Read Makassar Version – KITTA' MATANGKASA 1 SAMUEL 17 Bible Online

1 SAMUEL 17 - Makassar Version – KITTA' MATANGKASA bible

1 SAMUEL 17

¹Ri se'reang wattu napagioki tantarana tu Filistin untu' maju mange a'bundu'. Naatoro'mi barisi'na ke'nanga ri kota Sokho, ri daera Yehuda, nampa appare' kema ri alla'na Sokho siagang Azeka, ri ampi'na Efes-Damim.

²Saul siagang tu Israel a'rappungang tommi siagang appareki kema ri Lappara' Ela. Sadiami ke'nanga untu' andallekangi tu Filistin punna a'bakka maju.

³Kammaminjo, barisi'na tu Filistin ammentengi ri se'reang bonto na barisi'na tu Israel ri bonto maraengannaya, na ri alla'na anjo tampaka nia' se're lappara'.

⁴Na nia'mo se're tau pore assiba'ji iamintu niarenga Goliat, tu battu ri kota Gat, assuluki battu ri kemana tu Filistin untu' ampa'ngarai tu Israel. Tinggina nia' kira-kira tallu metere',

⁵siagang ammakei topi tambaga siagang baju pa'bundukang tambaga ia battala'na kira-kira limampulo antuju kilo.

⁶Bangkenna nilapisiki pa'lapisi' bangkeng tambagaya nipare', siagang ri salangganna nia' nasompo poke tambaga.

⁷Panna'galang pokena teai sipato' la'ba'na, siagang mata pokena nia' kira-kira tuju kilo battala'na. Nia' sitau tantara a'jappa ri dallekanna angngerangi pannangkisi'na.

⁸Ammantammi Goliat nampa a'gora mae ri tantara Israel angkana, “Apa nupare' antureng? Ero' ngasengko antu a'bundu? Inakke tu Filistin, e kau ngaseng atanna Saul! Pileimi sitau battu ri kau, ia barania naung untu' a'bundu' siagang inakke.

⁹Punna lalang ri anjo bundu' attandinga nakunibuno, rellami ikambe a'jari atannu. Mingka punna inakke ammeta na kubunoi, ikau ngasemmi la'jari ata mae ri kambe.

¹⁰Kamma-kamma memang anne, kupa'ngarai tantarana Israel. Pileimi sitau eroka angngewa' attanding!”

¹¹Nalangngere'na Saul siagang sikamma taunna anjo pa'ngaraya, ta'bangkami ke'nanga siagang a'jari malla' sikalimi.

¹²Daud iamintu ana'na Isai tu Efrata, battu ri Betlehem ri Yehuda. Isai nia' sagantuju ana'na bura'ne. Na ri wattu pamarentahanna Saul, toa sikalimi Isai.

¹³Tallua ana' bura'ne toana Isai a'lampami a'bundu' ampinawangi Saul. Ia kaminang toaya niarengi Elia, makaruaya niarengi Abinadab, siagang makatallua niarengi Syama.

¹⁴Daud ana' bungko. Ri wattu anjo tallua daenna lalang pa'bundukang amminawang ri Saul,

¹⁵biasai Daud a'lampa ambokoi Saul siagang ammotere' mange ri Betlehem untu' angkalawaki gimbala'na manggena.

¹⁶Nia' patampulo allo, bari'basa' karuengi Goliat a'reppese' mange ri barisi'na Israel untu' ampa'ngarai ke'nanga.

¹⁷Ri se'reang allo nakanamo Isai ri Daud, “Allei anne sampuloa kilo biralle tunu siagang sampulo batu roti, nampa nuerang mange ri sikamma daennu niaka ri kemana tantaraya.

¹⁸Angngerang tongko sampulo batunna keju untu' komandang pasukanga. Pakkuta'nangngangi antekamma kabara'na sikamma daennu. Siagang angngerangko butti untu' inakke ma'nassana angkanaya sibuntulu' jako ke'nanga na salama'ja ke'nanga.

¹⁹Niaki ke'nanga ri Lappara' Ela siagang Karaeng Saul, kammayatompa sikamma tu Israel a'bunduka angngewai tu Filistin.”

²⁰Ammukona bari'basa', ambangummi Daud nampa apparuru. Gimbala'na nasuro jagai ri se'reang pakalawaki, nampa naalle apa-apa lanaeranga na'lampa situru' naparentakanga manggena. Battui mange ri kemana tu Israel sitabanna ero' a'lampa tu Israel mange a'bundu' ri tampa' pa'bundukanga, a'gora-gora ampakalompoi sumanga'na ke'nanga.

