Read Makassar Version – KITTA' MATANGKASA YAKOBUS 2 Bible Online

YAKOBUS 2 - Makassar Version – KITTA' MATANGKASA bible

YAKOBUS 2

¹Sikamma sari'battangku! Salaku tau tappa' mae ri Batara Isa Almasi, Batara Kaminang Mala'birika, tea' laloko passimmara'-maraengi parannu tau situru' apa nacinika mata.

²Nasaba' punna nia' se're tau kalumanynyang ammake cincing bulaeng siagang pakeang ga'ga-ga'ga battu ri passe're-se'reannu, nampa nia' pole tu kasi-asi ammakeang kekke'-kekke',

³la'bi nupakala'birangammi anjo tau ammakeang ga'gaya. Nukanamo ri ia, “Anrinniki' ammempo ri kadera kaminang bajika.” Mingka mae ri anjo tu kasi-asia nukanamo, “Anjoreng mako mae ammenteng,” yareka nukana, “Anrinni mako ri daparaka ammempo.”

⁴Lanri kammana anjo batenu, nupassimmara'-maraemmi parannu tau siagang pikkirang ja'dala'mi nupake angnganggaraki parannu tau.

⁵U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai.

⁶Mingka ikau nuhinai tu kasi-asia; na sikontutojenna iaji anjo tu kalumanynyanga anjallakkangko siagang anre'resangko mange ri pangadelanga!

⁷Iaminjo ke'nanga anghinai areng mala'biri' nutarimaya battu ri Allata'ala!

⁸ Nugaukammi annabaya, punna nugaukang hukkung Kakaraengang niaka tattulisi' lalang ri Kittaka angkanaya, “Paralluko angkamaseangi parannu tau, sangkamma nukamaseanna batangkalennu.”

⁹Mingka punna nupassimmara'-maraeng parannu tau situru' apa nacinika mata, a'gau' dosa mako, siagang napa'nyatami hukkunNa Allata'ala angkanaya nudakkaimi hukkunga.

¹⁰Inai-nai andakkai kalase'renna hukkunNa Allata'ala, sikontutojenna nadakkai ngasemmi anjo hukkunga.

¹¹ Nasaba' Ia angkanaya, “Teako a'gau' bawangi,” Ia tonji angkanaya, “Teako ammunoi.” Jari punna tena nu'gau' bawang, mingka ammunoko, sikontutojenna nudakkai tommi anjo hukkunga.

¹²A'bicara mako siagang appanggaukang mako salaku tau laniadelia situru' hukkunNa Allata'ala ampakabebasakai rupataua.

¹³Nasaba' talaNapa'nyatayai pangngamaseanNa Allata'ala mae ri tau tenaya nangngasseng mangngamaseang. Mingka la'bi jarrekangangi pangngamaseanga na anjo hukkunganga!

¹⁴Sikamma sari'battangku! Apa matu-matunna angkana taua, “Inakke tappakka',” punna tena napa'nyatai anjo katappakkanna lalang ri panggaukanna? Maka akkullei anjo katappakkang kammaya ampasalamaki anjo taua?

¹⁵Ebara' angkana nia' se're parannu tau parallu care-care siagang tena nangganna' kanre allo-allona.

¹⁶Apa matu-matunna punna nukana ri anjo taua, “Salamakko ammake pakeang kammu' siagang salamakko ri mangnganrenu!” — punna tena nusarei anjo apa naparalluia ri tallasa'na?

¹⁷Kammatommi anjo ri katappakkanga; punna tena nanipa'nyatai lalang ri panggaukanga, tena matu-matunna anjo katappakkanga.

¹⁸Gassingka nia' tau angkana, “Nia' tau tanjeng ri tappa'na siagang nia' todong tau tanjeng mae ri panggaukanna.” Lakukanamo ri ia, “Picinikiangsa' antekamma batena akkulle taua nikana tappa' mingka tena na'nyata lalang ri panggaukanna, nampa kupicinikiang todong lalang ri panggaukangku untu' ampa'nyatai angkanaya ma'nassa nia' tappakku.”

¹⁹Sai tappakko angkanaya anjo Allata'ala se'reji bawang? Kammatojengi! Kamanna setanga tappa' tonji siagang annekkere'mi napakamma malla'!

²⁰Ma'nassa sanna' dongo'nu! Maka paralluko nipa'buttiang angkanaya ma'nassa tena matu-matunna nia' tappatta punna tena na'nyata lalang ri panggaukanta?

²¹ Ciniki anjo boe-boeta Abraham. Nitarima bajiki ri Allata'ala lanri panggaukanna, iamintu ri wattunna napassareang ana'na, iamintu Ishak, mae ri Allata'ala irate ri tampa' pakkoro'bangnganga.

²²Anrinni a'nassami angkanaya anjo katappakkanga musti nipa'nyatai lalang ri panggaukanga sollanna a'jari sukku'.

²³ Anjo situru'mi nakanaya lalang ri Kittaka, “Tappaki Abraham mae ri Allata'ala, siagang lanri iaminjo tappa'na nanitarimamo ri Allata'ala salaku tau anggaukangai ero'Na Allata'ala.” Iaminjo saba'na nanigallara'mo Abraham, “Agang baji'Na Allata'ala.”

²⁴Jari singara'mi kamma-kamma anne, angkanaya nanitarima baji' taua ri Allata'ala iamintu lanri panggaukanna anjo taua; jari teai lanri tappa'na bawang.

²⁵ Cini' tongi anjo Rahab, iamintu baine pasundalaka. Nitarima bajiki ri Allata'ala lanri panggaukanna, iamintu ri wattunna natarima ri balla'na mata-matana bansa Israelka siagang natulunna ke'nanga lari ri oloang maraenga.

²⁶Jari, sanrapang tubua punna tena rohna nikana matei, kammatommi anjo katappakkanga, punna tena na'nyata lalang ri panggaukanga nikanami mate anjo katappakkanga.