Read Makassar Version – KITTA' MATANGKASA IBRANI 9 Bible Online

IBRANI 9 - Makassar Version – KITTA' MATANGKASA bible

IBRANI 9

¹Anjo passijanjiang uru-urua, nia' paratorang-paratorang panynyombanna, siagang nia' todong tampa' panynyombanna napareka rupataua.

² Se're pammantangang nipaenteng niarenga Kamara' Matangkasa' bageang ri dallekanna. Anjoreng nia' bangkeng pa'dongkokang kanjoli, siagang niaka mejang pammantangang roti lanipangngadakkanga mae ri Allata'ala.

³ Bageang lalanganna, iamintu ri bokona gordeng makaruaya, nia' kamara' niarenga Kamara' Kaminang Matangkasaka.

⁴ Lalang ri anjo kamaraka, nia' pattunuang dupa bulaenga nipare', siagang nia' todong Patti Passijanjiang nilapisika bulaeng. Lalang ri anjo Pattia nia' uring bulaeng pammoneang roti, takkanna Harun accu'lakamo, siagang ruang lawara' batu pannulisang niaka tattulisi' irateanganna sampuloa paratorang Napassuroanga Allata'ala.

⁵ Irateanganna anjo Pattia nia' rua patong malaeka' akka'nyika, a'jaria pangngebarang ri kahaderanNa Allata'ala. Anjo ruaya ka'nyi'na patung malaekaka tassungkei irateanganna anjo pattongko' Pattia, iamintu tampa' pammopporanna dosa-dosaya. Mingka takkullea ngasengi anjo sikammaya nipakasingara' apa battuanna sa'genna a'jari singara' tojeng-tojeng.

⁶ Kamma ngasemmi anjo batena niatoro'. Allo-allona imang-imanga antama' anjoreng ri bageang dallekanna anjo pammantangang nipaentenga, untu' anggaukangi jama-jamanna ke'nanga.

⁷ Akkullea antama' ri bageang kaminang lalanna anjo pammantanganga, iamintu imang lompoaji bawang. Naporo sikaliji bawang sitaung nagaukang anjo kammaya. Siagang punna nagaukang anjo kammaya, angngerangi cera' untu' lanapangngadakkang mae ri Allata'ala untu' kalenna anjo imanga, siagang lanri sikamma dosa nagaukanga umma'Na.

⁸Ilalammi ri anne atoranga, Napappicinikang RohNa Allata'ala sa'genna singara' angkanaya ilalang nia'na ija ammenteng bageang dallekanna anjo pammantanganga, tenapa natassungke oloang antamaya mae ri anjo Kamara' Kaminang Matangkasaka.

⁹Iaminne pangngebarranna jammang kamma-kammaya anne; battuanna angkanaya sikamma apa-apa nipassareanga siagang koro'bang olo'-olo' nipassareanga mae ri Allata'ala, takkulleapi napa'jari sukku' baji'na ati mailalanna tau angngeranga passare.

¹⁰Nasaba' anjo upacara-upacaraya poro mange bawang ri passala' kanre-kanreang, inung-inungang, siagang a'rupa-rupa upacara pannangkasi. Yangasenna anjo poro paratorang-paratorang nacinikaji bawang mata, akkullea tappake sa'genna bawang ri wattunna Naberui ngaseng Allata'ala sikontu apa-apa niaka.

¹¹Mingka nia'mi battu Almasi a'jari Imang Lompo ri yangasenna passala' kabajikang niakamo. KemaNa Batara Napammantangia anggaukangi jama-jamanNa salaku Imang Lompo, la'bi lompoangangi siagang la'bi sukkukangangi. Naanjo teai rupataua ampareki; battuanna, teai anne lino nipa'niaka assala'na.

¹²Sikaliji Almasi antama' ri anjo Kamara' Kaminang Matangkasaka ilalang ri anjo kemaya sa'genna satunggu-tungguna. Anjo wattua tena Nangngerang cera' bembe laki, yareka cera' sapi rungka untu' lanipangngadakkang; passangalinna cera' KalenNa Naerang, na lanri kammanami anjo naNalappassang maki' battu ri dosa-dosaya sa'genna satunggu-tungguna.

