Read Makassar Version – KITTA' MATANGKASA HAKING-HAKING 3 Bible Online

HAKING-HAKING 3 - Makassar Version – KITTA' MATANGKASA bible

HAKING-HAKING 3

¹Eroki Nacoba Batara bansa Israel tenaya nale'ba' nakasia' pa'bundukanga ri Kanaan. Jari Nalappassammi ammantang siapa are bansa ri anjo pa'rasanganga.

²NaNagaukang Batara kammaya, lanri ero'Naji bawang Naajara' a'bundu' sikontu turunganna bansa Israel, la'bipa mae ri ia ke'nanga, tenayapa nale'ba' amminawang a'bundu'.

³Ia bansa-bansa niaka ija ammantang ilalang ri limaya kotana Filistin, sikontu bansa Kanaan, bansa Sidon siagang bansa Hewi ammantanga ri moncong-monconna Libanon appakkaramula battu ri Moncong Baal-Hermon sa'genna mange ri agang a'lampa mangea ri Hamat.

⁴Nia'mi ke'nanga anjoreng untu' a'jari paccoba mae ri bansa Israel. Lanri kammana akkullemi niasseng angkanaya maka naturukiji tu Israel parenta-parenta le'baka Napassareang Batara mae ri boe-boena ke'nanga tete ri Musa.

⁵Iaminjo saba'na natuli nia' ijapa tu Kanaan, tu Het, tu Amori, tu Feris, tu Hewi siagang Yebus ammantang ri anjo pa'rasanganga sipammantangang siagang umma' Israel.

⁶A'bengkoro'mi umma' Israel a'bunting siagang anjo bansa-bansaya, siagang amminawang turu' anynyomba ri rewata-rewatana ke'nanga.

⁷Dorakami umma' Israel mae ri Batara, Allata'alana ke'nanga. Takkaluppami ke'nanga mae ri Ia, sa'genna anynyombami ke'nanga mae ri berhala-berhala Baal siagang Asyera.

⁸Jari larromi Batara mae ri umma' Israel. Nibalang parekammi ke'nanga nanibeta ri Karaeng Kusyan-Risyataim battua ri pa'rasangang Mesopotamia. Sagantuju taungi anjo karaenga angkoasai ke'nanga.

⁹Jari akkio'mi umma' Israel appala' tulung ri Batara. Na Napassareammo Batara sitau niarenga Otniel untu' allappassangi ke'nanga (Otniel ana'nai Kenas andi'naya Kaleb).

¹⁰Anjo Otniel nipimpingi ri RohNa Batara sa'genna a'jarimo pamimping mae ri umma' Israel. A'lampami mange a'bundu'. Na nisaremo pakkulle sa'genna nabeta anjo karaeng battua ri Mesopotamia.

¹¹Na' jari amammo anjo pa'rasanganga patampulo taung sallona. Nampa matemo Otniel.

¹²Dorakami pole umma' Israel mae ri Batara. Sa'genna Napa'jari la'bi kassakangammo Batara karaeng battu ri Moab niarenga Eglon. La'bi kassakangammi na umma' Israel.

¹³Asse'remi Karaeng Eglon siagang bansa Amon na Amalek sa'genna nabetamo umma' Israel. Naallemi ke'nanga kota Yerikho, iamintu kota kormaya.

¹⁴Sampulo assagantuju taung sallona nijaja umma' Israel ri Karaeng Eglon.

¹⁵Mingka ri wattunna akkio' umma' Israel appala' tulung ri Batara, nisaremi ke'nanga sitau niarenga Ehud, untu' allappassangi ke'nanga. Anjo Ehud tau kairi. Ana'nai Gera, battua ri suku Benyamin. Iami biasa angngantarangi Karaeng Eglon passare mustia nabayara' umma' Israel.

¹⁶Ri se'reang wattu appare'mi Ehud sipappa' pa'dang tarang pimbali, kira-kira a'biringi sitangnga metere' la'buna. Nampa napasappi' anjo pa'danga ri sa'ri kannanna, naparilalanganna bajunna.

