Read Makassar Version – KITTA' MATANGKASA 1 PETRUS 4 Bible Online

1 PETRUS 4 - Makassar Version – KITTA' MATANGKASA bible

1 PETRUS 4

¹Lanri le'ba'mi Nakasia' Almasi kasessanga lalang ri TubuNa, musti nupakajarre' tommi kalennu ri pammetang kammaya anjo. Nasaba' inai-nai angkasiaki kasessanga lalang ri tubuna, tenamo nagaukangi dosaya.

²Lanri kammana, paralluko anturuki ero'Na Allata'ala lalang tallasa' lanudallekanga pole, ri anne linoa siagang teai kaerokang rupatau nuturuki.

³Ri wattu allaloa, le'ba'mi sallo nugaukang apa nangaia nagaukang tau tenaya natappa' mae ri Batara. Tena nabaji' batenu appanggaukang ri katallassannu. Nuturukiangi hawa napasunu, angnginung-nginungko sa'gennu nasa'ring, assua'-suarakko, angnginung-nginungko siagang appakaringi'-ringikko anynyomba mae ri barhalaya.

⁴Kamma-kamma anne lannasa'mi tau tenaya natappa' ri Batara, lanri tenamo nuturuki ke'nanga angkasiaki panggaukang dosaya lalang kara'massanga. Iaminjo saba'na nanahina mako ke'nanga.

⁵Mingka musti nituntuki sallang ke'nanga ri Allata'ala, Ia sadiayamo untu' angngadeli sikontu tau attallasaka siagang tau matea.

⁶Iaminjo saba'na nanibirittakang tommo Kabara' Bajika mae ri sikamma tau matea. Pattujunna iamintu sollanna anjo tau le'bakamo niadeli tubuna — sangkamma yangasenna taua laniadeli — akkullemi attallasa' rohanina ke'nanga situru' ero'Na Allata'ala.

⁷Sikontu apa-apaya a'reppese'mi mae ri kale'bakkanna; lanri kammana paralluko tutu siagang nupakalewa kalennu, sollannu akkulle appala' doang.

⁸ La'biangampa pole nayangasennaya, paralluko attojeng-tojeng massing sikamaseang; nasaba' punna massing sikamaseangko sadia tommako untu' sipammopporang.

⁹Paralluko massing sitoana baji' ri balla'nu, siagang teako akkunrarengi.

¹⁰Massing annarima ngaseng mako passare pakkulle battu ri Allata'ala; anjo passarea tena nasangkamma-kamma. Lanri kammana, urusu' bajiki anjo passareNa Allata'ala; parallui massing nupake anjo pakkullea untu' kaparalluang nupa'juluia ngaseng.

¹¹Inai-nai appabattu biritta, musti napabattui biritta battua ri Allata'ala; inai allayani ri paranna tau, musti allayani situru' kagassingang battua ri Allata'ala; sollanna ilalang yangaseng-ngasenna, akkullemi nipakala'biri' Allata'ala tete ri Isa Almasi. Iami Makoasa siagang siratanga nipakala'biri' sa'genna satunggu-tungguna. Aming.

¹²Sikamma sari'battangku, sannaka kukarimangnginna! Kamma-kamma anne sanna' sessanu lanri niujiko. Mingka teako lannasakki, sangkamma angkana nia' apa sanna' heba'na kajariang mae ri kalennu.

¹³Ba'lalo, parallui a'jari sannang pakkasia'nu lanri amminawannu todong angkasiaki sessaya siagang Almasi. Jari sallang, punna nipa'nyatamo kala'biranNa Almasi, larannu mako.

¹⁴Upakko punna nihinako lanri tappa'nu mae ri Almasi. Punna kamma anjo, battuanna nia'mi ri kau Roh Mala'birika, iamintu RohNa Allata'ala.

¹⁵Tea' laloko niakki angkasiaki sessaya lanri ammunonu, yareka lanri a'lukka', yareka lanri a'gau' ja'dala', yareka lanri napantama'-tamakkinna urusanna tau maraenga.

¹⁶Mingka punna nukasia' sessaya lanri Karistennu, teako siri'-siriki lanri anjo passalaka. Appala' sukkurukko mae ri Allata'ala, angkanaya nuerammi arenNa Almasi.

¹⁷Narapi'mi wattunna laNaadeli Allata'ala linoa. Na Umma' KalenNa Allata'ala laniadeli la'bi riolo. Jari punna lappakkaramula angngadeli Allata'ala ri katte, antekammami kajarianna sikamma tau tenaya natappa' ri anjo Kabara' Baji' battua ri Allata'ala?

¹⁸ Nia' tattulisi' lalang ri Kittaka angkanaya, “Punna sikamma tau bajika sukkara'mi lanipasalama', apami lakajariang mae ri sikamma tau doraka tenaya natappa' mae ri Batara!”

¹⁹Lanri kammana, punna nia' tau angkasiaki sessaya lanri Nakaerokinna Allata'ala kammaya anjo, parallui nabajiki tallasa'na siagang parallui napappirannuang kalenna mae ri Batara Mappa'jarina ke'nanga. Iami tuli lanrupai janjinNa.