¹³ Anjo cera' bembea siagang sapi lakia kammayatompa auna anjo koro'bang sapi rungkaya, nipakei untu' amba'basaki sikamma tau ra'masaka, sollanna a'jari tangkasa' ke'nanga. Jari, punna akkulle ceraka siagang aua antangkasi kara'massanna ke'nanga,

¹⁴la'biangampa pole cera'Na Almasi. Tete ri Roh mannannunganga, Napassareammi KalenNa Almasi mae ri Allata'ala a'jari koro'bang sukkuka baji'na. Cera'Na antangkasi ati mailalanta battu ri upacara agama tenaya matu-matunna sollanta akkulle a'jari palayang mae ri Allata'ala mattallasaka.

¹⁵Lanri kammanami anjo, na'jarimo tete Almasi untu' passijanjiang beru, sollanna akkulle natarima sikamma tau le'baka Nakio' Allata'ala untu' annarima barakka'-barakka' mannannungang le'baka Napa'janjiang Allata'ala. Yangasenna anjo kammaya akkullei kajariang lanri nia'na le'ba' mate, iamintu Almasi; na battu ri iaminjo kamateanNa Nakkullemo Nalappassang rupataua battu ri sikamma kasalang le'baka nagaukang ke'nanga, ri wattu tappakena ija passijanjiang uru-urua.

¹⁶Punna nia' sura' warisi', musti nia' todong buttina angkanaya ma'nassa matemi anjo tau appareka sura' warisi'.

¹⁷Nasaba' ilalang attallasa'na ija anjo tau appareka sura' warisi', takkulleapi tappake anjo suraka punna tenapa namate anjo taua.

¹⁸Iaminjo saba'na namusti nipa'nassa parjanjiang rioloa siagang cera'.

¹⁹ Uru-urua napabattui Musa sikontu anjo hukkung Napassuroanga Allata'ala mae ri bansa Israelka. Le'baki anjo, angngallemi Musa cera' sapi rungka siagang cera' bembe laki. Nampa nacampuru' siagang je'ne', nampa napaba'basa' mange ri Kitta' Hukkung-hukkung battua ri Allata'ala siagang mange ri sikontu bansa Israelka. Ruku'-ruku' siagang bulu gimbala' eja toaya tanja'na napaba'basa'.

²⁰Lalang napaba'basa'na nakanamo Musa, “Iaminne cera' ampa'nassayai parjanjiang battua ri Allata'ala. Musti nuturuki anne parjanjianga.”

²¹ Le'baki anjo napaba'basa' kammatommi anjo Musa anjo ceraka mae ri kemaNa Batara siagang sikontu pakkakasa' sarroa nipake assambayang.

²² Kammami anjo pangngatorang agamana tu Yahudia, angkanaya yangaseng-ngasenna parallui nitangkasi siagang cera'; kammayatompa iapa nakkulle nipammopporang dosaya punna nia' cera' tassolong.

²³Kammami anjo batena nipangngebarang antekamma paralluna apa-apa niaka ri suruga nitangkasi. Mingka anjo apa-apa niaka ri suruga niparalluangi koro'bang bellaya la'bi baji'na.

²⁴Nasaba' teai Kamara' Matangkasa' bate pare'na rupataua Napantamakki Almasi. Anjo Tampaka poro pangngebaranji bawang ri Kamara' Matangkasa' sitojennaya. Ma'nassa suruga tojeng Napantamakki Almasi; anjoremmi kamma-kamma anne andallekang ri Allata'ala untu' kasalamakkanta ngaseng.

²⁵Taung-taungi Imang lompona tu Yahudia antama' ri Kamara' Kaminang Matangkasaka lalang ri Balla'Na Batara. Antamaki angngerang cera'na sikayua olo'-olo'. Mingka antamaki Almasi angkoro'bangkangi KalenNa tena nauntu' a'mole-mole.

²⁶Nasaba' punna a'mole-molei Nagaukang kammaya, tantu a'mole-molemi Napisa'ringi sessaya baku' nipa'jarina linoa. Mingka a'nassami angkanaya ri anne kala'busang jammanga, battumi sikaliji bawang angkoro'bangkangi KalenNa sollanna Natangkasi dosaya.

²⁷Le'ba'mi Napattantu Allata'ala angkanaya sikaliji bawang mate rupataua. Le'baki anjo niadelimi ri Allata'ala.

²⁸ Kammatommi anjo Almasi. Sikaliji bawang nipassareang a'jari koro'bang, najai tau Natangkasi dosana. Labattu poleangi makapinruanna. Mingka teaimi untu' antanggongi dosaya; passangalinna untu' ampasalamaki sikamma tau antayangai kabattuanNa.