Read Makassar Version – KITTA' MATANGKASA 1 YOHANES 4 Bible Online

1 YOHANES 4 - Makassar Version – KITTA' MATANGKASA bible

1 YOHANES 4

¹Sikamma sari'battangku sannaka kukarimangnginna! Teako patappa' ngasengi tau nakanaya niaki RohNa Allata'ala ri kalenna; mingka pilajari rolong baji'-baji' sollanna akkulle nuasseng angkanaya roh battu kemae anjo niaka ri ke'nanga: Roh battuka ri Allata'ala yareka teai. Nasaba' kamma-kamma anne jai na'bi balle-balle a'jappa mange-mange.

²Kamma anne carana nakkulle nuasseng angkanaya apaka anjo RohNa Allata'ala yareka teai: Inai-nai ammangakui angkanaya anjo Isa Almasi Iami battua ri lino ma'rupatau, iaminjo taua nia' Roh battu ri Allata'ala lalang ri kalenna.

³Mingka inai-nai tena namangakui anjo kammaya mae ri Isa, iaminjo taua tena RohNa Allata'ala ri kalenna. Rohnaji MusunNa Almasi nia' ri kalenna anjo tau kammaya. Le'ba'mi nulangngere' angkanaya laniaki battu anjo roh kammaya, siagang kamma-kamma anne nia'mi lalang ri anne linoa.

⁴Mingka sikamma ana'-anakku, ikau tau battu ngasengko ri Allata'ala assala'nu. Le'ba'mi nubeta na'bi-na'bi balle-ballea, nasaba' Roh niaka ri kau la'bi makoasangangi na roh niaka ri taunna ngaseng anne linoa.

⁵Anjo na'bi-na'bi balle-ballea sangnging passala' linoa nabicara; nipilangngerimi bicaranna ke'nanga ri anne linoa, nasaba' anjo ke'nanga tau battu ri linoa assala'na.

⁶Mingka ikatte anne ana'-ana'Naki' Allata'ala; na inai-nai angngassengi Allata'ala, napilangngeri tommi bicaranta. Inai-nai teai taunNa Allata'ala tena nalaNapilangngeri bicaranta. Kammami anjo carata nakkulle niasseng antekamma sisalana Roh assarea pangngajarang tojeng, siagang roh ampasala oloangai taua.

⁷Sikamma sari'battang sannaka kukarimangnginna! Mae mako kimassing sikamaseang; nasaba' Allata'ala assala'na anjo pangngamaseanga. Inai-nai mangngamaseang, iami ana'Na Allata'ala siagang iami angngassengi Allata'ala.

⁸Tau tenaya namangngamaseang, tanaassengai Allata'ala; nasaba' anjo Allata'ala mangngamaseangi.

⁹Napa'nyatami pangngamaseanNa Allata'ala lalang ri atinta, lanri Nasuromi Ana' sitau-tauNa untu' antama' ri linoa sollanna akkulle nigappa katallassanga tete ri anjo Ana'Na.

¹⁰Iaminne pangngamaseanga: Teai ikatte le'ba' angkamaseangi Allata'ala, mingka Allata'ala angkamaseangki' siagang Nasuroi battu Ana'Na sollanna tete ri Ia nanipammopporang dosa-dosata.

¹¹Sikamma sari'battangku, sannaka kukarimangnginna; punna sanna' bateta nikamaseang ri Allata'ala, musti massing sikamaseang tongki'.

¹² Tena manna sitau le'ba' anciniki Allata'ala; mingka punna massing sikamaseangki', asse'remi Allata'ala mae ri katte siagang a'jari sukku'mi pangngamaseanNa lalang ri kalenta.

¹³Lanri le'ba'mi Napassareang RohNa Allata'ala mae ri katte, jari niassemmi angkanaya asse're maki' lalang katallassanta mae ri Allata'ala, siagang asse'remi Allata'ala mae ri katallassanta.

¹⁴Kalenna ikambe le'ba' anciniki Ana'Na Allata'ala, siagang napabattumi ikambe mae ri tau maraenga angkanaya Iami anjo Ana'Na Nasuro Allata'ala antama' ri linoa untu' a'jari Karaeng Mappasalama' ri anne linoa.

¹⁵Inai-nai ammangakui anjo Isa angkanaya Iami Ana'Na Allata'ala, asse'remi Allata'ala mae ri katallassanna anjo taua; kammayatompa anjo taua asse're tommi lalang tallasa'na mae ri Allata'ala.

¹⁶Niassemmi siagang tappa' maki' mae ri pangngamaseanNa Allata'ala mae ri katte. Anjo Allata'ala Iami mangngamaseang. Inai-nai nikoasai katallassanna ri pangngamaseang, iaminjo taua asse're katallassanna mae ri Allata'ala, siagang asse'remi Allata'ala mae ri katallassanna.

¹⁷Nipa'jari sukkuki pangngamaseanga lalang ri atinta, sollanna nakia'jari barani ri Allo Pangadelanga. La'jari baraniki', nasaba' sangkammami carata attallasa' ri anne linoa siagang caraNa Almasi attallasa'.

¹⁸Inai-nai mangngamaseang, tanaassengami nikanaya malla'; nasaba' anjo pangngamaseang sukkuka napa'lanynya'mi nikanaya malla' lalang ri kalenna taua; nasaba' anjo mallaka nia' passisambunganna siagang hukkunganga.

¹⁹Mangngamaseangki', lanri Allata'ala la'bi riolo angkamaseangki'.

²⁰Punna nia' tau angkana, “Kukamaseangi Allata'ala,” mingka nakabirisi paranna tau, paballe-ballei anjo taua. Nasaba' inai-nai tena nakamaseangi paranna tau, iamintu nacinika matanna, tena olona lakkulle nakamaseang Allata'ala, ia tenaya naciniki.

²¹Lanri kammana, iaminne parenta Napassareanga Almasi mae ri katte: Inai-nai mangngamaseang ri Allata'ala, musti nakamaseang tongi paranna tau.