Read Makassar Version – KITTA' MATANGKASA 1 SAMUEL 25 Bible Online

1 SAMUEL 25 - Makassar Version – KITTA' MATANGKASA bible

1 SAMUEL 25

¹Tena nasallo, matemi Samuel. A'rappungang ngasemmi tu Israel untu' anghaderi pa'gaukang kasusaanga. Nampa nitarawang Samuel ri balla'na ri Rama. Le'baki anjo a'lampami Daud mange ri parang lompo Paran.

²Ri kota Maon nia' sitau bura'ne battu ri passibijanna Kaleb, niarenga Nabal. Nia' parang pangnganreang olo'-olo' katuona ri ampi'na kota Karmel. Sanna' kalumanynyanna siagang nia' 3.000 kayu gimbala'na, siagang 1.000 kayu bembena. Bainenna niarenga Abigail sanna' cara'de'na siagang sanna' ga'gana. Mingka Nabal kasara' sikali sipa'na siagang kodi panggaukanna. Ri se'reang allo sitabangi Nabal nacukkuru' bulu gimbala'na ri Karmel.

⁴Nalangngere'na Daud ia niaka ri parang lompoa anjo passalaka,

⁵nia'mo nasuro sampulo turungka mange ri Karmel,

⁶angngagangi sibuntulu' Nabal untu' ampabattui sallanna Daud mae ri ia. Nasuromi ke'nanga akkana kamma anne ri Nabal, “Salama' siagang salewangang mae ri kau siagang kaluarganu kammayatompa sikontu barang-barannu.

⁷Kulangngere' kabaraki angkanaya sitabangi nucukkuru' bulunna gimbala'nu. Parallui nuasseng angkanaya sikamma pakalawakinnu niaka ri daerana ikambe, tena le'bakai niganggu ri kambe, kammayatompa tena le'bakapi nia' apa-apanna ke'nanga tappela' baku' nia'na ri Karmel.

⁸Pakkuta'nangngang mami ri ke'nanga, mattantu napakkontutojenna ke'nanga anjo passalaka. Lanri kammana anjo, kuminasai nanutarima baji' ana' buaku ri balla'nu, lanri battui ikambe ri anne allo lompoa. Sare tongi anne sikamma ata-atannu siagang inakke pole Daud, agang baji'nu, apa-apa mamo situru' nakate'neanga pa'mai'nu.”

⁹Battui mae ri Karmel, napabattumi ana' buana Daud anjo pasanna mae ri Nabal lalang arenna Daud, nampa attayang ke'nanga.

¹⁰Mingka appialimi Nabal angkana, “Daud? Inai tau anjo? Inai anjo ana'na Isai? Tale'bakapa' allangngereki kabara'na! Anne allo-allo beru allaloa, jai ata lari ambokoi pinggawana ri anne pa'rasanganga!

¹¹Kemae lakkulle kualle rotiku siagang je'ne' inungku kammayatompa dageng le'baka kupasadia untu' sikamma pacukkurukku, nampa kupassareang ngaseng mae ri tau tenaya nattantu assala'na!”

¹²Jari ammotere'mi anjo ana' buana Daud mange ri Daud nampa napabattu mae ri ia anjo kana-kananna Nabal.

¹³Naparentakammi Daud angkana, “Massing pasikko' ngasengi pa'dannu ri aya'nu!” Silalonna memang nanagaukammo ana' buana anjo apa naparentakanga. Napasikko' tommi Daud pa'danna ri aya'na nampa a'lampa siagang kira-kira nia' 400 tau, nampa nia' 200 ammantang untu' a'jaga barang-barang.

¹⁴Na lalanna anjo, Abigail bainenna Nabal, le'ba'mi nipauang ri sitau palayanna Nabal, angkanaya, “Kilangngere'mi kabara'na Ibu'? Angkanaya nia' siapa are tunasuro Daud battu ri parang lompoa untu' ampabattui sallanna ri pinggawata, mingka nipakka'-pakkanaimi ke'nanga ri pinggawata.

¹⁵Nampa anjo ke'nanga sanna' baji'na mae ri kambe. Tena le'bakai kambe niganggu, siagang pole tena le'bakai nia' apa-apanna ikambe tappela' baku'na siagang ikambe ke'nanga ri parang lompoa.

¹⁶Allo bangngi ke'nanga anjagai ikambe baku'na ikambe akkalawaki bembe siagang gimbala' ri ampi'na ke'nanga.

¹⁷Lanri kammana anjo, pikkiri' baji'-bajiki anne passalaka, siagang kitappukimi apa akkullea kigaukang ibu'. Nasaba' mattantu labattuna pa'balasaka mae ri pinggawata siagang sikontu kaluargana. Terasa' dudui ulunna pinggawata sa'genna takkulleai niagang a'bicara!”

¹⁸Jari akkaro-karomi Abigail angngalle ruambilangngang roti, siagang pammoneang rassia anggoro', limang kayu gimbala' nilangga, sampulo antuju kilo battala'na gandung, sibilangngang tangkenna anggoro' kalotoro' kammayatompa ruambilangngang kanrejawa ara. Yangasenna anjo nilurammi irate ri sikamma keledaina.

¹⁹Nampa nakanamo mae ri palayang-palayanna, “A'jappa riolo mako ri dallekangku; sinampe' kumminawang.” Mingka tena sikali napauangi bura'nenna.

²⁰Abigail nabaemi keledaina, na ri wattunna anrapi' ri se'reang pa'lekkoang ri biring moncong, assibuntulu'mi siagang Daud siagang ana' buana, ia sitabanga naung a'jappa mae ri ia.

