Read Makassar Version – KITTA' MATANGKASA HAKING-HAKING 8 Bible Online

HAKING-HAKING 8 - Makassar Version – KITTA' MATANGKASA bible

HAKING-HAKING 8

¹Na nakanamo tu Efraim ri Gideon, “Angngapa natena nukio' tongi ikambe ri wattunnu a'lampa ambunduki tu Midianga? Apa saba'na nuppakamma ri kambe?” Kammami anjo batena a'moro-moro ke'nanga mae ri Gideon.

²Mingka appialimi Gideon angkana, “Tena nasiapa anggaranna apa kugaukanga na ia apa nugaukanga ngaseng. Manna nasike'de'ja anjo apa nugaukanga, mingka anjo apa sike'deka lompoangngangi anggaranna na anjo nagaukanga sikontu taungku.

³ Ikau ngasemmi nisare koasa battu ri Allata'ala sa'genna akkulle nubuno Oreb siagang Zeeb, anjo ruaya pamimpinna tu Midian! Punna nibilangi anjo, apa jasaku inakke?” Le'baki akkana kamma Gideon, ammarimi larro ke'nanga.

⁴Anjo wattua battumi Gideon siagang anjo tallum bilangnganga taunna ri ba'leanna Binanga Yordan. Mangngang sikalimi ke'nanga mingka tuli naondanna ija musunna.

⁵Nampa battumi ke'nanga mange ri Sukot, anjoreng nakanamo Gideon ri tau ammantanga ri anjo kotaya, “Tulunga' nanusare sike'de' kanre taungku sanna'mo mangnganna ke'nanga na nampa laniondangija Zebah siagang Salmuna, karaenna anjo tu Midian.”

⁶Mingka appialimi pamimping-pamimping niaka ri Sukot angkana, “Tenapa nanujakkalaki Zebah siagang Salmuna, nanuppala' ngasemmo kanre! Apa matu-matunna nisare kanre taunnu?”

⁷Nanakanamo Gideon, “Baji'mi! Sallang punna Nasarema' pammetang Batara mae ri Zebah siagang Salmuna, lakucambo' ngasengko cambo' katinting battua ri parang kassika!”

⁸Napannarrusu'mi pa'jappana Gideon, sa'genna anrapi' mange ri Pnuel. Anjoreng appala' tommi kanre untu' taunna. Mingka sangkamma le'baki pappialinna taua anjoreng siagang taua ri Sukot.

⁹Jari nakanamo Gideon ri ke'nanga, “Lammoterekka' sallang siagang salama'. Na anjo wattua lakurumbangi menarana anne kotaya!”

¹⁰Lalanna anjo wattua nia'mi Zebah siagang Salmuna kammayatompa sikontu tantarana ri Karkor. Sikontuna anjo tantarana tu parang kassika nia' mamo 15.000 tassesa. Nia'mo 12.000 tantarana mate.

¹¹Natulakkammi Gideon pa'baeng-baeng parang kassi' rayanganna Nobah siagang Yogbeha. Nampa napata'bangka nabunduki musunna.

¹²Na anjo ruaya karaeng, iamintu Zebah siagang Salmuna, larimi mingka niondangi ri Gideon, nanajakkala' ke'nanga. Sa'genna lussa' ngasemmo tantarana ke'nanga.

¹³Nampa lalang pa'jappanna ammotere' battu ri pa'bundukanga anjoremmi ri pangngambikang Heres angngolo Gideon.

¹⁴Anjoreng nia'mo se're tu rungka battu ri Sukot najakkala'. Nampa napakkuta'nangang areng-arenna tau a'jari pamimpinga ri Sukot. Natulisi' ngasemmi areng-arenna ke'nanga nampa nasareang Gideon. Nia' 77 tau jaina.

¹⁵Le'baki anjo a'lampami Gideon amboyai pamimping-pamimpinga ri anjo kotaya. Nakanamo ri ke'nanga, “Tantu nuu'rangi ngasengiji ri tenana nanuero' antulunga', lanri tenanapa nakujakkalaki Zebah siagang Salmuna. Sai kammai anjo? Taerokako assarea' kanre siagang taungku nanuasseng angkanaya sanna' ngaseng mangnganna ke'nanga anjo wattua. Anne cini'mi Zebah siagang Salmuna.”

¹⁶Le'baki anjo angngallemi Gideon ruku' akkatinting battua ri parang kassika. Nampa napangngajari ngaseng anjo pamimping-pamimpinna tuniaka ri kota Sukot.

