Read Makassar Version – KITTA' MATANGKASA 1 PETRUS 5 Bible Online

1 PETRUS 5 - Makassar Version – KITTA' MATANGKASA bible

1 PETRUS 5

¹Kupalaki mae ri pamimping jama'ah niaka ri tangnga-tangnganu, sollanna naparhatikang anne. Inakke, parannu pamimping jama'ah, antulisiki anne suraka; kalengku le'ba' anciniki kasessanNa Almasi. Na punna nipa'nyatamo kala'biranNa mae ri rupataua, lamminawang tonga' nipakala'biri'. Kupala' tojeng-tojengi mae ri kau ngaseng,

² sollanna nukalawaki sikamma gimbala' Napappirannuanga Allata'ala mae ri kau ngaseng. Kalawaki ke'nanga siagang sannang pa'mai'nu, sangkamma Nakaerokanga Allata'ala. Teako battalaki pa'mai'nu angkalawaki ke'nanga. Tea tongko lanri ero'nuji anggappa passawallang nanugaukang jama-jamannu. Passangalinna lanri ero'nu attojeng-tojeng allayani.

³Teako a'jari kammai tau koasa mae ri ke'nanga, nipappirannuanga mae ri kau. Mingka a'jariko conto baji' mae ri ke'nanga.

⁴Na punna battu sallang Pakalawaki Mala'birika, langgappa mako hadia sannaka ga'gana. Anjo hadiaya takkulleai amminra kaga'ganna.

⁵ Kammayatompa ikau sikamma tau rungkaya. Mappilangngeriko mae ri tau toaya. Musti nupakatunai kalennu; siagang musti silayaniko siagang tuna pa'mai'nu. Nasaba' nia' tattulisi' lalang ri Kittaka angkanaya, “Nabaliangi Allata'ala tau tampoa, mingka Nakamaseangi tau tunaya pa'mai'na.”

⁶ Lanri kammana, pakatunai kalennu irawangang lino magassinNa Allata'ala. Sollanna Napakatinggiko sallang punna narapi' wattunna.

⁷Erangi ranggaselanu mae ri Allata'ala, nasaba' Iami anjampangiko.

⁸Paralluko tuli tutu siagang a'jaga-jaga! Nasaba' anjo Billisika iami musunnu. A'lampai anrai'-kalau' sanrapang singa nye'nyereka amboyai apa akkullea nalollong.

⁹Jarreki tappa'nu nanuewa. Nasaba' nuassemmi angkanaya yangasenna parannu tu Karisteng ri sikontu linoa sessa ngaseng tongi sangkamma ikau.

¹⁰Mingka punna le'ba' mako sessa sinampe', KalenNa Allata'ala lampa'jari sukkukko. LaNapaentengko, siagang laNasareko kagassingang kammayatompa laNapakajarrekko. Nasaba' Iami Allata'ala sannaka baji'na pa'mai'Na; Iami le'baka angkiokko untu' angkasia' tongi kala'birang mannannunganga tete ri Almasi.

¹¹Iami makoasa sa'genna satunggu-tungguna! Aming!

¹² I Silas ambantua' nakupare' anne sura' bodoa bonena. Kubilangi Silas tu Karisteng tamamminraya. Erokka' ampakamajuko siagang ampakajarreki tappa'nu angkanaya anne apa kutulisika biritta kammatojeng ri sesena passare lammoro'Na Allata'ala. Paralluko anna'gala' jarre' mae ri anjo passare malammoroka.

¹³ Sikamma paranta anggota jama'ah ri Babilon, nipilea todong ri Allata'ala, akkiringi sallang mae ri kau ngaseng. Kammayatompa anakku Markus, sannaka kukarimangnginna, akkiring tongi sallang.

¹⁴Sikamaseang duduko, siagang sisallang-sallangiko salaku tu Karisteng massari'battanga. Poro Nabarakkaki ngasengko Batara, ikau sikontu tau a'jaria taunNa Almasi. Sallangku, Petrus