Read Makassar Version – KITTA' MATANGKASA HAKING-HAKING 17 Bible Online

HAKING-HAKING 17 - Makassar Version – KITTA' MATANGKASA bible

HAKING-HAKING 17

¹Nia' sitau bura'ne niarenga Mikha. Anjorengi ammantang ri bulu'na Efraim.

²Ri se'reang allo nakanamo ri amma'na, “Amma', ri wattunna tappela' doe' peratta sisa'bu sibilangngang, kulangngereki kitunra palukkaka. Anne doetta amma'! Inakkemi allukkaki.” Appialimi amma'na nakana, “Poro Nabarakkakiko Batara, na'.”

³Napoterammi Mikha anjo doeka mae ri amma'na. Na nakanamo amma'na, “Sollanna nuta'lappasa battu ri anjo tunra kupaua na', kupassareammi anne peraka mae ri Batara untu' nipake appare' patung kayu, nilapisika pera'. Jari kupoterangi anne doeka mae ri kau.”

⁴Ri wattunna napoterang Mikha anjo doeka mae ri amma'na, naallemi amma'na ruambilangngang battu ri anjo doeka. Nampa napassareang mae ri sitau tukang pera'. Nampa nasuro anjo tukanga appare' se're patung kayu nilapisika siagang anjo peraka. Nampa niboli' anjo patunga ri balla'na Mikha.

⁵Nakalenna untu' Mikha nia'mo se're tampa' panynyombanna. Appare'mi siapa are patung barhala siagang silawara' kaeng pannongko' barambang bajunna Imang lompoa. Nampa naangka' sitau ana'na a'jari Imang.

⁶ Anjo wattua tena karaenna tu Israel, massing-massing taua para nagaukammi apa nakanaya tojeng.

⁷Ia todong anjo wattua nia' se're turungka battu ri suku Lewi. Anjorengi ri Betlehem ri daera Yehuda ammantang riolo.

⁸Mingka kamma-kamma anne nabokoimi anjo kotaya, na'lampa a'boya pammantangang maraeng. Lalang ri pa'jappanna anjo battumi ri balla'na Mikha ri daera bulu'na Efraim.

⁹Akkuta'nammi Mikha ri ia angkana, “Tu battu kemaeko sari'battang?” Appialimi anjo taua angkana, “Inakke tu Lewi, battua' ri Betlehem ri Yehuda. A'boya-boya' anne pammantangang.”

¹⁰Nakanamo Mikha, “Ammantammako siagang inakke anrinni sollannu a'jari imang siagang assare pappakainga' mae ri kambe. Kusarepako sampulo doe' pera' sitaung kammayatompa care-care siagang kanre”.

¹¹Situjumi anjo turungka battua ri Lewi. Na niangka'mo a'jari imang ri Mikha. Ammantammi ri balla'na Mikha, na nipare' kamma ana' kalenna Mikha.

¹³Nakanamo Mikha, “Kamma-kamma anne tappa'ma' angkanaya laNasarea' kabajikang Batara, lanri nia'mo sitau tu Lewi a'jari Imangku.”