Read Makassar Version – KITTA' MATANGKASA HAKING-HAKING 2 Bible Online

HAKING-HAKING 2 - Makassar Version – KITTA' MATANGKASA bible

HAKING-HAKING 2

¹A'lampami Malaeka'Na Batara battu ri Gilgal mange ri Bokhim. Na nakana mae ri tu Israelka, “Le'ba' mako Kupasulu' battu ri butta Mesir, nampa Kuerangko mange ri pa'rasangang le'baka Kupa'janjiang mae boe-boenu. Le'ba' tommako Kupauang angkana, ‘Tena nalaKutappu' anjo passikko' janjingKu mae ri kau.

² Jari takkulleako appare' passikko' passijanjiang siagang tau niaka ammantang anrinni ri pa'rasanganga. Sikamma tampa' pakkoro'bangnganna ke'nanga musti nurumbangi'.’ Mingka tena nugaukangi anjo apa Kupassuroanga. Ba'lalo ta'bale'na nugaukanga!

³Jari kamma-kamma anne pilangngeri! Tena nalaKubongka tu niaka ri anne pa'rasanganga punna tena nu'bundu' siagang ke'nanga. La'jari bali ke'nanga mae ri kau. Na lanaalleko sikko' sa'gennu amminawang turu' ansombai rewata-rewatana ke'nanga.”

⁴Le'baki napabattu malaekaka anjo birittaya, angngarru' lompo ngasemmi bansa Israelka.

⁵Iaminjo saba'na naniareng anjo tampaka Bokhim (battuanna ke'nanga anggarruka). Nampa assaremo tu Israelka koro'bang mae ri Batara anjoreng ri tampaka.

⁶Nalappassannamo Yosua tu Israelka a'lampa, massing a'lampami ke'nanga ampammantangi anjo butta a'jaria bageanna massing-massing ke'nanga.

⁷Ri tallasa'na Yosua anynyomba ngasengi tu Israelka mae ri Batara. Na ri matenamo Yosua, tuli anynyombana ke'nanga mae ri Batara, iamintu lalang nipimpinna ke'nanga ri tau ancinikai kalenna sikamma gau' malompo Nagaukanga Batara untu' bansa Israelka.

⁸Anjo Yosua ana'na Nun, atanNa Batara, sibilangngang assampulo taung umuru'na nampa mate.

⁹ Anjorengi ri tampa' kalenna nitarawang. Iamintu ri Timnat-Serah, ri daera monconna Efraim, warakkanna Moncong Gaas.

¹⁰Nampa mate ngaseng tommi sikontu tau naaganga se're jammang. Mingka ana'-ana' jammang ribokoangannaya tenamo namangngasseng mae ri Batara, nasaba' tanakasiakkai ke'nanga apa le'baka Nagaukang Batara mae ri bansa Israelka.

¹¹Nampa dorakamo bansa Israel mae ri Batara. Tenamo nanynyomba ke'nanga mae ri Batara, Allata'alana boe-boena ke'nanga, iamintu Allata'ala le'baka angngerangi ke'nanga assulu' battu ri butta Mesir. Appakkaramulami ke'nanga anynyomba mae ri rewata niarenga Baal siagang Asytoret kammayatompa rewata-rewata maraengannaya, nasombaya bansa-bansa niaka ri tammulilina ke'nanga. Jari larromi Batara mae ri ke'nanga. Na Nalappassammo garombolanga ambunduki siagang anrampoki ke'nanga. Natena sikali pakkullena ke'nanga andallekangi anjo musu-musu battua ri tammulilina ke'nanga.

¹⁵Ia namange ke'nanga a'bundu', tuli nibaliangi ke'nanga ri Batara, situru' apa le'bakamo nipappakaingakkang mae ri ke'nanga. Jari nitujumi ke'nanga ri susa lompo.

¹⁶A'mole-molemi Batara assarei ke'nanga pamimping untu' allappassangi ke'nanga battu ri garombolang parampo'.

¹⁷Mingka tena najampangi ke'nanga anjo pamimpinga. Anynyombai ke'nanga mae ri rewata-rewata maraenganga, siagang tena namajarre' ke'nanga mae ri Batara. Tena naturuki boe-boena ke'nanga, ia mannurukia ri sikamma parentaNa Batara.

¹⁸Punna nia' Napassareang Batara se're pamimping mae ri bansa Israelka tuli Natulummi Batara anjo pamimpinga. Na lalang ri tallasa'na anjo pamimpinga, tuli nilappassanna ke'nanga battu ri musu-musunna. Mangngamaseangi mae ri ke'nanga punna Nalangngere' ke'nanga akkunrareng lanri nisessana siagang nijallakkanna ke'nanga.

¹⁹Mingka punna matemo anjo pamimpinga, a'jari la'bi kodimi panggaukanna ke'nanga natau jammang rioloangannaya. Napare' atami kalenna mae ri rewata-rewata maraenganga, siagang anynyombai ke'nanga mae ri anjo rewata-rewataya. Ammotereki ke'nanga mae ri kabiasang-kabiasang ja'dala'na ke'nanga, na taerokai ke'nanga ampinrai anjo gau'na.

²⁰Iaminjo saba'na nasanna'mo larroNa Batara mae ri umma' Israel. Angkanami, “Le'ba'mi Kupassuroang ri boe-boena anne ke'nanga sollanna nata'gala' jarre' anjo parjanjiangKu siagang ke'nanga. Mingka natappu'mi anne bansaya passikko'na anjo parjanjianga, nadakkaimi ke'nanga parentaKu.

²¹Kamma-kamma anne taerokaMa' ambongkai manna pole bansa apaya ia niaka ija ri anne pa'rasanganga ri wattu matena Yosua.

²²LaKupakei anjo bansa-bansaya untu' ancobai bansa Israel, sollanna akkullei Kuasseng angkanaya maka ero'ji yareka tenamo naero' ke'nanga anturuki sikamma parentaKu.”

²³Iaminjo saba'na Nataeroka Batara assarei pammetang Yosua mae ri anjo bansa-bansaya. Ba'lalo Nalappassammi ke'nanga ammantang ri anjo pa'rasanganga, tena naNabongka memang ke'nanga.