Read Makassar Version – KITTA' MATANGKASA 1 SAMUEL 12 Bible Online

1 SAMUEL 12 - Makassar Version – KITTA' MATANGKASA bible

1 SAMUEL 12

¹Nampa nakanamo Samuel mae ri sikontu anjo bansa Israel, “Le'ba'mi kuturuki sikontu pappala'nu, na nia'mo kuangka' se're karaeng mae ri kau ngaseng.

²Appakkaramula ri kamma-kammaya anne iami a'jari pamimpinnu. Ciniki, inakke anne toama' siagang kebo'mi uukku. Sallo sikalima' a'jari pamimping mae ri kau ngaseng — battu ri rungkaku iji sa'genna kamma-kamma anne.

³Kamma-kammaminne, nakuammenteng ri dallekannu ngaseng! Punna nia' kasalang le'ba' kugaukang, tuntu'ma' ri dallekanNa Batara siagang ri dallekanna karaeng Napilea. Niakka nakule'ba' angngalle sapi yareka keledai battu ri tau maraengang? Niakka nakule'ba' annipu yareka anjallakkang tau yareka annarima doe' pacoco'? Paumi, sollanna akkulle kupoterang manna naapa-apa mamo.”

⁴Appialimi sikamma anjo taua angkana, “Tena, tena le'bakaki' bapa' antipui yareka anjallakkangi ikambe. Tena kile'ba' angngallei apa-apanna manna pole inai.”

⁵Nampa nakanamo Samuel, “Anne alloa, Batara siagang karaeng Napilea a'jari sa'bi angkanaya ma'nassa tena salangku manna pole sike'de'.” Appialimi ke'nanga angkana, “Iyo', kammatojengi, Batara a'jari sa'binta.”

⁶ Nampa nakanamo pole Samuel, “Batara ampilei Musa siagang Harun, siagang angngerangi boe-boenu assulu' battu ri Mesir.

⁷Kamma-kamma anne teako rolong a'lampai. Lakutuntu' ngasengko ri dallekanNa Batara. U'rangi sikontu kalammorang pa'mai'Na Batara ia le'baka Napappicinikang ri kau ngaseng siagang mae ri boe-boenu.

⁸ Ri wattunna battu Yakub siagang kaluargana mange ri Mesir, na nijallakkang ke'nanga ri tu Mesir, appala' tulungi boe-boenu mae ri Batara, nampa Nasuromo battu Musa siagang Harun. Iaminjo tau ruaya angngerangi boe-boenu assulu' battu ri Mesir, siagang antulungi ke'nanga ammantang ri anne buttaya.

⁹ Mingka ri bokoang allo nakaluppaimi Batara Allata'alana ke'nanga. Lanri kammana, nibalang parekammi ke'nanga na nibunduki siagang nibeta ri Sisera, anjo panglimana tantara Hazor, siagang nibeta ri tu Filistin siagang ri karaeng Moab.

¹⁰ Nampa appala' doang ke'nanga mae ri Batara siagang namangakuimi dosa-dosana ke'nanga, angkana, ‘Dorakami ikambe lanri nabokoinTa, o Batara, siagang anynyombami ikambe mae ri patung-patunna Rewata Asytoret siagang Baal. Mingka kamma-kamma anne, Kipasalamaki ikambe battu ri musunna ikambe, nampa anynyomba ikambe mae ri Katte!’

¹¹ Nampa Nasuromo Batara battu Gideon, nampa Barak, le'baki anjo Yefta, nampa kala'busanna inakke minne. Ikambemi massing allappassangko battu ri musunnu, sa'gennu tuli akkulle attallasa' siagang amang.

¹² Mingka nuassenna angkana lanabundukiko Nahas, anjo karaeng Amon, nusorongbokomi Batara a'jari Karaennu nampa nukana ri nakke, ‘Eroki ikambe niparenta ri se'reang karaeng.’

¹³Kamma-kamma anne, cini'mi, iaminne karaeng anjo nupilea. Le'ba'mi nupala', na Nasaremako Batara.

¹⁴Mate'ne mako punna nupakala'biri' Batara, siagang anynyomba mae ri Ia, kammayatompa nuturuki parentaNa, sarroangampa punna ikau ngaseng siagang karaennu tuli tamamminrayako mae ri Karaeng Allata'alanu.

¹⁵Mingka, punna tena numappilangngeri ri Batara, ba'lalo nubaliangi parentaNa, ma'nassa ikau ngaseng siagang karaennu laNabaliangko Batara.

¹⁶Kamma-kamma anne pilangngeri pole! Parhatikangi panggaukang malompo le'baka Nagaukang Batara ri dallekannu ngaseng.

¹⁷Lakkioka' mae ri Batara, namanna pole wattu timoroki, lappaturungi Batara gunturu' siagang bosi, a'jari pammatei angkanaya Napilangngeri pappala' doangku. Anjo wattua, lasadara' mako antekamma lompona dosanu mae ri Batara lanri appala'nu sitau karaeng.”

¹⁸Nampa appala' doammo Samuel; na ia memang anjo alloa appaturummi Batara gunturu' siagang bosi. Sikontu anjo bansaya a'jari malla' ngasemmi ri Batara siagang mae ri Samuel.

¹⁹Nakanamo ke'nanga mae ri Samuel, “Tulungi ikambe bapa'. Kipappala' doangangi ikambe anne mae ri Karaeng Allata'alanu, sollanna tamatea ikambe. Kamma-kamma anne sadara'mi ikambe angkanaya pantaranganna dosana ikambe riolo, dorakami pole ikambe lanri appala'na ikambe sitau karaeng.”

²⁰Appialimi Samuel angkana, “Teako mallakki; manna pole le'ba'mi nugaukang anjo kaja'dallanga, teako a'bokoi battu ri Batara, passangalinna tuli anynyombako ri Ia situlusu'na atinnu.

²¹Teako amminawangngi ri rewata-rewata tenaya nakkulle antulungko siagang ampasalamakko, nasaba' anjo ke'nanga sikontutojenna apa-apa taena battuanna.

²²Le'ba'mi assumpa Batara, angkanaya tena nalaNabokoiko, lanri le'ba'namo Napattantu angkanaya laNapa'jariko umma' KalenNa.

²³Na ri passala'na inakke, tapporo tena lalo kudoraka ri Batara lanri tenana kupappala' doangangko. Mingka tuli lakupangngajarrangi mae ri kau apa-apa bajika siagang tojenga.

²⁴Pakala'biriki Batara, siagang anynyombako mae ri Ia siagang teako amminrai lalang sikontu atinnu. U'rangi sikamma panggaukang malompoNa, ia le'baka Nagaukang mae ri kau.

²⁵Mingka punna tulusu' a'gau' dosa tonjako ia, tena tapanra'nu siagang karaennu.”