Read Makassar Version – KITTA' MATANGKASA HAKING-HAKING 16 Bible Online

HAKING-HAKING 16 - Makassar Version – KITTA' MATANGKASA bible

HAKING-HAKING 16

¹Ri se'reang allo a'lampami Simson mae ri Gaza. Anjoreng assigappai siagang sitau baine sala. Nampa mangemo assikantinroang siagang anjo bainea.

²Nalangngere'mi kabara'na taua ri Gaza angkanaya niaki Simson anjoreng. Nakurummi ke'nanga anjo tampaka, nampa natayang sila'busu' bangngi ri pakke'bu' lompona kotaya. Mingka tena apa-apa nagaukang ke'nanga anjo bangngia lanri napikkiriki ke'nanga angkana, “Ammumbapi sallang alloa nampa nibuno.”

³Mingka tena nattinro Simson sa'genna bari'basa'. Ri tangngana bangngia ambangummi nampa a'lampa mange ri pakke'bu' lompona kotaya. Nalakka' ngasemmi pakke'bu'na nampa napisang naerang nai' ri cappa'na bulu' ba'leanna Hebron.

⁴Le'baki anjo tu'guru' ero'mi Simson mae ri se'reang baine battua ri Lappara' Sorek. Niarengi Delila anjo bainea.

⁵Nia'mo lima tu anna'gala' koasa ri Filistin battu mange ri anjo bainea. Nakanamo ke'nanga, “Nyonyo'mi Simson sollanna ero' ampauangko angkana apa rahasia kagassinganna, siagang antekamma carana nakkulle tappela' anjo kagassinganna. Jari akkullemi battu ikambe untu' ansikkoki nanibeta. Nisarepako sallang doe' pera', massing-massingki' assareko sisa'bu assibilangngang sitau.”

⁶Jari nakanamo Delila ri Simson, “Apa saba'na nanugassing kamma Simson? Apapi nisikkokangko sollanna tappela' anjo kagassingannu? Pauang sa' bedeng rahasiana!”

⁷Appialimi Simson angkana, “Punna nisikkokka tuju otere' pana beru, ia tenayapa nakalotoro' dudu, la'jari lammama' sangkamma tau biasaya.”

⁸Jari nisaremi Delila ri tukoasana Filistin tuju otere' pana beru, tenayapa nakalotoro' dudu. Nampa lalang attayanna tu Filistin ri kamara' maraenga, nisikko'mi Simson ri Delila siagang anjo otereka. Le'baki anjo ammarrammi Delila, angkana, “Simson! Niaki tu Filistin battu!” Natappu'-tappu'mi Simson anjo otere' panaya silalonna. Tappu'mi anjo otereka sanrapang bannang natabaya pepe'. Tenapa nakaassengang rahasia kagassinganna Simson.

¹⁰Nakanamo Delila ri Simson, “A'balle-balleko! Nukarek-karenaija'. Pauanga', otere' apa akkulle nipake ansikkokko!”

¹¹Appialimi Simson angkana, “Punna nisikkoka' siagang otere' beru tenayapa nale'ba' nipake la'jari lammama' sangkamma tau biasaya”

¹²Lalang attayanna tu Filistinga ri kamara' maraenga, angngallemi Delila siapa are otere' beru, nampa nasikko' Simson. Le'baki anjo ammarrammi angkana, “Simson! Niaki tu Filistin battu.” Mingka natappu'mi Simson anjo otere' niaka ri limanna sangkamma tau annappuka bannang.

¹³Nakanamo Delila ri Simson, “Nukarek-karenaima' pole! A'balle-balleko. Pauanga' otere' apa akkulle nipake ansikkokko!” Appialimi Simson angkana, “Punna nipasiotere' uukku tuju lawara' siagang bannang niaka ri pakkakasa' tannunga, nampa nisikkokang mae ri kayu pakkakasa' tannunga, la'jari lammama' sangkamma tau biasaya.”

¹⁴Jari nipa'jari attinromi Simson ri Delila. Nampa napasiotere' tuju lawara' uu'na Simson siagang bannang niaka ri pakkakasa' tannunga. Le'baki anjo nasikko'mi mae ri anjo kayu pakkakasa' tannunga. Nampa ammarrang angkana, “Simson! Niaki tu Filistin battu!” Ambangummi Simson nampa nabeso' uu'na sa'genna ta'lappasa' battu ri anjo pakkakasa' tannunga.

¹⁵Nakanamo Delila, “Nukana nungaia', padahala' bellai pa'mai'nu ri nakke! Pintallumma' nukarek-karenai. Sa'genna kamma-kamma anne tenapa nanupauanga' apa saba'na nanugassing kamma.”

