Read Makassar Version – KITTA' MATANGKASA PAPPICINI' 3 Bible Online

PAPPICINI' 3 - Makassar Version – KITTA' MATANGKASA bible

PAPPICINI' 3

¹“Untu' mae ri malaeka'na jama'ah Sardis tulisiki kamma anne: Iaminne pappasang battu ri Ia ampatangai anjo tujua roh battu ri Allata'ala siagang anjo tujua bintoeng. Kuassengi apa nugaukanga ngaseng. Nukana kalennu attallasa' nusikontutojenna mate!

²Lanri kammana, ambangungko nai', siagang pakajarreki apa niaka ija ri kau ngaseng, genteng tenanapa numate taba sikali. Nasaba' Kurapikangi angkanaya anjo apa nugaukanga tenapa manna se're a'jari sukku' baji'na ri dallekanNa Allata'ala.

³ Jari, u'rangi ammotere' apa le'baka nipangngajarrang mae ri kau riolo siagang apa le'bakamo nulangngere'. Gaukangi anjo sikammaya, siagang toba' ngaseng mako battu ri dosa-dosanu. Punna tambangungako, labattuA' mae ri kau sanrapang palukkaka; natanuassenga angkanaya ringngapanna wattua naKulabattu.

⁴Mingka ri tangnga-tangnganu ri Sardis, nia' ija tau anjagai sollanna tuli tangkasa' pakeanna. Anjo ke'nanga lassiagangA' a'jappa ammakeang kebo', nasaba' nipassiratangi ke'nanga untu' anjo.

⁵ Ia ammetaya lanisarei pakeang kebo'. TalaKupasulukai areng-arenna ke'nanga lalang ri Kitta'na Tau Attallasaka. Na ri dallekanNa ManggeKu siagang malaeka'-malaeka'Na, laKuakui ke'nanga angkanaya anjo ke'nanga ma'nassa taungKu ngaseng.

⁶Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka!”

⁷ “Untu' mae ri malaeka'na jamaah ri Filadelfia, tulisiki kamma anne: Iaminne pappasang battu ri Ia matangkasaka siagang kontutojenga. Iami anta'galaki konci battua ri Daud; punna Nasungkei pakke'buka, tena manna sitau akkulle antongkoki, siagang punna Natongkoki, tena manna sitau akkulle ansungkei.

⁸Kuassengi apa nugaukanga ngaseng. Kuassengi angkanaya tena nasiapa kagassingannu; nuturukimi pangngajarangKu siagang tamamminrayako mae ri Nakke. Kusungkeang mako se're pakke'bu' untu' ikau ngaseng, tenaya nakkulle natongko' manna pole inai.

⁹ U'rangi anne: Anjo tau a'jaria umma'na Billisika, paballe-balle nakanaya kalenna tu Yahudi, na sikontutojenna teai, laKupakkulantuki assu'ju' ri dallekannu ngaseng. Nalanaasseng ke'nanga angkanaya Kukamaseang ngasengko.

¹⁰Lanri nuturukimi apa Kuparentakanga mae ri kau, iamintu Kukellaiko tamalanrea, laKujagai mako ri kasusaang lantujuai sallang sikontu linoa. Lakajariangi anjo sikammaya, untu' a'jari paccoba mae ri sikontu rupataua ri lino.

¹¹LalintakKa' battu! Jagai baji'-baji' apa niaka ri kau ngaseng, sollanna tena tau maraeng akkulle angngalleangko anjo hadia nubetaya.

¹² Ia ammetaya laKupa'jari sanrapang benteng lalanga ri Balla' Matangkasa'Na Allata'alaKu, siagang lammantammi ri anjo tampaka sa'genna satunggu-tungguna. LaKutulisiki ri kalenna anjo taua arenNa Allata'alaKu, siagang areng kotaNa Allata'alaKu — iamintu Yerusalem berua, iamintu niaka naung battu ri suruga, battu ri Allata'alaKu. Kammayatompa, laKutulisi' tongi areng beruKu mae ri kalenna ke'nanga.

¹³Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka!”

¹⁴ “Untu' mae ri malaeka'na jama'ah Laodikia, tulisiki kamma anne: Iaminne pappasang battua ri Aminga, Sa'bi tojenga siagang tamamminraya, kabattuanna[1] sikontu apa Napa'niaka Allata'ala.

¹⁵Kuassengi apa nugaukanga ngaseng; Kuassengi angkanaya tena nudinging, na tena todong nubambang. Mustina kalase'renna dingingko yareka bambangko!

¹⁶Mingka kammu'-kammu' kanukuko: tena nubambang, tena todong nudinging. Iaminjo saba'na nalaKulangngeangko assulu' battu ri bawaKu.

¹⁷Nukana ngaseng: Akkalumanynyangko siagang ganna' mako ri katallassannu; tenamo apa-apa kakurangannu. Mingka tanuassengai kalennu angkanaya teai sipato' kasi-asinu, siagang teai sipato' appakasi'nana katallassannu. Kasi-asiko, assolarakko, siagang butako.

¹⁸Lanri kammanami anjo naKupakaingakko sollannu ammalli ngaseng battu ri Nakke bulaeng, iamintu bulaeng ti'no', sollannu a'jari kalumanynyang. Ammalli todong mako battu ri Nakke pakeang kebo' sollannu akkulle ammakeang siagang nutongko' kalennu natena nussolara' siagang natena nuppakasiri'. Siagang ammalli todong mako pa'balle untu' nupasapu mae ri matannu, sollannu akkulle accini'.

¹⁹ Sikamma tau Kukamaseanga Kupakaingaki siagang Kuba'balaki. Lanri kammana, paralluko allompoi ngasengi sumanga'nu, siagang toba' battu ri dosa-dosanu ngaseng.

²⁰Ciniki! NiakKa' ammenteng ri dallekang pakke'bu' siagang akkatto' pakke'bu'. Punna nia' allangngereki sa'rangKu, nanasungkeangA' pakke'bu', lantamakKa' ambuntuli; lasipangnganreangA' siagang ia, siagang lasipangnganreangi siagang iNakke.

²¹Ia ammetaya, laKupa'biangi ammempo ri empoang kala'birangKu siagang sipammempoangA' sangkamma Kalengku le'bakamo ammeta siagang kamma-kamma anne siagang ManggeKu ri empoang kala'biranNa.

²²Inai-nai akkulle allangngere', parallui naparhatikang anjo apa Napaua RohNa Allata'ala mae ri jama'ah-jama'aka!”