²¹Assidallekammi tantara Filistin siagang tantara Israel para sadia untu' a'bundu.

²²Nampa napassareang naboli' anjo apa-apa naeranga mae ri pajaga parsadiaanna tantaraya, nampa lari mange ri tampa' pa'bundukanga untu' angngagangi sibuntulu' daenna ngaseng.

²³Mingka lalang a'bicarana siagang ke'nanga, majumi Goliat mae ri dallekang nampa napa'ngara tu Israel, sangkamma biasaya nagaukang. Nalangngere' tommi anjo kana-kana pa'ngarana.

²⁴Nacini'na tu Israel anjo Goliat, lari memammi silalonna tu Israel napakamma malla'.

²⁵Massing para nakanamo ke'nanga, “Pilangngerimi kana-kana pa'ngarana! Le'ba'mi a'janji Saul karaenta angkana, inai-inai akkulle ambunoi Goliat, lanasarei hadia lompo. Lanapa'bunting tongi karaenga siagang ana' tulolonna. Nampa kaluargana manggena anjo taua tena nalanipitabai sima.”

²⁶Nakanamo Daud, “Barani tojengi anjo tu Filistin kapereka ampa'ngarai tantaraNa Allata'ala attallasaka!” Nampa akkuta'nang mae ri kalase'renna tantaraya angkana, “Apa lanisareangi tau akkullea ambunoi anjo tu Filistin siagang antongkokai siri'na tu Israel?”

²⁷Nipauammi ri ra'yaka apa le'baka napa'janjiang karaenga.

²⁸Eliab daenna Daud toaya nalangngereki Daud a'bicara siagang anjo taua. Sanna'mi larrona mae ri Daud na nakana, “Angngapa nubattu mae anrinni? Inaimi nusuro angngurusuki sikamma gimbalaka anjo pirang kayua ri paranga? Kuassengi, angkana ero' nikanako barani. Battuko mae kaero'nuji bawang anciniki pa'bundukanga!”

²⁹Appialimi Daud angkana, “Apa kasalangku? Nakke poro akkuta'nanja' bawang!”

³⁰Nampa a'lampa siagang napakkuta'nangngang pole anjo passalaka mae ri tantara maraenganga. Na kamma tonjinjo pappiali nagappaya.

³¹Mingka nia' siapa are tau allangngerekai anjo bicaranna Daud napabattui mae ri Saul. Jari nasuro kio'mi Daud untu' andallekang.

³²Nakanamo Daud ri Saul, “Karaeng, tena niparallu malla' ri anjo tu Filistin! Sadiai atanta untu' angngewai.”

³³Appialimi Saul angkana, “Teako! Antekamma olona ikau lattanding siagang ia? Ikau rungka dudu ijako, nampa tenapa nubiasa a'bundu' battu ri rungkanu.”

³⁴Mingka appialimi Daud angkana, “Karaeng, biasai atanta akkalawaki gimbala'na manggena atanta. Punna nia' singa yareka beruang battu ambakkai gimbala',

³⁵naondangi atanta anjo olo'-olo' kammaya nampa nalappassangngi, sa'genna napasalama'mo atanta anjo gimbalaka. Siagang punna singa siagang beruang angngewai atanta, nata'gala'mi atanta kallonna, nampa natunrung atanta sa'genna mate.

³⁶Le'ba'mi atanta ammuno singa siagang beruang. Na anjo tu Filistin kapereka lasangkamma tommi sarenna anjo sikamma olo'-olo' kubunoa, nasaba' barani anghinai tantaraNa Allata'ala attallasaka.

³⁷Napasalama'mi Batara atanta battu ri singa siagang beruang. Iatommi lampasalamaki atanta battu ri anjo tu Filistinga.” Nakanamo Saul ri ia, “Baji'mi, poro Natulung laloko Batara.”

³⁸Nasareammi Saul pakeang pa'bundu'na, iamintu se're baju bassi mae ri Daud nampa napake Daud. Nampa napipakei Saul topi tambaga ri ulunna Daud.

³⁹Kala'busanna napasikko'mi Daud pa'danna Saul ri anjo baju bassia, nampa nacoba a'jappa. Mingka tanakulleai Daud a'jappa lanri tena nabiasa Daud ammake pakeang pa'bundukang. Nakanamo ri Saul, “Takkulleai atanta a'jappa siagang anne pakeanga. Tena nabiasa atanta ampakei.” Nampa napasulu' ngaseng ammotere' anjo pakeanga.

