Read Makassar Version – KITTA' MATANGKASA 2 YOHANES 1 Bible Online

2 YOHANES 1 - Makassar Version – KITTA' MATANGKASA bible

2 YOHANES 1

¹Battu ri nakke, pamimping jama'aka; kupappitarimangi anne suraka mae ri Amma'[1] Napilea Allata'ala, siagang mae ri ana'-ana'na Amma' sannaka kukarimangnginna. Teai inakke bawang, mingka sikontu pole tau angngassengai Allata'ala tojenga, Nakarimangngi ngaseng tongko.

²Nasaba' niaki Allata'ala matojenga ammantang lalang ri atinta, siagang latuli niaki anrurungangki' sa'genna satunggu-tungguna.

³Poro nisareki' barakka', pangngamaseang kammayatompa kasalewangang battu ri Allata'ala Manggea, siagang battu ri Isa Almasi Ana'Na anjo Manggea. Poro nitarima ngasengi anjo siagang ati maci'nong kammayatompa lalang pangngamaseang.

⁴Sanna' rannuku lanri kuassenna angkanaya nia' ana'-anatta attallasa' situru' ajaranNa Allata'ala, situru' Napassuroanga Allata'ala Manggea mae ri katte.

⁵ Lanri kammana anjo, Amma', kupala' tojeng-tojengi nakipara sikamaseang ngaseng. Anne kupaua teaiji parenta beru; anne parentaya nipassareang memammi mae ri katte battu ri uru tappatta.

⁶Battuanna nikanaya mangngamaseang, iamintu nipilangngeri sikamma parentaNa Allata'ala. Na anjo parenta le'bakamo nulangngere' battu ri pakkaramulanna, iamintu angkanaya musti massing sikamaseangko lalang ri katallassannu.

⁷Jaimi patipu a'lampa mange-mange ri sikontu linoa. Ia ke'nanga, iamintu sikamma tau tenaya namangakui angkanaya antama'mi Isa Almasi ri lino ma'rupatau. Anjo tau kammaya, iami patipu, siagang musunNa Almasi.

⁸Lanri kammana, jagai gassingka niakko ampelaki anjo apa le'baka nausahakang ikambe untu' ikau ngaseng.[2] Usahako sollanna nutarima ngaseng sawala'nu.

⁹Inai-nai tena nanna'gala' jarre' mae ri pangngajaranNa Almasi, passangalinna ammengkai battu ri apa le'baka Napangngajarrang, anjo taua tena Allata'alana. Inai-nai tuli anna'gala' mae ri pangngajaranNa Almasi, natarima tommi Allata'ala Manggea siagang pole Anaka.

¹⁰Lanri kammana, punna nia' tau battu siagang nabirittakang mae ri kau pangngajarang tenaya Napangngajarrangi Almasi, teako tarimai anjo taua antama' ri balla'nu; tea tongko a'barisallangi mae ri ia angkana “Salamakko.”

¹¹Nasaba' inai-nai a'barisallang mae ri anjo tau kammaya, ma'nassa amminawang tommi siagang anjo taua anggaukangi panggaukang ja'dalaka.

¹²Jai sikali parallu lakupau mae ri kau ngaseng, mingka bajikangangi punna tena nakupalalangi ri suraka. Kuminasai nakuakkulle battu angkunjungiko siagang kalengku a'bicara mae ri kau ngaseng, sollanna akkulle rannu tojeng-tojeng atinta.

¹³Akkiringi sallang mae ri katte sikamma ana'-ana'na sari'battanta bainea,[3] nipilea todong ri Allata'ala.