Read Makassar Version – KITTA' MATANGKASA 1 PETRUS 3 Bible Online

1 PETRUS 3 - Makassar Version – KITTA' MATANGKASA bible

1 PETRUS 3

¹ Kammaya todong ikau, sikamma tu bai'-bainea, musti mappilangngeriko mae ri bura'nennu. Sollanna punna nia' tau tena natappa' bura'nenna ri biritta battua ri Allata'ala, akkullemi a'jari tappa' lanri nacini'na panggaukannu. Siagang tena nuparallu a'bicara apa-apa mae ri ke'nanga,

²lanri nacini'namo panggaukang baji'nu siagang lambusu'nu.

³ Teako nabattu pantaranga bawang nicini' kaga'gannu, alarapanna batenu ammodei uu'nu, yareka ammake pa'belo-belo, yareka ammakeang pakeang ka'jalaka ballinna.

⁴Mingka, anjo kaga'gannu parallui battu lalang ri ati mailalannu, battu ri panggaukang baji'nu, siagang tunanu ri pa'mai'; yangasemmi anjo kaga'gang satunggu-tunggua, sannaka lompona anggaranna ri paccini'Na Allata'ala.

⁵Kammami anne carana riolo angga'gai kalenna sikamma bai'-baine niaka agamana siagang manrannuanga ri Allata'ala, iamintu mappilangngeri mae ri bura'nenna ke'nanga.

⁶ Kamma tomminjo Sara, mappilangngeri mae ri Abraham siagang akkio' tuangi mae ri Abraham. Ikau kamma-kamma anne ana'-ana'na ngaseng tommaka Sara, punna nugaukang apa-apa bajika siagang tena sikali numalla'-malla' manna pole ri apa-apa mamo.

⁷ Ikau pole, sikamma bura'-bura'nea, parallui baji' pammahannu mae ri bainennu; parallui nuasseng angkanaya anjo tubai'-bainea tau lammai. Bajiki panggaukannu mae ri ia, nasaba' lasiagang ngasengko ke'nanga lantarimai passare lammoro'Na Allata'ala iamintu katallassang sitojennaya. Gaukangi anne kammaya, sollanna tena anrompai pappala' doangannu.

⁸Bodona kana iaminne: parallu ngasengko ma'julu kana siagang majulu pa'mai'. Paralluko sikarimangngi sangkamma tau assari'battanga. Siagang paralluko sikama'-kamaseang siagang tuna ri pa'mai'.

⁹Teako pasibalasaki kaja'dallanga siagang kaja'dallang, yareka kana-kana pali'bo siagang kana-kana pali'bo; mingka pappalakkangi barakka' mae ri Allata'ala; iaminjo nupa'balassang. Nasaba' iaji naNakiokko Allata'ala kaNakellaiko sollannu akkulle annarima barakka' battu ri Ia.

¹⁰ Nia' tattulisi' lalang ri Kittaka angkanaya, “Inai-nai ero' angkasiaki mate'nena tallasaka, naero' ampisa'ringi allo-allo bajika, musti nakatutui bawana sollanna tamappaua bicara ja'dala', natamakkana balle-ballea.

¹¹Musti napakabellai kalenna battu ri kaja'dallanga nanagaukang kabajikanga; parallui appattujuang tojeng-tojeng untu' anggappai passiamakkanga.

¹²Nasaba' tuli Naparhatikangi Batara tau anturukiai ero'Na, tuli Napilangngeri pappala' doanganna ke'nanga; mingka Nabaliangi sikamma tau anggaukangai kaja'dallanga.”

¹³Inaika ero' a'gau' ja'dala' mae ri kau, punna nungai a'gau' bajika?

¹⁴ Mingka manna pole musti nukasia' kasessanga lanri nugaukanna apa-apa bajika, ikau upa' mako! Teako mallakki manna pole ri nai, siagang teako bata-batai.

¹⁵Mingka lalang ri pa'mai'nu, parallui Almasi bawang nupakalompo situru' empoanNa salaku Batara. Siagang paralluko tuli sadia ampiali sikamma tau akkuta'nanga mae ri kau ri sesena panrannuang niaka ri kau.

¹⁶Mingka gaukangi anjo siagang tuna pa'mai'nu yareka siagang baji'. Siagang parallui ci'nong ati mailalannu, sollanna punna nipitinako lanri tappa'nu mae ri Almasi lalang tallasa'nu, lasiri'-siri'mi mae ri kalenna anjo tau ampitinayako.

¹⁷Bajikangangi sessaya lanri a'gau' baji' — punna Nakaerokang Allata'ala — naia sessaya lanri a'gau' ja'dalaka.

¹⁸Nasaba' le'ba'mi sikali mate Almasi untu' satunggu-tungguna passabakkang dosana rupataua; Ia tena salanna mingka matemi untu' tau salaya. Nagaukammi Almasi kammaya anjo sollannu akkulle Narurungang ngaseng mae ri Allata'ala. Nibunomi tubuNa, mingka nipattallasa' poleammi ammotere' katallassang rohaniNa.

¹⁹Iaminjo RohNa a'lampa ambirittakangi biritta battua ri Allata'ala mae ri roh-roh nitarungkua:

²⁰ iamintu rohna sikamma tau tenaya namappilangngeri mae ri Allata'ala ri jammang tallasa'na Nuh. Anjo wattua sa'baraki attayang Allata'ala lalang appare'na kappala' Nuh. Iaji bawang anjo tau niaka lalang ri kappalaka — nia' sagantuju tau — nipasalama' battu ri anjo a'ba lompoa.

²¹Jari anjo kajarianga a'jarimi pangngebarang mae ri anjo pa'je'ne' ampasalamakako ri kamma-kammaya anne. Anne pa'je'neka teai pa'gaukang akkullea antangkasi kalennu battu ri sikontu apa-apa ra'masaka, passangalinna a'jari janjinnu mae ri Allata'ala, iamintu janji baji'nu battu lalang ri ati mailalannu. Anjo pa'je'neka napasalamakko lanri attallasa'Namo ammotere' Isa Almasi battu ri kamateanga,

²²siagang lanri nai'Namo ri suruga. Kamma-kamma anne koasaI siagang Allata'ala siagang Naparentami sikontu malaekaka, sikontu tau anna'galaka koasa, kammayatompa sikontu kagassingang niaka lalang ri jama-jamang rohania.