¹⁷Nampa ri kota Pnuel, narumbang tommi menarana. Kammayatompa nabuno ngasemmi sikontu tu bura'ne niaka anjoreng.

¹⁸Le'baki anjo akkuta'nammi Gideon mae ri Zebah siagang Salmuna angkana, “Antekamma tanja'na anjo sikamma tunubunoa ri Tabor”? Appialimi Zebah siagang Salmuna, “Ero' ngasengi ke'nanga santanja' ikau, sangkammai turungang karaeng.”

¹⁹Nanakanamo Gideon, “Anjo ke'nanga sari'battangku; ana'na ngaseng ammakku. Ka'de' natenaja nubunoi ke'nanga, ma'nassa tena todong nalakubunoko.”

²⁰Nampa nakanamo Gideon ri ana' bungasa'na, niarenga Yeter “Bunoi anjo ke'nanga!” Mingka anjo Yeter rungka iji. Jari mallaki ambi'buki pa'danna untu' ammuno.

²¹Nakanamo Zebah siagang Salmuna, “Mae mako! Punna bura'neko lima kannanu ambunoi ikambe!” Jari nibunomi ke'nanga ri Gideon. Nampa naalle ngaseng Gideon belo-belo niaka ri kallong untana ke'nanga.

²²Le'baki anjo angkanami umma' Israel ri Gideon, “Le'ba' mako allappassangi ikambe battu ri kakoasanna tu Midian. Jari ikaumo kammayatompa turungannu a'jari pamimping mae ri kambe.”

²³Appialimi Gideon angkana, “Tena. Teai inakke la'jari pamimpinnu, manna anakku tena todong. Bataraji pamimpinnu”.

²⁴Mingka nakanamo pole Gideon, “Se'reji bawang papalakku; sikontu anjo anting-anting nurampasaka battu ri musua, sareang ngasenga'.” (Biasana tu Midian ammakei anting-anting bulaeng; sangkamma todong tuniaka ammantang ri parang kassika.)

²⁵Appialimi ke'nanga angkana, “Baji'mi. Kipassareangi situlusu' pa'mai' mae ri kau.” Appaka'rammi ke'nanga kaeng, nampa massing battu ke'nanga ampadongkoki sikontu anting-anting narampasaka ke'nanga battu ri musua.

²⁶Yangasenna anjo anting-antinga napassareang ke'nanga, nia' ruampulo kilo battala'na, tanirekengapi belo-belo maraenganga, kammaya rantea, kaeng ga'ga biasaya napake karaenna tu Midian, siagang rante niaka ri kallong untana ke'nanga.

²⁷Iaminjo bulaenga napare' Gideon se're patung barhala. Nampa naboli' ri kamponna iamintu Ofra. Sikontu tu Israelka mange ngasemmi anjoreng anynyomba ri anjo patung barhalaya. Sa'genna tenamo najampangi Allata'ala, Batarana ke'nanga. Na iaminjo a'jari sanrapang sikko' mange ri Gideon siagang sikontu bija-bijanna.

²⁸Takkuleami ampanggaukang tu Midian. Nibetami ke'nanga ri tu Israelka. Jari amammi anjo pa'rasanganga sa'genna patampulo taung sallona, lalang tallasa'na ija Gideon.

²⁹Le'ba'namo anjo bunduka, ammotere'mi Gideon ri kamponna, nammantang anjoreng.

³⁰Nia' tujupulo ana' bura'nena, lanri jaina bainenna.

³¹Nia' todong baine piarana ri Sikhem. Battu ri anne baine piarana anggappa tongi sitau ana' bura'ne, naarenga Abimelekh.

³²Ri wattu toa dudunamo umuru'na nampami mate Gideon. Anjorengi ri jera'na Yoas, iamintu jera'na manggena, nitarawang. Anjo jeraka anjorengi ri Ofra tampa'na, iamintu ri kotana tu Abiezer.

³³Ri matenamo Gideon, tenamo namajarre' tappa'na tu Israel mae ri Allata'ala. Anynyombami ke'nanga ri rewata-rewata Baal, siagang napare'mi anjo Baal-Berit a'jari rewatana ke'nanga.

³⁴Tenamo nanynyomba ke'nanga mae ri Allata'ala, Batarana ke'nanga, le'baka allappassangi ke'nanga battu ri kakoasanna musu-musu niaka ri tammulilina ke'nanga.

³⁵Tena tommo nau'rangi bija-bijanna Gideon lanri jasa-jasana Gideon mae ri umma' Israel.