Read Makassar Version – KITTA' MATANGKASA YAKOBUS 5 Bible Online

YAKOBUS 5 - Makassar Version – KITTA' MATANGKASA bible

YAKOBUS 5

¹Sikamma sari'battangku, akkalumanynyanga! Pilangngeri anne pappakaingakku. Paralluko angngarru' siagang appiraung lanri lanukasia'na kasessanga!

² A'jari botto'mi kakalumanynyangannu. Nakanremi kacoa' pakeannu.

³Attaiammi bulaennu siagang pera'nu; iaminjo taianna la'jari sa'bi angngewayako siagang la'jari sanrapang pepe' langkanreai tubunu sa'genna la'busu'. Nupattambung-tambummi pa'barang-barangannu ri anne allo kala'busanga.

⁴ Tanubayarrai gajina sikamma tungnganre gajia ri kokonnu. Kamma-kamma anne pilangngerimi kunrarenna ke'nanga! Sikamma tau ampasse'reai wassele'na kokonnu akkiok-kio'mi appala' tulung mae ri Allata'ala; siagang Nalangngere'mi Allata'ala, Batara Kaminang Koasaya anjo pakkio'na ke'nanga.

⁵Alla'bi-la'bi mako ri katallassannu, siagang nukasia'mi kasannanganga ri anne linoa. Sanrapangko tau nupakaco'moka kalennu untu' lanisamballe sallang ri allo labattua.

⁶Nuhukkummi siagang nubunomi tau tenaya salana, na tanaewayako ke'nanga.

⁷Lanri kammana, sa'bara' ngasengko sari'battang, sa'genna battu Batara. Ciniki antekamma sa'bara'na palamung-lamunga antayangi wassele' lamung-lamung lompoa anggaranna mae ri ia. Sa'baraki antayangi wattu bosia siagang wattu pa'rapponna lamung-lamunna.

⁸Parallu tongko sa'bara' siagang lompo pa'mai'nu, nasaba' a'reppese'mi allo kabattuanNa Batara.

⁹Teako ta'liwakki larronu siagang teako sisalakangi, sollanna tena Nahukkungko Allata'ala. U'rangi! A'reppese'mi hakinga! A'birimmi battu!

¹⁰Sikamma sari'battangku, u'rangi na'bi-na'bi a'bicaraya lalang arenNa Batara. Sa'baraki ke'nanga angkasiaki kasessanga. Jari angngalle mako conto mae ri ke'nanga.

¹¹ Nigallara'mi ke'nanga tau sunggu, lanri sa'bara'na ke'nanga. Nulangngere' tommi kasa'barranna Ayub, siagang nuasseng tommi antekamma batena nibarakkaki ri Batara, ri kale'bakkanna. Nasaba' teai sipato' baji' pa'mai'Na siagang lompo pangngamaseanNa Batara.

¹² Sikamma sari'battangku; ia lomoro' se'rea, iamintu: Teako assumpai, baji' nanupau langika, baji' nalinoa, yareka naapa-apa mamo nupau. Iamo bawang nupau angkanaya “Iyo” punna iyo memang todong, siagang “Tena” punna tena memang todong; sollanna tena naNahukkungko Allata'ala.

¹³Punna nia' ri tangnga-tangnganu tau susa, parallui appala' doang. Punna nia' tau rannu, parallui akkelong mammuji ri Allata'ala.

¹⁴ Punna nia' tau garring parallui nakio' pamimping-pamimping jama'aka. Siagang parallui anjo pamimping-pamimping jama'aka ampappala' doangangi siagang ansapui minynya' lalang arenNa Batara anjo tau garringa.

¹⁵Inai-nai appala' doang siagang tappa' tojeng-tojeng mae ri Batara, lanipamollei battu ri garrinna. Lanipamollei garrinna ri Batara, siagang lanipammopporangi dosa-dosana le'baka nagaukang.

¹⁶Lanri kammana, paralluko massing ammangakui kasalannu mae ri parannu tau, siagang sipappala' doangangko, sollannu nipammolle. Pappala' doangang situruka ero'Na Allata'ala, lompo sikali kakoasanna.

¹⁷ Anjo Elia, tau biasa tonji kamma ikatte. Attojeng-tojengi appala' doang sollanna tena naturung bosia; apaji natena tojemmo naturung bosia tallun taung assitangnga sallona.

¹⁸ Nampa ribokoanganna appala' doammi pole; apaji naturummo bosia battu ri langika sa'genna nia'mo pole wassele'na tanaya.

¹⁹Sikamma sari'battangku! Punna nia' tau ri tangnga-tangnganu taerokamo anturuki pangngajarang battua ri Allata'ala, nampa nia' tau akkulle ampoterangi anjo taua mae ri Allata'ala,

²⁰ u'rangimi anne nakanaya Kittaka: Inai-nai ampoterangi tau dorakaya mange ri oloang tojenga, iami ampasalamaki nyawana anjo tau dorakaya battu ri kamateanga siagang a'jari saba' najai dosa nipammopporang. Sallangku, Yakobus