¹⁷Nampa a'lampa angngerangi pa'bayara' battua ri umma' Israel mae ri Karaeng Eglon. Anjo karaenga sanna' co'mo'na.

¹⁸Le'ba'na napassareang Ehud anjo pa'bayaraka, nasuromi Ehud ammotere' sikamma anjo tau a'buleka doe' bulaeng.

¹⁹Mingka Ehud ammantangi kale-kalenna ri wattunna anrapi' ri batu-batu niukirika ri ampi'na Gilgal. Nampa ammotere' mange ri Karaeng Eglon. Anjo wattua niaki Karaeng Eglon lalang ri kamara' dinginga, irate ri loteng balla' lompoa. Nakanamo Ehud ri Eglon, “O karaeng tu nipakala'birikku! Nia' kabara' rahasia ero' napabattu atanta mae ri katte.” Nanakanamo anjo karaenga: “Tayangi rolong.” Nampa nasuro ngaseng sikontu atanna assulu'. Sa'genna iamami kalenna siagang Ehud ammantang. Nampa a'reppese'mo Ehud mae ri anjo karaenga, sitabanga ammempo. Angkanami, “Nia' kabara' battu ri Allata'ala untu' ikatte.” Nalangngere'na anjo ammentemmi anjo karaenga.

²¹Na nabi'bu'mo silalonna pa'danna Ehud siagang lima kairinna battu ri sa'ri kananna. Nampa napatobo' lantang antama' ri battanna anjo karaenga. Naanjo pa'danga manna pangngulunna tallang ngasengi sa'genna antama' ri parru' jannana anjo karaenga. Annarrusuki sa'genna mae ri boko anjo pa'danga. Nalappassammi Ehud ammantang anjo pa'danga anjoreng.

²³Nampa assulu' na natongko' siagang nakonci anjo pakke'bu' kamaraka.

²⁴Le'baki anjo a'lampami. Ri wattunna battu ngaseng atanna anjo karaenga na narapikang takkonci ngaseng pakke'bu'na kamaraka, nakanai ke'nanga nia' iji karaenga lalang, sitabangi mae ri boko.

²⁵Risallonamo attayang ke'nanga natena ija nasungkei karaenga pakke'buka, lannasa'mi ke'nanga. Angngallemi ke'nanga konci nampa nasungke anjo pakke'buka. Nacini'mi ke'nanga anjo karaenga mate, ammonrang rawa ri daparaka.

²⁶Lalang attayanna ija ke'nanga sumpaeng, anjo wattua larimi Ehud alallo anjoreng ri batu-batu niukirika.

²⁷Battuna mange ri daera monconga ri Efraim, akkaro-karomi angngalle tarompe' nampa napasa'ra untu' angkioki tu Israelka mange a'bundu'. Nabattumo ke'nanga nampa napimping anjo ke'nanga naung battu ri daera monconga.

²⁸Angkanami ri ke'nanga, “Amminawangko ri nakke. Nabetami Batara musu-musunnu iamintu tu battua ri Moab.” Jari naummi umma' Israel battu ri daera monconga, nipimpimmi ri Ehud. Nabetami nampa naalle ke'nanga tampa' pa'limbanganna tu battua ri Moab ri Binanga Yordan. Tena manna sitau anjo musunna ke'nanga nilappassang salama' a'limbang.

²⁹Nia' kira-kira 10.000 tantara nipileina tu Moab mate, nibuno ri ke'nanga ri lalang ri anjo pa'bundukanga. Tena sikali anjo musua ta'lappasa'.

³⁰Anjo alloa nibetami tu Moab ri tu Israelka. Naamammo anjo pa'rasanganga sagantujupulo taung sallona.

³¹Pamimping ri bokoangannaya iamintu niarenga Samgar, ana'na Anat. Barjuang tommi na nalappassang tu Israel. Nia' 600 tu Filistin nabuno. Natakkang pakkalawaki sapi bawang napake ambunoi anjo ke'nanga.