Read Makassar Version – KITTA' MATANGKASA 1 SAMUEL 1 Bible Online

1 SAMUEL 1 - Makassar Version – KITTA' MATANGKASA bible

1 SAMUEL 1

¹Nia' sitau bura'ne niareng Elkana, battu ri suku Efraim. Ammantangi ri kota Rama, ri daera pa'monconganna Efraim. Elkana iamintu ana'na Yeroham, na cucunna Elihu. Antamaki golonganna kaluarga Tohu, tangke passibijang battu ri Zuf.

²Elkana nia' rua bainenna, iamintu Hana siagang Penina. Penina nia' ana'na, mingka Hana tena.

³Taung-taungi Elkana a'lampa battu ri Rama mange assambayang ri Silo siagang assare koro'bang mae ri Batara Kaminang Koasaya. Ia a'jari imanNa Batara ri Silo, iamintu Hofni siagang Pinehas, ana'na Eli.

⁴Punna assare koro'bang Elkana, Penina siagang sikontu ana'na massing nasarei sipa'gang battu ri anjo koro'bang napassareanga.

⁵Mingka Hana sipa'ganji bawang nasareangi, nasaba' tena nisarei ana' ri Batara. Mingka manna nakamma, sanna' nangaina Elkana anjo Hana.

⁶Hana tuli nipa'risi nyawana siagang nihinai ri Penina anjo marunna, lanri tenana nisarei ana' ri Batara.

⁷Kammaminjo kajariang taung-taung. Punna a'lampa ke'nanga mange ri Balla'Na Batara, tuli nipa'risi nyawana Hana ri Penina. Biasai Hana angngarru' siagang taerokai angnganre lanri nihinana.

⁸Na biasa tommo Elkana, iamintu bura'nenna, akkuta'nang angkana, “Angngapa nungngarru' Hana? Angngapa nutaeroka angnganre siagang natuli si'na mamo pa'mai'nu? Tenaka nalompoangang anggarangku nasampuloa ana' bura'ne?”

⁹Ri se'reang allo, ri le'ba'na ke'nanga angnganre ri Balla'Na Batara ri Silo, ammentemmi Hana battu ri mejang pangnganreanga. Anjo wattua, Imang Eli, ia niaka todong ri Balla'Na Batara, sitabangi ammempo ri kaderana ri ampi'na pakke'buka. Appala' doammi Hana mae ri Batara siagang si'na sikali, angngarru'-arru' tassunge'nge'.

¹¹ Nampa a'janji Hana angkana, “O Batara Kaminang Koasaya, Kiparhatikangi anne atanTa! Kiciniki kapa'risanna atanTa. Kiu'rangi siagang teaKi' kaluppai atanTa! Punna Kisare atanTa sitau ana' bura'ne, a'janji atanTa lanapassareang anjo anaka mae ri Katte lalang sikontu tallasa'na. A'janji tongi atanTa angkanaya talanipolongai uu'na.”[1]

¹²Sanna' sallona Hana appala' doang, naniparhatikang bawana ri Eli anjo bainea.

¹³Appala' doangi Hana lalang atinna, jari muncennaji bawang a'gio'-gio', natena kalangngerang sa'ranna. Jari nikanami tunasa'ring ri Eli.

¹⁴Nakanamo Eli ri ia, “Angngapa nanuanrinni nasa'ring! Tea' mako angnginungi pole anggoro'!”

¹⁵Mingka appialimi Hana angkana, “Tena nakunasa'ring, bapa', siagang tena sikali nakuangnginung anggoro'! Nakke tappu' panrannuanga', siagang sitabanga' appala' doang ancarita ngasengi kapa'risangku mae ri Batara.

¹⁶Teaki' kapangngia' angkanaya inakke anne baine sala'. Appala' doang kamma' anne lanri sanna' si'nana pa'maikku.”

¹⁷Nampa nakanamo Eli, “Punna kamma anjo ammotere' mako siagang salama'. Poro Naturukiangko Allata'alana Israel pappala'nu.”

¹⁸Appialimi Hana angkana, “Poro kipappala'-palakkanga' bapa'.” Nampa a'lampamo, namange angnganre. Tenamo nasi'na pa'mai'na.

¹⁹Ammukona, ambangung bari'basa'mi Elkana siagang kaluargana. Na le'ba'na assambayang ri Batara, ammotere'mi ke'nanga mange ri Rama. Assikatinroammi Elkana siagang Hana, anjo bainenna, siagang niturukiammi pappala'na Hana ri Batara.

²⁰Tianammi anjo bainea, nallassukang sitau ana' bura'ne. Naaremmi Samuel[2] anjo anaka, na nakana, “Le'ba'mi kupala' battu ri Batara.”

²¹Narapi'mi pole wattunna Elkana siagang kaluargana a'lampa mange ri Silo untu' assare koro'bang taungang mae ri Batara. Pantaranganna anjo le'ba'mi a'janji Elkana untu' assare koro'bang attantua.

²²Mingka anjo wattua tamminawangai Hana. Nakana ri bura'nenna, “Le'bappi sallang nisa'la' susu nampa kuerang Samuel mange ri Balla'Na Batara, nammantammo anjoreng lalang sikontu tallasa'na.”

²³Appialimi Elkana angkana, “Baji'mi, gaukammi apa nukanaya baji' ri pikkirannu. Ammantang mako ri balla' sa'genna narapi' wattunna nusa'la' anynyusu anatta. Siagang tapporo Napa'rupa laloi Batara janjinnu.” Jari ammantammi Hana ri balla' sa'genna narapi' wattunna akkulle nisa'la' anynyusu ana'na.

²⁴Le'baki nisa'la' anynyusu Samuel, niantara'mi ri amma'na mange ri Balla'Na Batara ri Silo. Anjo wattua ca'di dudu iji Samuel. Angngerang tommi Hana sikayu sapi laki umuru' tallun taunga, gandung sampulo kilo battala'na, siagang sipammoneang rassia anggoro'.

²⁵Nipolommi anjo sapia, nampa nierang Samuel mange ri Eli.

²⁶Nakana Hana mae ri Eli, “Pammopporanga' bapa'. Kiu'rangi ija' bapa'? Inakke minne baine le'baka kicini' ammenteng anrinni, appala' doang mae ri Batara.

²⁷Iaminne ana' kupalaka battu ri Batara. Nasareamma' Batara pappalakku,

²⁸na lanri kammana minjo nakupassareang anne anaka untu' a'jari Napatang Batara lalang sikontu tallasa'na.” Le'baki anjo assambayammi ke'nanga ri Batara.