Read Makassar Version – KITTA' MATANGKASA PAPPICINI' 10 Bible Online

PAPPICINI' 10 - Makassar Version – KITTA' MATANGKASA bible

PAPPICINI' 10

¹Nampa nia' kucini' malaeka' maraeng sannaka gammara'na naung battu ri suruga. Nikalimbuki ri rammang, siagang nia' tarawe takkalu' ri ulunna. Accayai rupanna sangkamma mataallo, na bangkenna sangkammai benteng pepe'.

²Na ri limanna nia' se're gulungang kitta' ca'di ia tassungkea. Bangkeng kananna lalangi ri tamparanga angngonjo', na bangkeng kairinna ratei ri bontoa angngonjo'.

³Nampa akkio' sangkamma singa ammarrang lompoa. Le'ba'na akkio' anjo malaekaka, appialimi anjo tujua gunturu' sangkamma sa'ra ammarrunga.

⁴Assa'rana anjo gunturuka, ero'mi kutulisi'; mingka nia'mo kulangngere' sa'ra battu ri suruga angkana, “Rahasiakangi anjo apa napaua anjo tujua gunturu', teako tulisiki!”

⁵ Nampa kucini' anjo malaeka' angngonjoka ri tamparanga siagang ri bontoa angngangkaki lima kananna nai' ri langika.

⁶Assumpai lalang arenNa Allata'ala mattallasaka satunggu-tungguna, ampa'niakai langika, buttaya, tamparanga siagang sikontu apa-apa niaka lalanganna. Nakana anjo malaekaka, “Tenamo nalanipamono' pole wattunna!

⁷Mingka punna napasa'ra tarompe'na anjo malaeka' makatujua, laNapa'jarimi rahasia eroka Nagaukang Allata'ala, sangkamma le'baka napabattu ngaseng ata-atanNa, iamintu na'bi-na'bia.”

⁸ Nampa anjo sa'ra le'baka kulangngere' battu ri suruga a'bicarami pole mae ri nakke. Nakana, “A'lampako angngallei anjo gulungang kitta' ca'di tassungkea, niaka ri limanna anjo malaeka' angngonjoka ri tamparanga siagang ri bontoa.”

⁹Jari a'lampama' mae ri anjo malaekaka, nampa kupala' sollanna napassareang anjo gulungang ca'dia mae ri nakke. Nakanamo, “Allei na nukanre anne. La'jari paiki lalang ri battannu, mingka la'jari te'nei sangkamma je'ne' bani lalang ri bawanu.”

¹⁰Kuallemi anjo gulungang ca'dia battu ri limanna nampa kukanre. Sangkammai je'ne' bani kasia'na lalang ri bawaya, mingka ri wattunna kua'lu', a'jari paiki lalang ri battanga.

¹¹Nampa nisuroma' angkana, “Pa'la'bangi sikalipa pole biritta battua ri Allata'ala ri passala'na bansa-bansaya, sikamma pa'rasanganga, bahasa-bahasaya, kammayatompa sikamma karak-karaenga.”