²¹Anjo wattua sitabangi appikkiri' Daud angkanaya, “Sia-siaji kujagaiang barang-baranna anjo taua ri parang lompoa! Tena manna sike'de' dudu apa-apanna tappela'. Nampa kamma-kamma anne nabalasaki kabajikangku siagang kaja'dallang!

²²Tapporo Nabuno laloa' Allata'ala punna tena nakubuno ngaseng sikontu tu bura'ne niaka anjoreng lalang tenanapa nammumba alloa!”

²³Nacini'na Abigail anjo Daud, akkaro-karomi naung battu ri keledaina nampa su'ju'

²⁴ri bangkenna Daud, nampa nakana, “O karaeng, kipilangngeria' rolong! Boli'mi kamma kalenna atanta antanggongi anjo kasalanga.

²⁵Tea' maki' pikkiriki Nabal karaeng, anjo tu tenaya matu-matunna! Ia tau tolo — sangkamma battuanna arenna. Tena naciniki atanta sikamma anjo tau kisuroa karaeng.

²⁶Napisangkaiki' Allata'ala untu' annuntu' pambalasang siagang ambunoi musu-musunta. Nampa kamma-kamma anne karaeng, lanri Batara mattallasaka, assumpai atanta, tapporo sarenna sikontu musunta siagang sikamma tau eroka ancilakaiki' sangkammai sarenna Nabal.

²⁷Kitarimami anne passare naeranga atanta untu' karaengku siagang ana' buana karaengku.

²⁸Kipammopporangi kacapakkanna atanta. Mattantu Batara laNaangkakki' siagang turunganta a'jari karaeng mae ri Israel, nasaba' a'bundukki' untu' Batara; siagang tena nalakigaukang kaja'dallanga lalang sikontu tallasatta.

²⁹Ebara' angkana nia' tau ambunduki karaengku siagang ancobai ero' ambunoi karaengku, mattantu laNakatutuiki' Karaeng Allata'ala sanrapang barang-barang nijagaia ri patanna. Mingka sikamma musu-musunna karaengku lanipasambilai bella-bella ri Batara, nipasambila siagang patte'.

³⁰LaNagaukangi Batara sikontu kabajikang le'baka Napa'janjiang mae ri karaengku, siagang tasalloami naNaangkakki' a'jari karaeng ri Israel.

³¹Ri anjo wattua lanau'rangimi karaengku angkanaya tena nammuno karaengku punna tena saba'na, yareka tena nalakalenna a'jari haking sa'genna tenamo naparallu si'na pamai'na yareka lassesse' lalang karaengku. Na punna le'ba'mi Nabarakkaki Batara karaengku, teaki' kaluppai anne atanta karaeng.”

³²Nakanamo Daud ri ia, “Nipujimi Batara, Allata'alana Israel ia assuroako battu ambuntulia' anne alloa.

³³Nipujimi kabajikannu siagang nipuji tommako ikau kalennu lanri nutahangku anggaukangi panggaukang ammunoa kammayatompa a'jari haking kalenna.

³⁴Natahamma' Batara appanggaukang ja'dala' mae ri kau. Lanri Batara, Allata'alana Israel, ebara' angkana tena nulinta' ambuntulia', ma'nassa mate ngasemmi ana' buana Nabal ri wattu tenanapa nammumba alloa.”

³⁵Le'baki anjo natarimami Daud anjo apa-apa naeranga Abigail, nampa nakana ri ia, “Ammotere' mako mange ri balla'nu siagang tea' mako bata-batai. Kuturukiang mako pappala'nu.”

³⁶Ri wattunna ammotere' Abigail mae ri Nabal, nia'mo narapikang passua'-suarrang lompo nigaukang ri balla'na, sangkamma passua'-suarrang karaeng. Nalanri nasa'ringi Nabal siagang a'rannu-rannuna, tena sikalimo nanipauangi ri bainenna sa'genna ammukona.

³⁷Ammukona bari'basa', ri tenanamo nasa'ringi Nabal, nipauammi ri bainenna sikamma anjo kaja'dallanga. Nampa anggappamo garring silalonna Nabal nampa a'jari lamma ngasemmo sikontu batangkalenna.

³⁸Kira-kira sampulo allo sallona pole, anggappami pole garring Nabal battu ri Batara sa'genna matemo.

³⁹Nalangngere'na Daud angkana matemi Nabal, nakanamo, “Nipujimi Batara! Nabalasa'mi kana-kana appakahinana mae ri nakke, siagang Napisangkaimi anne atanNa ampanggaukang kaja'dallang. Nihukkummi Nabal ri Batara lanri kaja'dallanna.” Nampa akkirimmo Daud tunasuro mange ri Abigail untu' ampassuroi a'jari bainenna.

⁴⁰Nabattumo anjo tunisuroa mange ri anjo bainea ri Karmel nampa nakana ri ia, “Ikambe anne nasuroki' Daud battu andallekang ri katte nasaba' eroki ampassuroiki' napa'jari bainenna.”

⁴¹Ammentemmi nai' Abigail nampa su'ju' siagang nakana, “Inakke anne atanna' Daud, sadia' ambissai bangkenna sikamma atanna.”

⁴²Nampa apparurumo linta'. Nai'mi ri keledaina nampa nirurungang ri lima tau baine palayanna, na'lampa amminawang ri tunasuroa Daud, na'jarimo bainenna Daud.

⁴³Rioloannaya anjo Daud le'ba'mi a'nikka siagang Ahinoam battu ri Yizreel, nampa anjo wattua Abigail a'jari tommi bainenna.

⁴⁴Lalanna anjo wattua Saul le'ba'mi napa'bunting ana' bainena iamintu Mikhal, iamintu bainenna Daud, siagang bura'ne maraeng niarenga Palti ana'na Lais battu ri kota Galim.