¹⁶Allo-allona tuli a're'ngese' Delila, sa'genna lanremo Simson allangngereki.

¹⁷Kala'busanna nasungkemi rahasiana Simson. Nakanamo Simson, “Tena le'bakapi nipolong uukku. Le'ba'ma' nipassareang ri Allata'ala a'jari tau nipileNa. Appakkaramula ri lassukku a'jari tuattinja' memamma'. Punna nipolong uukku, tappela'mi kagassingangku, la'jari lammama' sangkamma tau biasaya.”

¹⁸Naassemmi Delila angkanaya nasungkemi rahasia ri atinna Simson. Jari akkirimmi kabara' mae ri tukoasana tu Filistin angkana, “Battu ngasemmaki' pole sikali. Nacaritami rahasiana Simson mae ri nakke!” Battumi ke'nanga na napangngerangngammo doe' Delila.

¹⁹Le'baki anjo nisapu-sapumi Simson ri Delila sa'genna attinromi ri bonggana. Nampa akkio' tau nanasuro polong uu'na Simson. Nampa appakkaramulamo nasikko' Simson, lanri tappela'mi kagassinganna.

²⁰Nampa ammarrang angkana, “Simson! Niaki battu tu Filistin!” Ambangummi Simson nanapikkiri' kapang angkana akkullei tallappasa' sangkamma allalo-lalloa. Tanaassengai angkanaya nibokoimi ri Batara.

²¹Battumi tu Filistin anjakkalaki nampa napasulu' lisere' matanna. Nierammi ri ke'nanga mae ri Gaza, na nasikko' siagang rua rante tambaga. Nampa napantama' ri tarungkua. Nisuromi anjoreng anjama anggiling.

²²Mingka lalanna anjo wattua appakkaramulami attimbo poleang uu'na.

²³Ri se'reang wattu a'rappungammi sikamma tukoasana tu Filistin. Eroki ke'nanga assua'-suara' siagang assare koro'bang mae ri Dagon, iamintu rewata nasombaya ke'nanga. Akkelong-kelommi ke'nanga angkana, “Nasaremaki' pammetang mae ri Simson, musunta!”

²⁴Lalang a'rannu-rannuna ke'nanga nanakanamo ke'nanga, “Erangi Simson mae nania' nipare' pammakkallang!” Jari niallemi Simson ri ke'nanga battu ri tarungkua, nampa napare' kakka'-kakkallang. Nasuromi ammenteng ri alla'na rua benteng tembo' lompo. Nacini'na ke'nanga Simson, akkelong-kelommi ke'nanga mamuji-muji ri Dagon, nakana, “Nasaremaki' pammetang rewatanta mae ri musu le'baka ampanraki pa'rasanganta siagang ammunoa sijaiang tau bansata!”

²⁶Nakanamo Simson ri anjo ana' bura'ne anrenrengiai, “Lappassangi limangku nakukkulle anna'gala' ri benteng pattula' lompona anne bangunanga, nasaba' erokka' ammanjeng anjoreng.”

²⁷Anjo bangunanga sanna' rassina tau. Manna limaya tukoasaya ri Filistin nia' tongi anjoreng. Na ri loteng rateanna anjo bangunanga nia' kira-kira 3.000 tau. Accini'-cini' ngasemmi ke'nanga siagang nacau-caumi Simson.

²⁸Anjo wattua appala' doammi Simson. Nakana, “O Batara Kaminang Tinggia, poro Kiu'rangi laloa'. Kisare laloa' pole kagassingang anne sikalia, o Allata'ala, sollanna lalang kammana anne akkullei kubalasa' tu Filistin le'baka ampasuluki lisere' matangku”.

²⁹Le'baki anjo nata'gala'mi Simson anjo ruaya benteng pattula' lompona bangunanga. Nampa atu'dang rua-rua limanna ri anjo benteng pattula' lompoa.

³⁰Ammarrammi angkana, “Lappassamma' mate siagang ngaseng anne tu Filistin!” Na nagassingimo ansorongi anjo benteng-bentenga sa'genna rumbang. Na natujumo anjo limaya tukoasana tu Filistin, siagang sikamma tau niaka anjoreng. Mate tongi Simson. Mingka anjo ri wattu kamateanna jaiangangi tau nabuno na anjo ri lalang tallasa'na.

³¹Nampa battumo sikamma sari'battanna siagang sikontu bija-bijanna untu' angngallei maya'na. Naerammi ke'nanga maya'na ammotere' nampa natarawang ilalang ri jera'na Manoah, iamintu manggena. Anjo jeraka tampa'na nipariallaki ri Zora siagang Esytaol. Ruampulo taungi Simson a'jari pamimping ri Israel.