Read Makassar Version – KITTA' MATANGKASA PAPPICINI' 7 Bible Online

PAPPICINI' 7 - Makassar Version – KITTA' MATANGKASA bible

PAPPICINI' 7

¹ Le'baki anjo, nia'mo kucini' appa' malaeka' ammenteng ri appaka panyingkulu'na buttaya. Natahammi ke'nanga appaka anging ri buttaya sollanna tena namammiri' mange ri bontoa, yareka ri tamparanga, yareka mange ri poko'-poko' kayua.

²Nampa nia' pole kucini' se're malaeka' maraengang ammumba battu raya. Angngerangi segele' battua ri Allata'ala Mattallasaka. Nalompoimi sa'ranna anjo malaekaka akkio', angkioki anjo appaka malaeka' le'bakamo anggappa koasa battu ri Allata'ala untu' ampanraki bontoa siagang tamparanga.

³ Nakana anjo malaekaka, “Teako rolong panraki bontoa, yareka tamparanga yareka poko'-poko' kayua punna tenapa nisarei pammatei segele' ri kanynyinna sikamma Umma'Na Allata'ala.”

⁴Nampa nipauamma' angkanaya nia' 144.000 jaina tau nisare pammatei segele' battu ri Allata'ala ri kanynyinna ke'nanga. Anjo taua niallei battu ri sampuloa anrua suku bansa Israel;

⁵battu ri tasse're-se'rea suku nia' 12.000 jaina tau. Iamintu battu ri suku: Yehuda, Ruben, Gad,

⁶Asyer, Naftali, Manasye,

⁷Simeon, Lewi, Isakhar,

⁸Zebulon, Yusuf, siagang Benyamin.

⁹Le'baki anjo kucinikimi pole, na nia'mo kucini' tamparang tau, sannaka jaina tau bonena; tena manna sitau akkulle anrekengi jaina! Ia ke'nanga tau battu ri massing-massing bansa, suku, pa'rasangang, siagang bahasa. Ammenteng ngasengi anjo tau jaia andallekang mae ri empoang kala'biranga siagang andallekang mae ri anjo Ana' Gimbalaka; ammakeang juba kebo' ngasengi ke'nanga siagang massing anna'galaki leko'-leko' kaluku lolo.

¹⁰Nampa akkio' lompo ke'nanga angkana, “Battu anjorengi ri Allata'ala kasalamakkanta, niaka ammempo irate ri empoang kala'biranga, siagang battu anjorengi ri anjo Ana' Gimbalaka!”

¹¹Sikontu malaekaka ammentengi angkulilingi empoang kala'biranga siagang sikamma anjo pamimpinga, kammayatompa anjo appaka anu attallasa'. Su'ju' ngasengi anjo malaekaka ri dallekanna empoang kala'biranga nampa anynyomba ri Allata'ala.

¹²Akkio'mi ke'nanga angkana, “Aming! Nipujimi Allata'ala Mala'birika siagang Mabajika. Iami siratanga nipitujui alla'bi-la'bi kasukkurang siagang pappakalompo. Iami makoasa siagang magassing sa'genna satunggu-tungguna! Aming.”

¹³Akkuta'nammi kalase'renna anjo pamimpinga mae ri nakke angkana, “Inai ngaseng anne tau ammakea juba kebo' siagang battu kemae ngasengi ke'nanga?”

¹⁴ Appialima' angkana, “Takuassengai Karaeng. KalenTaji antu angngassengi.” Jari nakanamo pole mae ri nakke, “Yangasemmi anne tau le'baka nipasalama' battu lalang ri passessa sannaka heba'na. Le'ba'mi nasassa jubana ke'nanga siagang cera'Na anjo Ana' Gimbalaka sa'genna a'jari kebo'.

¹⁵Iaminjo saba'na nammenteng ke'nanga ri dallekanna empoang kala'biranNa Allata'ala, siagang anynyomba ri Ia allo bangngi lalang Balla'Na Allata'ala. Na Ia ammempoa irate ri anjo empoang kala'biranga lahadereki ri tangnga-tangngana ke'nanga untu' anjagai ke'nanga.

¹⁶ Tena nalanakasia' ke'nanga nikanaya cipuru' yareka turere; tenamo nalanibambangi ke'nanga ri matanna alloa yareka ri bambanga;

¹⁷ nasaba' anjo Ana' Gimbala' ammempoa ri tangnga-tangngana anjo empoang kala'biranga la'jari pakalawaki mae ri ke'nanga. Lanirurungangi ke'nanga mae ri timbuseng je'ne' assarea katallassang. Na Allata'ala lassapui sikamma je'ne' matanna ke'nanga.”