⁴⁰Nampa naalle takkang pakkalawakinna, nammile lima batu a'bundala' ri binangaya, nampa napantama' ri kocikanna. Patte' naerang a'lampa mange angngewai Goliat.

⁴¹Tena siapa sallona, Goliat nirurunganga ri dallekang ri paerang pannangkisi'na, appakkaramulami a'jappa mange anreppesi Daud.

⁴²Mingka nacini'na Daud nampa naparhatikang, ammakkala'mi Goliat ancau-caui Daud lanri rungka iji na ga'ga nacini'.

⁴³Nakanamo Goliat ri Daud, “Lanuapai anjo takkanga? Apa nucini' kongkonga' anne?” Nampa nahinamo anjo Daud lalang arenna sikamma rewatana ke'nanga.

⁴⁴Nampa pole napa'ngara Daud nakana, “Maju mako, nampa kupassareang kalennu mae ri jangang-janganga siagang olo'-oloka sollanna nakanreko.”

⁴⁵Mingka appialimi Daud angkana, “Battuko mae angngewa' siagang pa'dang siagang poke kammayatompa paccoka, mingka inakke battua' angngewako lalang arenNa Batara Kaminang Koasaya, Allata'alana anjo tantara Israel nuhinaya.

⁴⁶Anne memang alloa naNapassareangko Batara mae ri nakke. Lakubetako, siagang lakusamballei kallonnu nampa kualle ulunnu. Kalennu siagang kalenna ngaseng tantara Filistin lakupassareangi ri jangang-janganga siagang olo'-oloka sollanna nakanrei. Nampa sikontu linoa lanaassemmi angkanaya ikambe bansa Israel nia' Allata'alata nisomba.

⁴⁷Siagang sikontu tau niaka anrinni lanaciniki angkanaya tena Naparallu Batara ri pa'dang yareka poke untu' ampasalamaki umma'Na. Iami ampattantui jappana anne pa'bundukanga, siagang Iami lampassareang ngasengko mae ri limanna ikambe.”

⁴⁸Appakkaramulami maju Goliat anreppesi Daud, nampa akkaro-karomo Daud lari mange ri barisi'na tu Filistin untu' andallekangi Goliat.

⁴⁹Nakocci'mi kocikanna Daud, angngalle silisere' batu nampa napapatte' mange ri Goliat. Anjo batua nalappassangngimi antama' abanna Goliat, sa'genna reppe' ka'daro ulunna, nampa tattappasa' a'dalle' naung rupanna ri buttaya.

⁵⁰Larimi Daud mange ri Goliat, nampa ammenteng ri ampi'na. Naallemi pa'danna Goliat nampa napasulu' battu ri banoanna, nampa nasamballe na naalle ulunna anjo tu Filistin. Kammaminjo nanabetamo Daud anjo Goliat siagang nabunomi, naporo patte'ji siagang batuji bawang napake ambetai. Nacini'na tu Filistin angkanaya matemi tu porena ke'nanga, larimi ke'nanga.

⁵¹

⁵²A'gora lompomi tu Israel siagang tu Yehuda nampa naondang tu Filistin sa'genna mange ri Gat siagang pakke'bu' lompona Ekron. Attambummi tu Filistin lokoka ri sikamma aganga mange ri Saaraim.

⁵³Le'baki anjo ammotere'mi tu Israel battu angngondangi tu Filistin nampa narampasa' bone kemana ke'nanga.

⁵⁴Naallemi Daud ulunna Goliat, nampa naerang mange ri Yerusalem. Mingka sikamma sanjatana Goliat naboli'mi ri kema kalenna.

⁵⁵Nacini'na Saul a'lampa Daud mange angngewai Goliat, akkuta'nammi ri Abner panglima tantarana angkana, “Abner, inai ana' anjo?” Appialimi Abner angkana, “Tanaassengai atanta karaeng.”

⁵⁶Naparentakammi Saul angkana, “A'lampako nanupakkuta'nangangi.”

⁵⁷Jari ammotere'na Daud mange ri kemaya, ri le'ba'namo nabuno Goliat, nierammi ri Abner mange andallekang ri Saul. Nabintingiji Daud anjo ulunna Goliat.

⁵⁸Akkuta'nammi Saul ri ia angkana, “E turungka, inaiko antu?” Appialimi Daud angkana, “Anne atanta ana'nai Isai battu ri Betlehem.”