Read Makassar Version – KITTA' MATANGKASA IBRANI 8 Bible Online

IBRANI 8 - Makassar Version – KITTA' MATANGKASA bible

IBRANI 8

¹ Poko'na anne sikamma nibicaraya iamintu: Nia' Imang Malompota sangkammaya anjo; niaka ammempo ammarenta siagang Allata'ala Kaminang Lompoa ri suruga.

²Ia anggaukangi jama-jamang Imang Lompoa ri Kamara' Kaminang Matangkasaka, iamintu ilalang KemaNa Batara sitojennaya, Napaentenga Batara, jari teai rupataua ampaentengi.

³Sikontu imang lompoa niangkaki untu' angngerang koro'bang yareka passare mae ri Allata'ala. Kammatommi anjo Imang Lompota; musti nia' apa-apa ri Ia untu' laNapassareang.

⁴Ebara' angkana niaki ri anne linoa, tena Nala'jari Imang, nasaba' nia'mo imang langngerangai anjo koro'bang nituntuka lalang ri hukkung agama Yahudia.

⁵ Anjo jama-jamang imang nagaukanga ke'nanga, sikontutojenna poro pangngebaranji siagang bayang-bayanji bawang mae ri apa niaka ri suruga. Anjo le'ba'mi Napau Allata'ala mae ri Musa riolo, iamintu ri wattunna lappaenteng KemaNa Batara Musa. Kammami anne kananNa Allata'ala mae ri Musa, “U'rangi! Yangasenna anjo musti nupareki situru' panrala' le'baka nipaccinikangko rate ri monconga.”

⁶Mingka kamma-kamma anne la'bi lompoangangi jama-jamang imang Nagappaya Isa, naanjo jama-jamang imang nagaukanga ke'nanga. Nasaba' anjo passijanjiang Napareka Allata'ala siagang rupataua la'bi bajikangangi lanri situruki ri janji apa-apa la'bi bajikanganga.

⁷Ebara' angkana tena kakuranganna anjo janji makase'rea, tantu tenamo naparallu nipare' anjo janji makaruaya.

⁸ Mingka nia'mo kasalang Nagappa Allata'ala ri Umma'Na, sa'genna Nakanamo Allata'ala, “U'rangi, angkanaya lanarapiki sallang wattunna, naKulappare' passijanjiang beru siagang bansa Israel, siagang bansa Yehuda.

⁹Tasangkammayai passijanjiang Kupareka siagang boe-boena ke'nanga ri wattunna Kururungang ke'nanga assulu' battu ri butta Mesir. Allessoki ke'nanga ri passijanjiang Kupareka siagang ke'nanga, lanri kammanami anjo nataKujampangia ke'nanga.

¹⁰Mingka anne kamma, iaminne passijanjiang laKupareka siagang umma' Israel ri allo-allo labattua, Nakana Batara: LaKupadongkoki paratorangKu ri nawa-nawanna ke'nanga, naKutulisi' todong ri atinna. INakke la'jari Allata'ala mae ri ke'nanga, naKupa'jari ke'nanga UmmakKu.

¹¹Taparalluai ke'nanga siajara' para ia, yareka ampauangi sari'battanna angkana, ‘Tappakko mae ri Batara.’ Nasaba' yangasenna ke'nanga ca'di lompo, latappaki mae ri Nakke.

¹²LaKupammopporangi sikamma kasalanna ke'nanga, siagang laKukaluppai dosa-dosana ke'nanga.”

¹³Lanri appare'namo Allata'ala passijanjiang beru, a'jari toami siagang rotto'mi anjo passijanjiang rioloa; na anjo apa toayamo, tasalloami nalanynya'.