Read Makassar Version – KITTA' MATANGKASA YAKOBUS 4 Bible Online

YAKOBUS 4 - Makassar Version – KITTA' MATANGKASA bible

YAKOBUS 4

¹Battu kemae assala'na passiba'jianga siagang pa'beseranga ri tangnga-tangnganu? Sai battu ri sikamma cinna tuli a'besereka lalang ri kalennu untu' anggappai kasannangang linoa.

²Cinnako, mingka tena nunggappa; jari ero' mako ammuno! Lompoi sumanga'nu, mingka tanugappayai apa nuboyaiya; jari a'besere' mako siagang assiba'ji mako. Tena nunggappa apa-apa, lanri tena nuppala' mae ri Allata'ala.

³Siagang manna pole le'ba' mako appala', mingka tena nunggappa, lanri salai pattujunnu; anjo apa nupalaka sangnging untu' kasannangang kalennu bawang.

⁴Teai ngasengko tau majarre'! Maka nuassengi angkanaya punna agangko mae ri linoa, a'jari musuko mae ri Allata'ala? Jari inai-nai ero' a'jari agang mae ri anne linoa, napa'jarimi kalenna musu mae ri Allata'ala.

⁵Teako kapangngi angkanaya tena saba'na punna nakana Kittaka, “Ilalang ri kalenta nia' Naboli' Allata'ala Roh sannaka terasa'na cinnana.”

⁶ Mingka manna nakamma, la'bi terassangangi pangngamaseang Napassareanga Allata'ala mae ri katte na anjo cinnana roh niaka ri katte. Iaminjo saba'na na nia' todong tattulisi' lalang ri kittaka angkanaya, “Nimusui ri Allata'ala tau tampoa, mingka Nakamaseangi tau tunaya atinna.”

⁷Lanri kammana, tundu' mako mae ri Allata'ala, siagang ewai Billisika, sollanna lari Billisika battu ri kau.

⁸A'reppesekko mae ri Allata'ala na'reppese' todong Allata'ala mae ri kau. Bissaimi limannu, ikau tau dorakaya! Siagang tangkasi atinnu, ikau tau a'rua nyawaya!

⁹Paralluko angngarru' siagang appiraung lanri nusassala' tojenna kalennu; parallui amminra kakkala'nu a'jari karru', siagang amminra karannuannu a'jari si'na!

¹⁰Paralluko ampakatunai kalennu ri dallekanNa Batara, sollannu Napakatinggi sallang Batara.

¹¹Sikamma sari'battangku; teako assicalla-callai yareka teako assisala-salakangi. Inai-nai ancallai yareka ansalakangi paranna tu Karisteng, nacallami siagang nasalakammi hukkunNa Allata'ala. Na punna nusalakammo hukkung-hukkunNa Allata'ala, ma'nassa tenamo nanuturuki anjo hukkung-hukkunga, passangalinna a'jari mako haking mae ri anjo hukkung-hukkunga.

¹²Na sikontutojenna se'reji nia' ha'na assarei hukkung siagang angngadeli rupataua. Iamintu Allata'ala, niaka kakoasanNa ampasalamaki siagang anghukkungi rupataua. Jari, inaiko antu, sa'gennu akkulle ansalakangi parannu tau?

¹³ Sikamma sari'battangku; ikau angkanaya, “Anne alloa yareka ammuko, erokka' a'lampa mange ri kota anu nakuammantang anjoreng sitaung untu' a'danggang siagang a'boya doe',” pilangngeri anne pappakaingakku.

¹⁴Apa lakajariang lalang ri katallassannu ammuko, tena sikali nanuassengi! Sanrapang le'ba' jako umbu sinampe' duduaji kacinikang, nampa a'lanynya'.

¹⁵Mustina lakammai anne batenu angkana, “Punna Naerokang Batara, lattallasa'ma' siagang lakugaukammi anne yareka anjo.”

¹⁶Mingka kamma-kamma anne a'jari tampo mako siagang lompomi bicarannu. Anjo bicara lompo kammaya sala ngasengi.

¹⁷Lanri kammana, inai-nai angngassengi apa bajika, nanaasseng angkanaya musti nagaukangi anjo apa bajika mingka tena nagaukangi, anjo taua dorakami.