Read Makassar Version – KITTA' MATANGKASA PAPPICINI' 17 Bible Online

PAPPICINI' 17 - Makassar Version – KITTA' MATANGKASA bible

PAPPICINI' 17

¹ Le'baki anjo battumi mae ri nakke kalase'renna anjo tujua malaeka' anna'galaka pammoneang na nakana, “Maeko, lakupicinikiangko antekamma batena lanihukkung anjo pasundala' lompoa, iamintu anjo kota lompoa, nibangunga ri ampi'na binanga-binangaya.

² A'gau' bawang ngasemmi karaenna linoa siagang ia, siagang nasa'rimmi bonena linoa lanri nainunna ke'nanga anggoro' panggaukang bawanna.”

³ Nampa nikoasaima' ri RohNa Allata'ala, siagang nieramma' mange ri parang lompoa ri anjo malaekaka. Anjoreng nia'mo kucini' sitau baine ammempo irate ri dongko'na sikayua olo'-olo' ejaya siagang a'rinraya nicini'; rassi kalenna siagang tulisang-tulisang areng antunraiyai Allata'ala. Nia' tuju ulunna siagang sampulo tanru'na anjo olo'-oloka.

⁴ Anjo bainea ammakei baju lango-lango siagang eja toaya tanja'na, kammayatompa nibelo-beloi siagang belo-belo bulaeng, paramata, siagang mutiara. Na ri limanna nia' nata'gala' se're mangko' bulaeng rassia bonena siagang apa ra'masaka siagang kodi dudua, wassele' panggaukang bawanna.

⁵Ri tompo' kanynyinna nia' tattulisi' areng, niaka rahasiana battuanna. Anjo arenga iamintu “Babel Lompoa, anronna sikontu pasundalaka siagang tau kodi sipaka ri lino.”

⁶Nampa nasa'ring kucini' anjo bainea napakamma cera'na Umma'Na Allata'ala siagang cera'na tau nibunoa lanri tamamminrana mae ri Isa. Teai sipato' lannasakku ri wattunna kucini' anjo bainea.

⁷Nampa nakana anjo malaekaka ri nakke, “Apa saba'na nanulannasa' kamma? Baji'mi nakupauangko rahasiana anjo bainea siagang rahasiana anjo olo'-olo' nadongkokia, iamintu olo'-olo' tujua ulunna siagang sampuloa tanru'na.

⁸ Anjo olo'-oloka le'baki attallasa' pirangalloang, mingka kamma-kamma anne tenamo nattallasa'. Sinampe' mami nassulu'mo battu ri tubiri'na kamateanga nampa mange ri kapanrakanga. Sikamma tau attallasaka ri lino, natena tattulisi' arenna lalang Kitta' Tau Attallasaka ri wattu tenanapa nanipa'jari linoa, lalannasaki ri wattunna nacini' anjo olo'-oloka. Nasaba' le'baki attallasa' anjo olo'-oloka pirangalloang. Kamma-kamma anne tenamo nattallasa', mingka lammumba poleangi ammotere'.

⁹Lalang ri anne passalaka parallui nia' pangngissengang siagang pammahang. Anjo tujua ulu battuanna iaminjo tujua bulu'; iamintu bulu'-bulu' napammempoia anjo bainea. Siagang anjo tujua ulu battuanna pole iaminjo tuju karaeng:

¹⁰limami ri ke'nanga tu'guru', se're ammarenta iji, na se'reanga pole tenapa nabattu. Punna battui sallang, musti ammarentai mingka sinampe'ji bawang.

¹¹Na anjo olo'-olo' le'baka attallasa', mingka tenamo kamma-kamma anne, iaminjo karaeng makasagantujua. Battu ri kalase'renna tonji ri anjo tujua karaeng, a'lampayamo kamma-kamma anne mange ri kapanrakanga.

¹² Anjo sampuloa tanru' nucinika iamintu sampuloa karaeng, tenayapa nappakkaramula ammarenta. Mingka lanisarei ke'nanga koasa untu' ammarenta a'jari karaeng siagang anjo olo'-oloka poro sijang sallona.

¹³Anne sampuloa karaeng sangkamma ngasengi pattujunna; para napassareang ngasengi ke'nanga kagassinganna siagang kakoasanna mae ri anjo olo'-oloka.

¹⁴La'bunduki ke'nanga angngewai anjo Ana' Gimbalaka. Mingka lanibetai anjo sikamma karaenga ri anjo Ana' Gimbalaka siagang sikamma taunNa tamamminraya le'baka Nakio' siagang Napile; nasaba' Ia minjo Ana' Gimbalaka Batarana sikamma tumalompoa, siagang Karaenna sikamma karaenga.”

¹⁵Nakana pole anjo malaekaka, “Anjo je'ne' nucinika, napammempoia anjo pasundalaka, iaminjo bansa-bansaya, ra'ya'-ra'yaka, pa'rasangang-pa'rasanganga siagang bahasa-bahasaya.

¹⁶Anjo sampuloa tanru' siagang anjo olo'-olo' nucinika labirisiki mae ri anjo pasundalaka. Lanarampasaki ke'nanga sikamma apa-apa niaka ri ia, siagang lanapa'jari assolaraki. Lanakanrei ke'nanga assinna siagang lanaancuruki siagang pepe'.

¹⁷Nasaba' Napagio'mi Allata'ala atinna ke'nanga untu' anggaukangi pattujunNa Allata'ala. LaNapassamaturu'mi ke'nanga untu' ampassareangi kakoasanna ke'nanga mae ri anjo olo'-oloka sollanna ammarenta anjo olo'-oloka sa'genna kajariang apa Napaua Allata'ala.

¹⁸Anjo baine nucinika, iaminjo kota lompoa, amparentayai karaeng-karaenga ri lino.”