Read Makassar Version – KITTA' MATANGKASA PAPPICINI' 5 Bible Online

PAPPICINI' 5 - Makassar Version – KITTA' MATANGKASA bible

PAPPICINI' 5

¹ Nampa nia' kucini' ri limanNa anjo ammempoa ri empoang kala'biranga se're kitta', sangkammaya gulungang karattasa'. Anjo kittaka rassi tulisang pimbali-bali. Nibatei gulunganna anjo kittaka siagang tuju segele'.

²Nampa nia' kucini' se're malaeka' sannaka kassa'na akkiok-kio' lompo nakana, “Inai siratang anreppeki anne segeleka siagang ansungkei anne kittaka?”

³Mingka baji' na ri suruga kammayatompa ri lino tena manna sitau akkulle ansungkei anjo kittaka, siagang anciniki bonena.

⁴Angngarru'-arru'ma' tassunge'nge' lanri tenana manna sitau akkulle ansungkei anjo kittaka siagang anciniki bonena.

⁵ Nampa nakanamo kalase'renna anjo pamimpinga mae ri nakke, “Teako angngarruki! Ciniki! Ammetami anjo singa battua ri suku Yehuda, sossorang lompona Daud. Akkullei Nareppe' anjo segeleka siagang Nasungke anjo kittaka.”

⁶ Nampa nia' kucini' sikayu Ana' Gimbala' ammenteng ri tangnga-tangngana anjo empoang kala'biranga nikulilingi ri anjo appaka anu attallasa' siagang sikontu anjo pamimpinga. Anjo Ana' Gimbalaka sangkammai le'ba' nisamballe nicini'. Nia' tuju tanru'na siagang tuju matanna: iamintu tujua roh battu ri Allata'ala, nisuroa battu mange ri sikontu linoa.

⁷Nampa maju anjo Ana' Gimbalaka angngallei anjo gulungang kittaka battu ri lima kananNa anjo ammempoa irate ri empoang kala'biranga.

⁸ Ri wattu appakammana anjo Ana' Gimbalaka, su'ju'mi naung anjo appaka anu attallasa' siagang anjo ruampuloa angngappa' pamimping ri dallekanNa anjo Ana' Gimbalaka. Massing anna'galaki kacaping siagang mangko' bulaeng niaka kamanynyanna anjo ke'nanga, iamintu pappala' doanganna Umma'Na Allata'ala.

⁹ Akkelommi ke'nanga se're kelongang beru nakana: “IKattemi siratang angngallei anjo kittaka, siagang anreppeki sege'-segele'na. Nasaba' Ikattemi le'ba' nibuno, na lanri kamateanTa, na le'ba'mo Kiballi sikontu rupataua battu ri a'rupa-rupa suku, bahasa, pa'rasangang, siagang bansa, untu' Kierang ri Allata'ala.

¹⁰ Kipa'jarimi ke'nanga se're bansa nisa'laka iamintu bansa imang-imang sollanna nalayani ke'nanga Allata'alata, nammarenta irateanganna linoa.”

¹¹ Nampa accinikka' pole. Nia' kulangngere' sa'ra malaeka' assa'bu-sa'bu siagang a'juta-juta jaina! Ammentengi ke'nanga angkulilingi anjo empoang kala'biranga siagang anjo appaka anu attallasa' kammayatompa anjo ruampuloa angngappa' pamimping.

¹²Siagang sa'ra lompo, nakana, “Anjo Ana' Gimbala' le'baka nisamballe, siratangi annarima koasa, kakalumanynyangang, kacara'dekang siagang kagassingang; siratangi nipakalompo, nipakala'biri' siagang nipuji-puji!”

¹³Nampa akkelong kulangngere' sikontu anu attallasa' niaka ri langi', ri lino, irawanganna linoa, siagang lalang ri tamparanga; bodona kana sikontu anu attallasa' niaka ri anne linoa akkelong ngasengi angkana, “Ia ammempoa irate ri empoang kala'biranga, siagang anjo Ana' Gimbalaka, Iami nipuji na nipakalompo, kammayatompa nipakala'biri' na makoasa, sa'genna satunggu-tungguna!”

¹⁴Appialimi anjo appaka anu attallasa', angkana, “Aming!” Nasu'ju'mo anynyomba anjo pamimping-pamimpinga.