri sesena anne Melkisedek tena kasingaranna nipau angkanaya nia' manggena, yareka amma'na, yareka boe-boena; tena todong kasingarang ri passala' kalassukanna, yareka ri kamateanna. Ia sangkammai Ana'Na Allata'ala; iami imang satunggu-tunggua.

⁴Jari nicini'mi anrinni antekamma malompona anne Melkisedek; pammate malompona, sa'genna Abraham, iamintu boe-boena bansata, napassareangi mae ri ia bage sampulona anjo sikontu barang-barang nagappaya battu ri pa'bundukanga.

⁵ Ilalang ri hukkung agama Yahudia nia' nipattantu angkanaya musti angngallei imang-imang sossoranna Lewi bage sampulona panggappanna umma' Israel, iamintu sari'battang kalenna ke'nanga, manna pole para sossorannai Abraham.

⁶Melkisedek teai sossoranna Lewi, mingka annarima tongi bage sampulona battu ri barang-barang nagappaya Abraham, siagang nabarakkaki tongi Abraham, ia le'baka anggappa janji-janji battu ri Allata'ala.

⁷Memang takkulleai nisassali angkanaya la'bi rawangangangi tau nibarakkakia na ia tau ambarakkakiai.

⁸Anjo imang-imang annarimaya pa'bayara' bage sampulo, tau akkulle tonji mate. Mingka turu' ri Kittaka: Anjo Melkisedek annarimaya passare bage sampulo, tau tuli attallasa'na.

⁹Akkulle nikana anjo Lewi, annarimaya sossoranna bage sampulo battu ri umma' Israel, a'bayara' tongi tete ri Abraham mae ri Melkisedek.

¹⁰Manna natenapa nanilassukangi Lewi, mingka akkullei nikana nia'mi lalang ri kalenna Abraham, iamintu boe-boena, ri wattunna assigappa Melkisedek siagang Abraham.

¹¹Irawangang pimpinannai imang-imang Lewi nanipassareang hukkung agama Yahudia mae ri umma' Israelka. Lanri riolo, takkulleai nagaukang imang-imang Lewi sa'genna sukku' baji'na anjo jama-jamang musti nagaukanga ke'nanga, jari musti nia' imang maraeng, iamintu sangkammaya Imang Melkisedek; jari teaimi imang battu ri golonganna Harun.

¹²Jari, punna amminramo empoanna imang-imanga, musti amminra tommi hukkung-hukkung agama Yahudia.

¹³Ia nipakkanaya anrinni iamintu Batarata: Ia battu ri suku maraeng; tena le'bakapi nia' manna sitau battu ri sukuNa anggaukangi jama-jamang imanga.

¹⁴Sikontu rupataua naasseng ngasengi angkanaya battu ri suku Yehuda assala'Na Batarata; na tale'bakai nasero kana Musa anjo sukua ri wattunna nabicara passala'na imang-imanga.

¹⁵Anne apa nibicaraya a'jari pila' singara'mi pole, ri wattunna nia'mo battu sitau imang maraeng sangkamma Melkisedek.

¹⁶Niangkaki a'jari imang, teai lanri paratorang-paratoranna rupataua, passangalinna lanri makoasana ri tallasa'na siagang lanri tenana kala'busanna katallassanna.

¹⁷ Nasaba' nia' lalang ri Kittaka angkana, “Ikaumi imang sa'genna satunggu-tungguna, sangkamma Imang Melkisedek.”

¹⁸Jari, kamma-kamma anne nibokoimi paratorang salloa, lanri tena najarre' siagang tena matu-matunna.

¹⁹Takkulleai hukkung agama Yahudia ampa'jari sukkuki baji'na se'rea apa-apa. Lanri kammanami anjo nakinisaremo kamma-kamma anne panrannuang la'bi bajikanganga; iaminjo patteteang nakiakkulle a'reppese' mae ri Allata'ala.

²⁰Nampa pole, yangasenna anjo narurungangi sumpaNa Allata'ala. Tena sanrapanna anjo sumpaya, ri wattunna niangka' imang-imang maraenga.

²¹ Mingka Isa, ammakei sumpa ri wattunna niangka' a'jari imang, iamintu ri wattunna Nakana Allata'ala mae ri Ia, “Le'ba'mi assumpa Batara, siagang talamamminrayai ri kananNa, ‘IKaumi Imang satunggu-tungguna.’ ”

²²Lanri iatommi anne na'jarimo Isa panjarreki ri janji la'bi bajikanganga.

²³Nia' ija se're passala': anjo imang-imang maraenga jai, lanri massing mate ngasengi ke'nanga, sa'genna takkulleai napannarrusu' jama-jamanna.

²⁴Mingka Isa, attallasaki satunggu-tungguna; jari takkulleai a'lette' mae ri tau maraenga anjo jama-jamang imang niaka ri Ia.

²⁵Lanri kammanami anjo nakkulle Isa sa'genna satunggu-tungguna ampasalamaki sikontu tau battua mae ri Allata'ala tete ri KalenNa; nasaba' attallasaki satunggu-tungguna sollanna akkulle Napappala'-palakkang sikamma anjo taua mae ri Allata'ala.

²⁶Jari, Ia minjo Isa Imang Malompo niparalluanga. Iami Imang matangkasa'; tena sikali kasalang yareka dosa ri KalenNa. Nisa'la'mi battu ri tau dorakaya, na nipanai' ri tampa' tinggianganga na sikontu langika.

²⁷ Tasangkammayai imang-imang lompo maraenganga, allo-alloa angngerang koro'bang lanri dosa-dosa kalenna rolong, nampa koro'bang lanri dosa-dosana ummaka. Isa, sikaliji bawang angngerang koro'bang untu' satunggu-tungguna, iamintu ri wattunna Napassareang KalenNa a'jari koro'bang.

²⁸Hukkung agama Yahudia angngangkaki tau tenaya nasukku' baji'na a'jari imang lompo. Mingka ribokoanganna, battu ri ia anjo hukkung-hukkunga appare'mi janji siagang assumpami Allata'ala angkanaya Naangkaki a'jari Imang Malompo, anjo Ana' le'ba'ka nipa'jari Tumappasalama' sukkuka baji'na sa'genna satunggu-tungguna.