Read Makassar Version – KITTA' MATANGKASA 1 SAMUEL 28 Bible Online

1 SAMUEL 28 - Makassar Version – KITTA' MATANGKASA bible

1 SAMUEL 28

¹Siapa are wattu ribokoangannaya napagio'mi tu Filistin tantarana untu' mange ambunduki Israel. Nampa nakanamo Akhis ri Daud, “Tantu nupahangi angkanaya ikau siagang ana' buanu laagangko siagang inakke lalang ri pa'bundukanga.”

²Appialimi Daud angkana, “Tantumi, sallampi nakicini' karaeng, angkana apa akkulle nagaukang anne atanta.” Nampa nakanamo Akhis, “Baji'mi! Kuangka' mako a'jari pangawalakku attantua.”

³ Matemi Samuel siagang nikarrukimi ri sikontu Israel, nampa nitarawang ri Rama, kota kalenna. Siapa are wattu allaloa, nabongkami Saul battu ri Israel sikontu pacinika siagang sanro pakkio' nyawa tu matea.

⁴Jari ri wattunna a'rappungang tantara Filistin siagang akkema ri ampi'na kota Sunem, napa'rappungang tommi Saul tu Israel, nampa akkema ke'nanga ri Moncong Gilboa.

⁵Nacini'na Saul anjo tantara Filistin, a'jari sanna'mi malla'na.

⁶ Nampa appala'mo pitunju' mae ri Batara, mingka tena nipiali ri Batara, baji' lalang so'na, baji' lalang ammake Urim siagang Tumim yareka tete ri sikamma na'bia.

⁷Lanri kammana anjo nakanamo Saul mae ri pagawena, “A'boyako sitau sanro baine pakkio' nyawa tu mate, kaerokka' a'lampa mange ri ia untu' appala' pitunju'.” Appialimi ke'nanga angkana, “Ri En-Dor nia' sanro kammaya anjo.”

⁸Ammake palusu'mi Saul sollanna tena naniasseng ri taua. Nirurungammi ri rua tu bura'ne, nampa a'lampa siagang battu mange ri balla'na anjo sanroa ri wattu bangnginamo. Nakanamo Saul, “Kio' sai nyawana tu mate kutappua arenna, siagang pala'mi nanatappu apa eroka lakajariang.”

⁹Appialimi anjo bainea angkana, “Tantu kiasseng tongi angkanaya anjo Karaeng Saul le'ba'mi nabongka sikontu pacinika siagang pakkio' nyawa tu matea, battu ri Israel. Angngapa nakicoba ero' ancilakaia' sa'gengku akkulle nibuno?”

¹⁰Nampa assumpamo Saul angkana, “Lanri arenNa Batara mattallasaka, a'janjia' angkanaya tena nalanihukkungko lanri nugaukanna anne.”

¹¹Akkuta'nammi anjo bainea angkana, “Nyawana tumate inai musti kukiokangki'?” Appialimi Saul angkana, “Nyawana Samuel”

¹²Ri wattunna nacini' anjo bainea Samuel, ammarrammi siagang nakanamo ri Saul, “Angngapa nakitipu atanta? Ikattemi padeng Karaeng Saul!”

¹³Appialimi karaenga angkana, “Teako mallakki! Pau mami apa nucinika!” Appialimi anjo bainea angkana, “Nia' roh nacini' atanta ammumba battu lalang ri buttaya.”

¹⁴Akkuta'nammi Saul angkana, “Antekamma tanja'na?” Appialimi angkana, “Sitau bura'ne toa. Ammumbai ammake juba.” Jari naassemmi Saul angkana Samuel anjo, sa'genna su'ju'mi naung ampakala'biriki.

¹⁵Le'baki anjo nakanamo Samuel ri Saul, “Angngapa nanuganggua'? Angngapa nukiokka' ammotere'?” Appialimi Saul angkana, “Sanna' linguku lanri nibundukia' ri tu Filistin, nampa Nabokoima' Allata'ala. Tenamo Napialia', baji' tete ri sikamma na'bia, kammayatompa lalang so'na. Lanri kammana kupalaki ri katte Bapa', sollanna kipauanga' apa musti kugaukang.”

¹⁶Nampa nakanamo Samuel, “Apa matu-matungku nukio' nampa Nabokoi mako Batara siagang a'jari musunnumi?

¹⁷ Nagaukammi Batara sangkamma apa le'baka Napau tete ri nakke. Naallemi Batara kakaraenganna Israel battu ri kau nampa Napassareang mae ri Daud.

¹⁸ Ikau nubaliammi parentaNa Batara siagang tena nanuero' angngancuruki tu Amalek kammayatompa sikontu barang-baranna ke'nanga. Iaminjo saba'na nanipakammako anne ri Batara ri kamma-kammaya anne.

¹⁹Ikau siagang tu Israel laNapassareangko mae ri tu Filistin. Ammuko, ikau siagang ana' bura'nenu la'rappungangko siagang inakke; ba'lalo sikontu tantara Israel lanipassareang tongi mae ri tu Filistin.”

²⁰Anjo memang wattua, anra'bami Saul naung ri buttaya sanrapang tunitabaya ri kila', lanri sanna' ta'bangkana allangngereki anjo kana-kananna Samuel. Nampa pole sanna' sikali lammana kalenna, nasaba' siallomi sipattang tena sikali apa-apa nakanre.

²¹A'reppese'mi anjo sanroa mae ri Saul na nacini' angkanaya sanna' linguna. Lanri kammana nakanamo anjo bainea ri ia, “Karaengku, le'ba'mi atanta anggaukangi apa le'baka kipala'.

²²Jari, poro kiturukiammi pappala'na atanta; angnganre maki' sike'de' kanre, eroka napatalangki' atanta, sollanta akkulle ampatulusuki jappata.”

²³Taerokami Saul na nakana taerokai angnganre. Mingka nipassanamo ri sikamma pagawena, amminawang turu'mi. Ammentemmi nai' battu ri buttaya nampa ammempo ri balla'-ballaka.

²⁴Akkaro-karomi anjo bainea anynyamballe sikayu ana' sapi ia co'moka, nampa angngalle labu' nampa naleo', nampa napare' roti tenaya nammake pa'gambang.

²⁵Le'baki anjo napatalami anjo kanrea ri dallekanna Saul siagang pagawe-pagawena, nampa angnganre ke'nanga. Nampa a'lampamo ke'nanga anjo memang bangngia.