Read Makassar Version – KITTA' MATANGKASA PAPPICINI' 1 Bible Online

PAPPICINI' 1 - Makassar Version – KITTA' MATANGKASA bible

PAPPICINI' 1

¹Ia bonena anne Kittaka, iamintu apa-apa le'baka Napappicinikang Isa Almasi ri passala'na sikontu apa-apa lakajarianga sallang. Napappiassengangi Allata'ala mae ri Almasi sollanna Napabattu Almasi mae ri sikontu atanNa Allata'ala apa-apa tenayamo nasallo namusti kajariang. Nasuromi Almasi a'lampa malaeka'Na mae ri atanNa, iamintu Yohanes, untu' ampappiassengangi mae ri ia anjo apa-apa lakajarianga.

²Nampa nacarita ngasemmo Yohanes sikontu anjo apa-apa nacinika; na iaminne laporanna ri sesena pappasanNa Allata'ala, nipakajarreka ri Isa Almasi tete ri kasa'bianNa.

³Maupaki tau ambacayai siagang tau allangngerekai biritta napau la'bi rioloa anne kittaka, kammayatompa nanaturuki apa niaka tattulisi' ilalang. Nasaba' tasalloami nalakajariang ngaseng anne sikammaya.

⁴ Sikamma sari'battang niaka ri tujua jama'ah ri daera Asia! Inakke, Yohanes, ma'minasa' nuporo nisare ngaseng barakka' siagang kasalewangang battu ri Allata'ala, Ia niaka battu ri pakaramulanna, ri kamma-kammaya anne, sa'genna satunggu-tungguna; kammayatompa battu ri tujua roh ia niaka ri dallekang empoang kala'biranNa Allata'ala,

⁵ siagang battu ri Isa Almasi, sa'bi tamamminraya. Iami uru-uru nipattallasa' poleanga ammotere' battu ri kamateanga siagang Iami makoasaya irateanganna sikamma karaeng niaka ri lino. Nakamaseangki' Isa, siagang lanri kamateanNa naNapata'lappasa' maki' battu ri dosa-dosata ngaseng.

⁶ Nampa Napa'jariki' se're bansa imang-imang, allayania mae ri Allata'ala, ManggeNa. Iaminjo Isa Almasi malompoa siagang makoasaya sa'genna satunggu-tungguna. Aming!

⁷ Ciniki, niakI battu lalang ri rammanga! Sikontu rupataua lanacini' ngasengI, kammayatompa tau le'baka antobokI poke. Lanri Iami nalappiraung ngaseng sikontu bansa-bansaya ri lino. Mattantu kammana! Aming!

⁸ “INakkemi uru-urua, siagang iNakkemi kala'busanga,” kammami anjo kananNa Karaeng Allata'ala, Ia niaka battu ri pakaramulanna, ri kamma-kammaya anne, sa'genna satunggu-tungguna, Ia Kaminang Makoasaya.

⁹Inakke Yohanes, sari'battannu ngaseng, nuaganga' a'julu sessa sangkamma nakasiaka sikontu tau amminawanga ri Almasi. Sa'barakki' angkasiaki kasessanga, lanri ikatte anne umma'Naki'. Nipelakka' mange ri Pulo Patmos passabakkang kupa'la'bangi pappasang battua ri Allata'ala, Napakajarreka Isa lalang ri kasa'bianNa.

¹⁰Ri allonNa Batara, nikoasaia' ri RohNa Allata'ala; nampa nia' kulangngere' sa'ra sannaka lompona, sangkamma sa'ra tarompe', battu ri bokoku.

¹¹Nakana anjo sa'raya, “Tulisiki apa nucinika, nampa nukiring anjo kitta' nutulisika mae ri tujua jama'ah, iamintu: Efesus, Smirna, Pergamus, Tiatira, Sardis, Filadelfia, siagang Laodikia.”

¹²Assailema' mae ri boko ero' anciniki angkana maka inai anjo a'bicara mae ri nakke. Nampa nia' kucini' tuju bangkeng lampu ammakea sumbu, bulaenga nipare'.

¹³ Ri tangnga-tangngana anjo sikamma bangkeng-bangkeng lampua nia' sitau ammenteng a'rupa taua nicini' tanja'Na. Ammakei juba turunga sa'genna naung ri bangkenNa. Na barambanNa ammakei passikko' bulaeng.

¹⁴ Uu'Na keboki sangkamma bulunna gimbalaka, kebo'Na sangkamma le'baki kapasa'. MatanNa a'rinra-rinrai sangkamma pepe';

¹⁵ na bangkenNa accayai sangkamma tambaga nitunua. Sa'ranNa sangkammai je'ne' ammarrung lompoa battu.

¹⁶Lima kananNa anna'galaki tuju bintoeng, na battu ri bawaNa nia' assulu' pa'dang sannaka taranna, siagang tarang pimbali-balia. RupanNa accayai sangkamma matanna alloa ri wattu tangngana alloa.

¹⁷ Ri wattunna kucini', su'ju'ma' naung ri dallekanNa sangkamma tau matea. Mingka Napadongko'mi lima kananNa ri kalengku nampa Nakana mae ri nakke, “Teako mallakki! INakkemi uru-urua siagang iNakkemi kala'busanga.

¹⁸INakkemi mattallasaka! Le'ba'Ma' mate, mingka cini'mi, attallasaKa' sa'genna satunggu-tungguna. MakoasA' irateanganna kamateanga, kammayatompa irateanganna linona sikontu tau matea.

¹⁹Lanri kammana, tulisi' ngasengi sikamma apa-apa nucinika, iamintu apa-apa niaka ri kamma-kammaya anne, siagang apa-apa lakajarianga sallang.

²⁰Iaminne rahasiana tujua bintoeng nucinika lalang ri lima kanangKu, siagang anjo tujua bangkeng lampu bulaenga: Anjo tujua bintoeng, iamintu tujua malaeka'na anjo tujua jama'ah; na anjo tujua bangkeng lampu, iamintu anjo tujua jama'ah.”