Read Makassar Version – KITTA' MATANGKASA 2 PETRUS 1 Bible Online

2 PETRUS 1 - Makassar Version – KITTA' MATANGKASA bible

2 PETRUS 1

¹Natarimai sikamma sari'battangku, le'bakamo anggappa katappakkang sangkammaya baji'na katappakkanna ikambe. Le'ba' maki' Nasare katappakkang Isa Almasi, Iamintu Allata'ala siagang Karaeng Mappasalamatta, lanri Nagaukanna apa annabaya. Anne suraka battu ri nakke, iamintu Simon Petrus, atanNa siagang tunisuroNa Isa Almasi.

²Kuminasai, poro Nasareko alla'bi-la'bi barakka' siagang kasalewangang Allata'ala lanri tappa'nu ri Allata'ala siagang Isa, Batarata.

³Le'baki Napake koasa kakaraenganNa Allata'ala untu' assareki' sikontu apa-apa niparalluanga sollanta akkulle anynyomba ri Ia lalang tallasatta. Nagaukangi kammaya anjo tete ri mangngassenta mae ri Isa Almasi le'baka angkiokki' sollanna akkulle todong nikasia' kalompoanNa siagang kabajikanNa.

⁴Kammami anjo caraNa Allata'ala ampa'lammorangi barakka'-barakka' sannaka heba'na siagang sannaka lompona anggaranna mae ri katte, ia le'baka Napa'janjiang. Lanri iami anjo barakka'-barakkaka nakiakkullemo ta'lappasa' battu ri sikamma kaerokang ja'dalaka, akkullea angngerangi anne linoa mae ri possoka; sollanna nukkulle todong anggappa bageang lalang ri sipa' kakaraenganna.

⁵Lanri kammana, attojeng-tojeng mako appattujuang sollanna nipakajarre' tappa'nu ri katallassang bajika. Sipa'rurunganna katallassang bajika, parallui nia' pangngassengannu;

⁶siagang sipa'rurunganna pangngassenganga, parallu tongko akkulle ampakalewai kalennu, siagang sipa'rurunganna ampakalewai kalennu, parallu tongko ampa'biasai kalennu sa'bara' andallekangi sikontu apa-apaya. Sipa'rurunganna sa'baraka andallekangi sikontu apa-apaya musti nuturuki tongi ero'Na Allata'ala lalang ri katallassannu.

⁷Siagang sipa'rurunganna mannurukia ri ero'Na Allata'ala, musti nigannakki tongko sipa' mangngamaseang mae ri parannu tu Karisteng. Nampa parallu tongi nutambai anjo sipa' mangngamaseanga ri parannu tu Karisteng siagang sipa' mangngamaseang mae ri yangasenna taua.

⁸Yangasenna anjo sipa'-sipa' kammaya nuparalluangi. Punna alla'bi-la'bimo anjo sipa' kammaya ri kau, lanapa'jari attojeng-tojeng mako anjama, siagang lappa'nia' mako wassele' ri jama-jamannu; kammayatompa pila' lanuasseng baji'mi pole Batarata Isa Almasi.

⁹Mingka tau tenaya sipa' kammana anjo, bodoi pikkiranna; takkulleai accini' siagang nakaluppai angkanaya le'ba'mi nitangkasi dosa-dosana allaloa.

¹⁰Lanri kammana, sikamma sari'battangku, paralluko pila' nuterassi usahanu sollanna pila' a'jari majarre' anjo pakkio'Na siagang pammileNa Allata'ala mae ri kalennu. Punna nugaukang anjo kammaya, tena nulanipassala.

¹¹Lalang kammanami anjo nulanikellai tojeng-tojemmo antama' ri Kakaraengang mannannungang battua ri Batara siagang Karaeng Mappasalamatta Isa Almasi.

¹²Lanri kammanami anjo natuli kupakaingakko ri yangasenna anjo passalaka, manna pole nanuassemmo siagang manna pole nanutappa' tojeng-tojemmo mae ri anjo biritta nutarimaya battu ri Allata'ala.

¹³Genteng ri tallasakku ija, paralluko kupakaingakkang yangasenna anjo passalaka.

¹⁴Nasaba' kuassengi angkanaya tasalloami nalakubokoi anne linoa, lanri le'ba'ma' Napauang baji' Batarata Isa Almasi.

¹⁵Jari lakuusahai sollanna manna pole matema', tuli lanuu'ranginna ammotere' yangasenna anne passalaka.

¹⁶Ri wattunna kipabattu mae ri kau antekamma mala'biri'na kabattuanNa Batarata Isa Almasi, tena nakituruki carita kosong battua ri rupataua. Anjo kala'biranNa Almasi mata kalennami ikambe le'ba' anciniki.

¹⁷ Niakki' anjoreng ri wattunna nipakalompo siagang nipakala'biri' ri Allata'ala Manggea. Anjo wattua kalangngerammi sa'ra battua ri Kaminang Makoasaya, angkanaya, “Iaminne AnakKu Kukamaseanga. Iami nakate'neang atingKu!”

¹⁸Kalenna ikambe allangngereki anjo sa'ra battua ri suruga ri wattunta nia' angngagangi rate ri anjo bulu' matangkasaka.

¹⁹Iaminjo saba'na nakipila' tappa'mo pole ri anjo biritta battua ri Allata'ala napabattua na'bi-na'bia. Teai sipato' baji'na punna nuparhatikang anjo birittaya; nasaba' anjo birittaya sanrapangi singara'na lampua lalang ri tampa' sassanga sa'genna battu bari'basaka, siagang accaya bintoeng battu rayaya lalang ri atinnu.

²⁰Mingka iaminne kaminang parallu sikalia nuu'rangi: Anjo apa-apa lakajarianga sallang, nisero kanaya ri biritta battua ri Allata'ala, takkulleai nibattuangngi situru' pikkirang kalenta.

²¹Nasaba' tale'bakai nia' tau angkana battu ri ero' kalenna nakkulle napabattu biritta battua ri Allata'ala ri passala'na anjo apa-apa lakajarianga. Yangasenna anjo taua nikoasai ri Roh KalenNa Allata'ala ri wattunna Napabattu anjo biritta battua ri Allata'ala.