Read Makassar Version – KITTA' MATANGKASA 1 YOHANES 1 Bible Online

1 YOHANES 1 - Makassar Version – KITTA' MATANGKASA bible

1 YOHANES 1

¹ Ia bonena anne kittaka, iamintu passala'na Kana attallasaka, iamintu Kana niaka memammo battu ri pakkaramulanna. Le'ba'mi nalangngere' siagang nacini' mata kalenna ikambe. Le'ba'mi nacini' siagang nata'gala' limanna ikambe.

² Ri wattunna nipa'nyata anjo tallasaka, nacini'mi ikambe. Iaminjo saba'na na'jari sa'bimo ikambe mae ri anjo passalaka. Kibirittakammi mae ri kau ngaseng passala'na anjo tallasa' sitojennaya siagang mannannunganga, ia niaka siagang Manggea, kammayatompa le'bakamo nipa'nyata mae ri kambe.

³Apa le'baka nacini' siagang nalangngere' ikambe, ia tomminjo nabirittakang ikambe mae ri kau ngaseng; sollannu amminawang todong siagang ikambe ampa'nyatai katallassang assiamaka, asse'rea siagang Manggea, kammayatompa asse're siagang Ana'Na iamintu Isa Almasi.

⁴Natulisi'mi ikambe anne suraka sollanna rannu tojeng-tojeng pa'maitta.

⁵Iaminne biritta le'baka nalangngere' ikambe battu ri Ana'Na siagang eroka napabattu ikambe mae ri kau ngaseng: Iaminjo Allata'ala singaraka, siagang tena sikali apa-apa sassang ri Ia.

⁶Punna nikana asse'remi katallassanta siagang Ia, mingka attallasa' ijaki' lalang ri sassanga, a'balle-balle maki', baji' lalang kana-kana kammayatompa lalang panggaukang.

⁷Mingka punna attallasakki' lalang ri singaraka, sangkamma Allata'ala niaki lalang ri singaraka, assiama' maki' massing para ikatte lalang ri katallassanta; kammayatompa nitangkasimi sikontu dosa-dosata lalang ri cera'Na[1] Isa, Ana'Na Allata'ala.

⁸Punna nikana tena nakidoraka, niballe-balleimi kalenta; taniassengami Allata'ala lalang ri atinta.

⁹Mingka punna nimangakui dosa-dosata mae ri Allata'ala, laNarupaimi janjinNa siagang laNagaukammi apa-apa adeleka mae ri katte. LaNapammopporangi dosa-dosata siagang laNatangkasiki' battu ri sikontu kaja'dallanga.

¹⁰Mingka punna angkanaki' tena kidoraka, sangkammami angkanaya nibilang paballe-ballei Allata'ala; battuanna tenamo niboliki ri atinta kananNa Allata'ala.