Read Makassar Version – KITTA' MATANGKASA RUT 1 Bible Online

RUT 1 - Makassar Version – KITTA' MATANGKASA bible

RUT 1

¹Ri jammang riolo ri tenanapa karaenna tu Israel, nitutujui bala kacipurang pa'rasangang Kanaan. Anjo wattua nia' sitau bura'ne niareng Elimelekh. Ia assala'na battui ri bija Efrata, siagang anjorengi ri Betlehem ri daera Yehuda ammantang. Passabakkang anjo bala kacipuranga na'lampamo mange ri pa'rasangang Moab siagang bainenna, niarenga Naomi, siagang rua ana'na bura'ne iamintu niarenga Mahlon siagang Kilyon. Nampa ammantammo ke'nanga anjoreng. Na ri wattu nia'na ija ke'nanga anjoreng,

³matemi Elimelekh. Jari ammantammi Naomi siagang anjo ruaya ana'na.

⁴Na anjo ruaya ana'na a'buntimmi siagang tulolo niaka ri Moab, iamintu niarenga Orpa siagang Rut. Sampulo taung ribokoanganna,

⁵mate tommi anjo ruaya ana' bura'nena Naomi, sa'genna nibokoimi Naomi baji' na bura'nenna kammayatompa rua ana' bura'nena.

⁶Siapa are wattu ribokoanganna, nalangngere' kabara'mi Naomi angkanaya nibarakkakimi umma' Israel ri Batara, na baji'mo wassele' lamung-lamunna ke'nanga. Lanri kammana, apparurumi Naomi siagang anjo ruaya ana' mintunna untu' ambokoi Moab.

⁷A'lampami ke'nanga a'rurung ammotere' mange ri Yehuda. Ri tangngana aganga,

⁸nakanamo Naomi mae ri anjo ruaya ana' mintunna, “Bajikangang ammotere' mako massing mange ri amma'nu. Poro mabaji' lalo Batara mae ri kau, sangkamma antekamma baji'nu mae ri nakke siagang ri anjo mae ke'nanga ammoterangamo.

⁹Poro Naerokangi Batara, numassing akkulle pole a'bura'ne.” Le'baki akkana kamma anjo, appala' kanami Naomi mae ri ke'nanga nanabau ke'nanga. Mingka angngarru' lompomi Orpa siagang Rut,

¹⁰siagang angkana mae ri Naomi, “Tena amma'! Lamminawangi ikambe mange ri bansata.”

¹¹Appialimi Naomi angkana, “Teako na', bajikangang ammotere' ngaseng mako. Apa saba'na nanuero' amminawang ri nakke? Sai tenamo nakukkulle ammana' untu' lanupa'jari bura'nennu?

¹²Ammotere' mako na', toa duduma' nakutakkulleamo a'bunting pole. Siagang ebara' angkana akkulle ija' a'bunting manna pole anne bangngia, nakuanggappa ana' bura'ne,

¹³maka ero'jako lattayang sa'genna lompo? Tena na', teako appakammai! Si'nai nyawaku annawa-nawai sarennu lanri nahukkungku sallang Batara.”

¹⁴Angngarru' lompomi Rut siagang Orpa. Nampa appala' kanamo Orpa nanabau matoanna, nampa ammotere'. Mingka Rut taerokai sisa'la' siagang matoanna.

¹⁵Akkanami Naomi mae ri ia, “Rut, cinissai! Ammotere'mi lagonu mange ri bansana siagang ri rewata-rewatana. Ikau pole ammotere' tommako na', pinawammi ammotere'!”

¹⁶Mingka appialimi Rut angkana, “Teaki' suroia' ammotere' siagang ambokoiki' amma'! Eroka' amminawang ri katte. Kemae-kemae kilampai, anjoreng tommi lakulampai. Kemae-kemaeki' ammantang anjoreng tomma' lammantang. Bansata, iatommi bansaku. Allata'ala kisombaya, iatommi lakusomba.

¹⁷Kemae-kemaeki' mate, anjoreng tomma' ero' mate siagang nitarawang. Poro Nahukkunga' Batara sibatta'-battala'na, punna erokka' assisa'la' siagang ikatte, pantaranganna kamateanga ampasisa'lakki'!”

¹⁸Naciniki Naomi angkanaya terasaki nyawana Rut untu' amminawang. Jari tenamo nakkana pole.

¹⁹Jari napatulusu'mi lampana ke'nanga, sa'genna anrapi' mange ri Betlehem. Kamma battuna ke'nanga mange anjoreng, gegere'mi taua ri sikontu anjo kotaya. Nakana ngasemmo tubai'-bainea anjoreng, “Maka Naomi tojengka anjo?”

²⁰Nakanamo Naomi, “Teako kiokia' Naomi; kio' mama' Mara,[1] nasaba' le'ba'ma' Nabalang parekang Allata'ala Kaminang Koasaya attallasa' lalang ri kapa'risang lompoa.

²¹Ri wattungku a'lampa anrinni anggannaki katallassangku, mingka kamma-kamma anne Naeranga' Batara ammotere' tena apa-apangku. Jari tea' mako arengia' pole Naomi, nasaba' le'ba'ma' Nahukkung Batara Kaminang Koasaya siagang jai kapa'risang!”

²²Kammaminjo riwaya'na Naomi ri ammotere'na battu ri Moab siagang mintunna iamintu Rut, anjo tu battua ri Moab. Wattu appakkaramulai taua akkatto gandung[2] nabattu ke'nanga mange ri Betlehem.