Read Makassar Version – KITTA' MATANGKASA PAPPICINI' 13 Bible Online

PAPPICINI' 13 - Makassar Version – KITTA' MATANGKASA bible

PAPPICINI' 13

¹ Nampa nia' kucini' sikayu olo'-olo' ammumba battu lalang ri tamparanga. Nia' sampulo tanru'na na tuju ulunna. Ri massing-massing tanru'na nia' songko' karaeng, kammayatompa ri massing ulunna nia' tattulisi' se're areng anghinayai Allata'ala.

² Anjo olo'-oloka sangkammai kucini' macang burika, na bangkenna sangkammai bangkeng beruang, kammayatompa muncenna sangkammai munceng singa. Nampa napassareang anjo nagaya kagassingang kalenna mae ri anjo olo'-oloka; kammayatompa empoang kala'biranna siagang kakoasang lompona nasareang tommi.

³Kalase'renna anjo tujua ulunna anjo olo'-oloka sangkammai nicini' le'baki bokka' sanna' lompona, mingka piami anjo bokkaka. Amminawang ngasemmi siagang lannasa' sikontu linoa mae ri anjo olo'-oloka.

⁴Nasombami ke'nanga anjo naga le'baka assarei kakoasang anjo olo'-oloka. Kammayatompa anjo olo'-oloka nasomba tommi ke'nanga. Nakanamo ke'nanga, “Tenamo sangkammanna anne olo'-oloka! Tenamo akkulle angngewai a'bundu'.”

⁵ Nilappassammi anjo olo'-oloka ampaui bicara-bicara sannaka tampona siagang anghinai Allata'ala. Nipa'biammi ammarenta patampulo anrua bulang sallona.

⁶Nampa appakkaramulamo anghinai Allata'ala siagang arenNa Allata'ala. Kamma tomminjo pammantanganNa Allata'ala siagang sikontu tau ammantanga ri suruga nahina ngaseng tommi.

⁷ Nipa'biang tommi angngewai siagang ambetai Umma'Na Allata'ala. Kammayatompa nipassareammi ri ia kakoasanga mae ri sikontu sukua, pa'rasanganga, bahasaya, siagang bansa-bansaya.

⁸ Anjo olo'-oloka lanisombai ri sikontu tau attallasaka ri lino, pantaranganna tau le'bakamo nitulisi' arenna ri wattu tenanapa nipa'niaki linoa, lalang ri kitta' katallassanNa anjo Ana' Gimbala' le'baka nisamballe.

⁹Lanri kammana, punna akkulle ngasengko allangngere', pilangngerimi anne birittaya:

¹⁰ “Tau lanitarungkua, musti lanitarungkui. Siagang tau lanibunoa siagang pa'dang mattantu lanibunoi siagang pa'dang. Iaminjo saba'na namusti sa'bara' siagang tamamminraya Umma'Na Allata'ala.”

¹¹Nampa nia' kucini' sikayu olo'-olo' maraeng ammumba battu lalang ri buttaya. Nia' rua tanru'na sangkamma tanru' ana' gimbala'. Sa'ranna sangkammai sa'ra naga.

¹²Ri dallekanna anjo olo'-olo' bungasaka ammakei kakoasang lompo iamintu kakoasang natarimaya battu ri anjo olo'-olo' bungasaka. Sikontu buttaya siagang sikontu tau ammantanga ri tompo'na napassa ngasemmi anynyomba mae ri anjo olo'-olo' bungasaka sumpaeng, anjo piayamo bokka' lompona.

¹³Anjo olo'-olo' makaruaya appa'nia'mi siapa are panggaukang sanna' lompona siagang sannaka appakalannasa'na. Appaturummi pepe' battu rate ri langika naung ri buttaya, ri dallekanna sikontu rupataua.

¹⁴Na natipu ngasemmo sikontu rupataua ri lino lanri anjo gau'-gau' appakalannasa' akkullea nagaukang ri dallekanna anjo olo'-olo' bungasa' battua sumpaeng. Siagang nasuro ngasemmi ke'nanga appaenteng se're patung untu' anjo olo'-olo' le'baka bokka' nataba pa'dang, mingka attallasa' iji.

¹⁵Nipa'biammi anjo olo'-olo' makaruaya ansarei nyawa anjo patunga, sa'genna akkullemo a'bicara anjo patunga siagang nabuno sikamma tau tenaya naero' anynyomba mae ri ia.

¹⁶Sikontu rupataua, lompo yareka ca'di, kasi-asi yareka kalumanynyang, tau ata yareka tau bebasa', nipassa ngasemmi ri anjo olo'-oloka untu' annarima pammatei ri lima kananna ke'nanga yareka ri tompo' kanynyinna ke'nanga.

¹⁷Tena manna sitau akkulle ammalli yareka a'balu' apa-apa punna tena anjo pammateia ri ia, iamintu areng kalenna anjo olo'-oloka, yareka lomoro' ampa'nassayai anjo arenga.

¹⁸Anrinni parallui nia' pangngissengang. Inai-nai baji' pangngissenna, akkullei narekeng battuanna lomoro'na anjo olo'-oloka; nasaba' anjo lomoroka, iamintu areng se're tau. Lomoro'na iamintu 666.