Read Makassar Version – KITTA' MATANGKASA 1 SAMUEL 22 Bible Online

1 SAMUEL 22 - Makassar Version – KITTA' MATANGKASA bible

1 SAMUEL 22

¹ Nampa nabokoi Daud kota Gat na mange accokko ri se'reang kali'bong ri ampi'na kota Adulam. Ri wattunna sikamma daenna siagang kaluargana nalangngereki angkana niaki anjoreng, battumi ke'nanga mae ri ia.

²Kammayatompa sikamma tau nijallakkanga, tau niaka inranna, tenaya nasukku' nasa'ring pa'mai'na, yangasenna ke'nanga a'gabummi siagang Daud, nampa a'jarimo Daud pamimpinna ke'nanga. Ia jaina anjo tau amminawanga ri Daud nia' kira-kira 400 tau jaina.

³Battu anjoreng ri kali'bonga a'lampami Daud mange ri Mizpa ri daera Moab. Nampa nakana ri karaeng pa'rasangang Moab, “Kisarei ising manggena siagang amma'na atanta ammantang ri katte, sa'genna naasseng angkana apa ero'Na Allata'ala mae ri atanta.”

⁴Nampa naerammo tau toana mae ri karaeng pa'rasangang Moab, siagang ammantang tulimi ke'nanga anjoreng lalang accokkona Daud ri kali'bonga.

⁵Ri se'reang allo nia'mo sitau na'bi niarenga Gad battu mae ri Daud na nakana, “Teako ammantangngi anrinni ri kali'bonga. A'lampako linta' mange ri Yehuda.” Jari a'lampami Daud, nampa antama' ri romang Keret.

⁶Ri se'reang allo ammempoi Saul irawangang se'reang poko' kayu irate ri Bonto Gibea. Nata'galaki pokena, nampa nia' ngaseng perwira tantarana ri ampi'na ammenteng. Nalangngere'na angkana niassemmi tampa'na Daud siagang ana' buana,

⁷nakanamo mae ri sikamma perwira tantarana, “Pilangngeri ikau sikamma tu Benyamin! Apaka anjo lapung Daud lanasareko koko siagang koko anggoro'? Maka lanaangka' ngasengko a'jari perwira lalang ri tantarana?

⁸Iakaminjo saba'na nanusituju siagang ia untu' ambalianga' na manna sitau tania' ampauanga' angkanaya ana' kalengku naalleangammi anjo lapung Daud? Tena manna sitau ri kau ngaseng ampikkiriki kalengku yareka ampauanga' angkanaya Daud, ana' bua kalengku, kamma-kamma anne attayangi wattu ero' ambunoa', kammayatompa angkanaya anakku Yonatan nasaremi sumanga' anjo lapung Daud!”

⁹ Doëg, kapala pakalawakinna Saul, nia' tongi anjo wattua anjoreng siagang sikamma perwira tantarana Saul. Nakanamo Doëg, “Le'baki nacini' atanta battu Daud mange ri Ahimelekh ana'na Ahitub ri Nob.

¹⁰Appalaki pitunju' Ahimelekh mae ri Batara ri passala'na apa mustia lanagaukang Daud. Pantaranganna anjo napibokongi tommi Daud kanre, siagang nasareangi pa'danna Goliat, anjo tu Filistin.”

¹¹Jari nakio'mi karaenga anjo Imang Ahimelekh siagang sikontu sari'battanna yareka bijanna ia a'jari imanga ri Nob. Jari battumi ke'nanga andallekang ri ia.

¹²Nakanamo Saul ri Ahimelekh, “Pilangngeri ikau ana'na Ahitub!” Appialimi angkana, “Iye', karaeng.”

¹³Akkuta'nammi Saul ri ia angkana, “Angngapa nussama turu' siagang Daud ambalianga'? Angngapa nupibokongi roti siagang nupassareang pa'danna Goliat mae ri ia, siagang pole nanupappalakkang pitunju' battu ri Allata'ala? Jari kamma-kamma anne nabaliamma' siagang attayammi wattu untu' ambunoa'.”

¹⁴Appialimi Ahimelekh angkana, “Mingka teaika Daud perwira tantarata kaminang tenaya pamminrana? Ia mintu kalenta, kapala pangawala' kalenta, siagang sannaka nipakalompona lalang ri balla' kakaraenganta?

¹⁵Memang, le'baki atanta ampappalakkangi pitunju' battu ri Allata'ala, mingka tena nanampanna anjo nagaukang atanta. Nikanaya passamaturukang ambaliangki', teaki' tudui atanta yareka kalase'renna tau lalanga ri kaluargana atanta. Tena apa-apa pangngassenna atanta ri anjo passalaka!”

¹⁶Mingka nakanamo karaenga, “Ahimelekh! Ikau siagang sikontu sari'battannu yareka bijannu musti mateko.”

¹⁷Nampa naparentakammo mae ri sikamma pangawala'na niaka ammenteng ri ampi'na, nakana, “Buno ngasengi anjo imang-imanNa Batara! Assikongkolo'mi ke'nanga siagang Daud. Naassengi ke'nanga angkanaya lari Daud battu ri nakke, mingka tena naero' ke'nanga ampauanga'.” Mingka taerokai anjo sikamma pangawalaka ambunoi anjo imang-imanNa Batara.

¹⁸Lanri kammana nakanamo Saul ri Doëg, “Lintakko! Ikaumo ambunoi anjo ke'nanga!” Jari majumi Doëg nampa nabuno ngaseng anjo imang-imanga. Anjo alloa nia' sagantujupulo allima imang nabuno, ia imang akkullea ammake baju efod.

¹⁹Nasuro buno tommi Saul sikontu pandudu'na Nob, anjo kota imanga; bura'-bura'ne, baine, ana'-ana' siagang ana' lolo, kammayatompa sapi, keledai, siagang gimbala', yangasenna nibuno ngasengi.

²⁰Nia' sitau bawang ta'lappasa', iamintu Abyatar, kalase'renna ana'-ana'na Ahimelekh. Larimi mange ri Daud,

²¹nampa napauang angkanaya le'baki nabuno Saul sikamma imang-imanNa Batara.

²²Jari nakanamo Daud mae ri ia, “Ri wattunna kucini' Doëg nia' anjoreng anjo alloa, kuassemmi angkanaya musti a'jammaki ri Saul. Jari inakkemi tanggong jawa' mae ri kamateanna anjo sikontu bijannu.

²³Ammantang mako siagang inakke anrinni, siagang teako mallakki. Eroki Saul ambunoko, mingka ero' tongi ambunoa'. Jari laamangko anrinni ri tampakku.”