Read Makassar Version – KITTA' MATANGKASA 1 YOHANES 5 Bible Online

1 YOHANES 5 - Makassar Version – KITTA' MATANGKASA bible

1 YOHANES 5

¹Inai-nai tappa' angkanaya iaminjo Isa, Karaeng Mappasalama' Napa'janjianga Allata'ala, iami Ana'Na Allata'ala. Na inai-nai mangngamaseang ri Manggea, nakamaseang tongi Anaka.

²Lalang kammanami anne nakkulle niasseng angkanaya nikamaseangi ana'-ana'Na Allata'ala, iamintu: mangngamaseangki' mae ri Allata'ala, siagang nipilangngeri sikamma parentaNa.

³ Nasaba' battuanna nikanaya mangngamaseang mae ri Allata'ala, iamintu nipilangngeri sikamma parentaNa. Na anjo sikamma parentaNa tena nabattala' untu' ikatte;

⁴nasaba' sikamma ana'Na Allata'ala akkulle ngasengi nabeta anne lino ja'dalaka. Na anne linoa akkullei nibeta siagang katappakkanta.

⁵Inaika akkulle ambetai lino ja'dalaka? Iaji bawang tau tappaka angkanaya anjo Isa, Iami Ana'Na Allata'ala.

⁶Iaminjo Isa Almasi, antamaka ri anne linoa angngerang je'ne' lanapa'je'neka siagang cera' kamateanNa. Tena naje'ne' bawang Naerang battu, mingka je'ne' siagang cera'. Na KalenNa RohNa Allata'ala a'jari sa'bi angkanaya kammatojengi anjo; nasaba' iaminjo Roh kontutojenga.

⁷Jari, nia' tallu sa'bi:

⁸RohNa Allata'ala, je'ne', siagang cera'; anne tallua sangkamma ngasengi kasa'bianNa.

⁹Tappakki' mae ri kasa'bianna rupataua, mingka jarrekangangi pole kasa'bianNa Allata'ala. Na iaminjo kasa'biang le'baka Napassareang Allata'ala ri passala'na Ana'Na.

¹⁰Lanri kammana, inai-nai tappa' ri Ana'Na Allata'ala, natarimami anjo kasa'bianga lalang ri atinna; mingka inai-nai tena natappa' mae ri Allata'ala, nacini' paballe-ballemi Allata'ala, nasaba' tena napatappaki bicaranNa Allata'ala ri passala'na anjo Ana'Na.

¹¹ Iaminne kasa'bianna: Nasare maki' Allata'ala katallassang sitojennaya siagang mannannunganga, siagang Ana'Nami kabattuanna anjo katallassanga.

¹²Inai-nai antarimai anjo Anaka, natarimami anjo katallassanga; na inai-nai tena natarimai anjo Ana'Na Allata'ala, tenamo natarimai anjo katallassanga.

¹³Kutulisi'mi anne suraka mae ri kau ngaseng tau tappaka ri Ana'Na Allata'ala, sollanna nuasseng angkanaya nutarimami anjo katallassang sitojennaya siagang mannannunganga.

¹⁴Siagang barani maki' andallekang ri Allata'ala, lanri tappakki' angkanaya laNaiyoi pappala' doanganta; manna pole apa nipala' mae ri Ia laNaiyoi assala' situruki ero'Na anjo pappalatta.

¹⁵Nasaba' niassengi angkanaya lanipilangngeriki' punna appalakki' ri Ia, jari niasseng tommi angkanaya laNasareangki' sikamma apa nipalaka ri Ia.

¹⁶Punna nia' nucini' parannu tu Karisteng a'gau' dosa natenaja nangngerang kamateang, paralluko appala' doang ri Allata'ala; nalanisaremo katallassang anjo taua. Anne natabaya iamintu tau a'gau' dosaya, mingka tenaja nangngerang kamateang. Mingka nia' gau' dosa angngerang kamateang; tena nakukana musti appala' doangko mae ri Allata'ala lanri anjo passalaka.

¹⁷Sikamma panggaukang salaya dosa ngaseng, mingka nia' dosa tenayaja nangngerang kamateang.

¹⁸Niassengi angkanaya sikontu tau a'jariamo ana'-ana'Na Allata'ala, tenamo natuli a'gau' dosa ija; nasaba' nijagai ri Ana'Na Allata'ala siagang takkulleami I Ja'dala' a'gau' apa-apa mae ri ia.

¹⁹Niassemmi angkanaya ikatte anne tau battuki' ri Allata'ala, manna pole nanikoasaimo sikontu linoa ri I Ja'dala'.

²⁰Niassemmi angkanaya battumi Ana'Na Allata'ala siagang le'ba' maki' Napapahangngiang sollanta tappa' mae ri Allata'ala sitojennaya. Asse're maki' mae ri Allata'ala sitojennaya lalang ri katallassanta, kammayatompa asse're tommaki' mae ri Ana'Na, iamintu Isa Almasi. Iami Allata'ala sitojennaya, siagang Iami katallassang sitojennaya siagang mannannunganga.

²¹Sikamma ana'-anakku, pakabellai kalennu battu ri sikamma barhalaya!