Read Makassar Version – KITTA' MATANGKASA 3 YOHANES 1 Bible Online

3 YOHANES 1 - Makassar Version – KITTA' MATANGKASA bible

3 YOHANES 1

¹ Sari'battangku Gayus, sannaka kukarimangnginna! Battu ri nakke, pamimping jama'aka, angkamaseang tojeng-tojengako;

²appala' doanga' sollannu gassing tamangngapa-apa, siagang baji'-baji' ngaseng ri kalennu, sangkamma baji'na pa'mai'nu.

³Sanna' rannuna pa'maikku ri wattunna nia' siapa are paranta tu Karisteng battu na napabattu antekamma tamamminranu mae ri Allata'ala matojenga; nasaba' memang tuli attallasa' mako situru' ero'na anjo birittaya.

⁴Tena akkulle la'bi ampakarannuangangi pa'maikku, naanjo kulangngere'na angkanaya attallasaki ana'-anakku situru' ajaranNa Allata'ala.

⁵Sari'battangku! Sanna' tamamminranu lalang jama-jamang nugaukanga mae ri paranta tu Karisteng; ba'lalo manna tau tenayapa nuassengi, nulayani tongi.

⁶Napaumi ke'nanga mae ri jama'aka anrinni ri sesena pangngamaseannu. Tulung sai ke'nanga sollanna akkulle napannarrusu' lampana ke'nanga. Gaukammi anjo siagang cara akkullea ampakasannangi atinNa Allata'ala,

⁷nasaba' anjo pa'lampanna ke'nanga iamintu allayani jama-jamanNa Almasi. Nagaukangi ke'nanga anjo jama-jamanga siagang tena sikali apa-apa nagappa ke'nanga battu ri tau tenaya natappa' mae ri Almasi.

⁸Lanri kammana, ikatte tu Karistenga musti nitulungi paranta tu Karisteng kammaya anjo, sollanta akkulle amminawang turu' lalang ri usahana ke'nanga, iamintu untu' ampa'la'bangi biritta tojeng battua ri Allata'ala.

⁹Le'ba'ma' annulisi' sike'de' sura' mae ri jama'aka, mingka anjo Diotrefes, eroka a'jari pamimping lalang ri jama'aka, taerokai ampilangngeria'.

¹⁰Punna battua' sallang, eroki kubicara anjo passala' apa-apa le'baka nagaukang iamintu kaja'dallanga siagang bicara balle-ballea, ia le'baka nacarita ri sesena ikambe! Mingka tagannakapi anjo sikammaya mae ri ia. Ri wattunna battu anjo aganta ngaseng paranta tu Karisteng, taerokai antarimai ke'nanga. Ba'lalo napisangkai tau eroka antarimai ke'nanga, siagang nasuroi ke'nanga assulu' battu ri jama'aka!

¹¹Sari'battangku, sannaka kukarimangnginna; teako turuki apa-apa kodia. Iamo apa-apa bajika nuturuki. Inai-nai a'gau' baji', iami anjo taua tau battu ri Allata'ala. Na inai-nai a'gau' ja'dala', ma'nassa tenapa nale'ba' sibuntulu' siagang Allata'ala.

¹²Sikontu taua napuji Demetrius. Ba'lalo Allata'ala pole Napuji tongi. Ikambe pole ampuji tongi, siagang nuasseng ngasemmi angkanaya annabai anne apa napabattua ikambe.

¹³Jai sikali parallu lakupau mae ri kau ngaseng, mingka bajikangangi punna tena nakupalalangi ri suraka.

¹⁴Kuminasai angkanaya tenamo nasallo nakilasibuntulu', naki'bicara kalenta.

¹⁵Poro Nabarakkakiko Batara! Akkiringi sallang mae ri kau, sikamma sari'battang niaka anrinni. Pabattuanga' sallangku mae ri sikamma sari'battanta tasse're-se're.