Read Makassar Version – KITTA' MATANGKASA HAKING-HAKING 4 Bible Online

HAKING-HAKING 4 - Makassar Version – KITTA' MATANGKASA bible

HAKING-HAKING 4

¹Ri matenamo Ehud, dorakami pole bansa Israel mae ri Batara.

²Jari nibalang parekkammi ke'nanga ri Batara, na nibeta ri Yabin, iamintu karaeng Kanaan, ammantanga ri kota Hazor. Ia panglimana ke'nanga niarengi Sisera, ammantanga ri Haroset-Hagoyim.

³Nia' 900 kareta bassi naballaki Yabin untu' napake a'bundu'. Ruampulo taungi najaja siagang nasessa tu Israel. Nampa akkio'mo tu Israel appala' tulung ri Batara.

⁴Anjo wattua a'jari pamimpinga ri Israel, iamintu sitau na'bi baine niarenga Debora, bainenna Lapidot.

⁵Biasai ammempo Debora irawanganna poko' kormaya, niaka ri alla'na kota Rama siagang kota Betel, ri daera monconna Efraim. Anjoremmi battu tu Israel mange appala' pappakainga' battu ri ia.

⁶Ri se'reang allo, nasuro kio'mi tu niarenga Barak, ana'naya Abinoam, battua ri kota Kedes, ri daera Naftali. Nampa nakanamo ri Barak, “Iaminne parentaNa Batara, Allata'alana tu Israel mae ri kau: ‘Passe'rei 10.000 jaina tu bura'ne battua ri suku Naftali siagang suku Zebulon. Nampa nuerang ke'nanga mange ri Moncong Tabor.

⁷LaKupabattui sallang Sisera mae ri kau ri Binangana Kison, siagang tantarana, kammayatompa kareta-kareta bundu'na untu' ambundukiko. Mingka laKusareko pammetang lalang ri anjo pa'bundukanga.’ ”

⁸Angkanami Barak ri Debora, “Punna amminawanjako, ero'ja' a'lampa. Mingka punna tena, tena todong nakuero' a'lampa.”

⁹Appialimi Debora angkana, “Baji'mi, lamminawanga'! Mingka u'rangi teai kau sallang langgappa pappakala'biri'. Sitau baine laNapake Batara ambetai Sisera.” Jari a'lampami Debora siagang Barak mange ri Kedes.

¹⁰Anjo wattua nia' 10.000 tau amminawang ri Barak siagang Debora.

¹¹Anjo wattua nia' se're tau nikana Heber tu Keni, nasa'la'mi kalenna battu ri bansana (anjo bansa Keni turungang battu ri Hobab, ipara'na Musa). A'lampami Heber appaenteng siapa are jaina kema rampi'na poko'-poko' niarenga poko' terpentin ri Zaanaim, tena nabella battu ri Kedes.

¹²Nalangngere'na Sisera angkana a'lampami Barak mange ri Tabor,

¹³akkaro-karomi napa'rappungang anjo salapang bilangnganga kareta bundu' bassina. Kammayatompa napasse're tommi sikontu tantarana. Nampa naerang ke'nanga battu ri Haroset-Hagoyim mange ri Binanga Kison.

¹⁴Nampa nakanamo Debora ri Barak, “Maju mako! Batara ampimpingko. Anne alloa Nasareko pammetang mae ri Sisera.” Jari naummi Barak battu ri Moncong Tabor, siagang anjo sampuloa sa'bu taunna.

¹⁵Nampa nabunduki Sisera. Na nipa'jari kacomo ri Batara anjo tantarana Sisera siagang kareta-kareta bundu'na. Sa'genna naummi Sisera battu ri kareta bundu'na, nampa lari a'jappa bangkeng.

¹⁶Naondammi Barak anjo kareta-kareta bunduka siagang tantara musua sa'genna mange ri Haroset-Hagoyim. Nampa nabuno ngaseng sikontu tantarana Sisera. Tena manna sitau nalappasang attallasa'.

¹⁷Na sitabanna anjo larimi Sisera mange ri kemana Yael, iamintu bainenna Heber, anjo tu Kenia. Nasaba' anjo Karaeng Yabin battu ri Hazor, agangi siagang bija-bijanna Heber.

¹⁸Ri wattunna battu Sisera, niruppaimi ri Yael. Nakana, “Maeki', antamakki' ri kemaku; tea' maki' mallaki.” Jari antama'mi Sisera ri anjo kemaya. Nampa natongko' Yael siagang kaeng gordeng sollanna taccokko.

¹⁹Nakanamo Sisera ri Yael, “Tulunga', nanusaresa' sike'de' je'ne' inung, katurere dudua'.” Jari angngallemi Yael guci pammolikang je'ne' dadi'na, nampa nasarei angnginung Sisera. Le'baki anjo natongkokimi pole kaeng gordeng.

²⁰Nampa nakanamo Sisera ri Yael, “Mangeko ammenteng ri timungang kemaya. Punna nia' tau battu nakkuta'nang ri kau apaka nia' tau anrinni, pauangi angkana tena.”

²¹Lanri sanna'na mangnganna, ta'do'do'mi Sisera sa'genna attinro jannang. Angngallemi Yael se're palu-palu siagang patto' kema, nampa palang-palang anreppessi Sisera. Nampa napatinting anjo pattoka ri pilisi'na Sisera sa'genna annarrusu' naung ri buttaya. Kammaminjo nanibunomo Sisera ri Yael.

²²Ri wattunna battu Barak amboyai Sisera niruppaimi ri Yael na nakanamo ri ia, “Maeki', nakupaccinikangki' anjo tau kiboyaya.” Antama'mi Barak siagang Yael. Nacini'mi Sisera matemo ammonrang rawa ri buttaya siagang nia' patto' tattinting ri pilisi'na.

²³Anjo alloa nisaremi pammetang tu Israelka mae ri Yabin, karaeng Kanaan.

²⁴Pila' nijallakkammi anjo karaenga, sa'genna kala'busanna lanynya'mi.