Read Makassar Version – KITTA' MATANGKASA 1 SAMUEL 27 Bible Online

1 SAMUEL 27 - Makassar Version – KITTA' MATANGKASA bible

1 SAMUEL 27

¹Appikkiri'mi lalang ri atinna Daud angkana, “Manna pole antekamma, ri se'reang allo lanabuno tonja' Saul. Jari tena oloang maraeng ri nakke, pantaranganna laria mange ri pa'rasangang Filistin. Lanri kammana anjo talanaboyaiyama' Saul ri Israel, siagang laamang tommi kusa'ring.”

²Nampa Daud siagang anjo annambilangnganga ana' buana, a'lampami linta' mange ri Akhis ana'na Moah, karaeng kota Gat.

³Jari ammantammi ri Gat siagang ana' buana, massing-massing siagang kaluargana ke'nanga. Daud naerang tommi anjo ruaya bainenna, iamintu Ahinoam baine battua ri Yizreel, siagang Abigail, le'ba' bainenna Nabal baine tu Karmel.

⁴Nalangngere'na Saul angkanaya larimi Daud mange ri Gat, tenamo nausaha ero' anjakkalaki.

⁵Nampa napala'mi Daud mae ri Akhis angkana, “Punna sannanja karaengku mae ri anne atanta, kisaremi atanta se're kota ca'di ri padalamang untu' napammantangngi atanta, sollanna tenamo nannompang anne atanta ri katte anrinni ri kotaya.”

⁶Nampa Akhis napassareammi kota Ziklag mae ri Daud. Na iaminjo saba'na anjo kota Ziklag a'jarimi kotana karaeng-karaeng Yehuda sa'genna kamma-kamma anne.

⁷Ammantangi Daud ri pa'rasangang Filistin sitaung annang bulang sallona.

⁸Le'baki anjo jammanga, Daud siagang ana' buana biasai mange ambunduki tu Gesur, tu Girzi, tu Amalek; sikamma anjo bansaya sallo ngasemmi ammantang anjoreng ri daeraya. Mangemi a'bundu' sa'genna mange ri Sur, nampa tulusu' mange ri Mesir.

⁹Nabunomi sikontu tu bura'nea siagang tubainea, kammayatompa narampasaki gimbala'na, sapina, keledaina, untana, ba'lalo care-carena pole. Nampa ammotere' siagang mange andallekang ri Akhis.

¹⁰Punna akkuta'nang Akhis ri ia angkana, “Kemaeko a'bundu' ri kamma-kammaya anne?” Jari appialimi Daud angkanaya a'lampai mange ri bageang timboranna Yehuda yareka ri daerana tu Yerahmeel yareka ri daera pammantanganna tu Keni.

¹¹Tena manna sitau ri anjo daera-daera nabundukia naboli' attallasa', sollanna tena nania' tubattu ri anjo daera-daeraya akkulle a'lampa mange ri Gat untu' allaporoki angkana apa sikontutojenna nagaukang Daud siagang ana' buana. Kammaminjo nagaukanga Daud lalang ammantanna ri pa'rasangang Filistin.

¹²Mingka Akhis napatappaki Daud na napikkiri' lalang ri atinna angkanaya, “Sannaki nikabirisinna ri bansana kalenna, sa'genna tarpassa a'jari atangku lalang sikontu tallasa'na.”